ސައިކަލު ޕާކްކޮށްފައި ހުންނަ ކޮންމެ ގަޑިއިރަކަށް 2 ރުފިޔާ!
މޮޓޯ ސައިކަލާއި، އިންޖީނުލީ ބައިސްކަލާއި، ސްކޫޓަރު ފަދަ އުޅަނދުތަކަށް، ކޮންމެ 1 ގަޑިއިރަކަށް 2 ރުފިޔާ
މާލޭގައި ސައިކަލްތަކެއް ޕާކްކޮށްފައި
ބަންޑާރަ މަގެއްގައި ސައިކަލް ޕާކްކުރާނަމަ، ކައުންސިލުން ބޭނުން ވެއްޖެނަމަ ގަޑި އިރަކަށް 2 ރުފިޔާ ނެގިދާނެކަމަށް ބަޔާންކޮށް، އެއްގަމު އުޅަނދު ޕާކު ކުރުމުގެ ގަވާއިދު އާންމުކޮށްފިއެވެ.
މި ގަވާއިދަކީ އެއްގަމު އުޅަނދު ޕާކު ކުރުމާއި، އެއްގަމު އުޅަނދުތައް ޕާކު ކުރާނެ ޕާކިންގ ޒޯނު ކަނޑައެޅުމާއި، ގަވާއިދާ ޚިލާފަށް މަގުމަތީގައި ޕާކު ކޮށްފައި ނުވަތަ ބަހައްޓައިފައި ހުންނަ އެއްގަމު އުޅަނދުގައި ސްޓިކަރ ޖެހުމާއި، އެފަދަ އުޅަނދުތަކުގެ ފުރޮޅުގައި ތަޅު އެޅުވުމާއި، ޓޯވކުރުމާއި، އެއްގަމު އުޅަނދު ނައްތައިލުމުގައި އަމަލުކުރާނެ އުސޫލުތައް ބަޔާންކުރުމުގެ ގޮތުން، އެއްގަމު ދަތުރުފަތުރުގެ ކަންކަން ހަވާލުކުރެވިފައިވާ މިނިސްޓްރީއަށް، އެއްގަމު ދަތުރުފަތުރުގެ ގާނޫނުގެ 3 ވަނަ މާއްދާގެ (ހ)އިން ލިބިދޭ ބާރުގެ ދަށުން އެކުލަވައިލައިފައިވާ ގަވާއިދެކެވެ.
މި ގަވާއިދުގައި، ބަންޑާރަ މަގުތަކުން ޕާކިން ޒޯން ކަނޑައަޅައި އެއަށް އަގު ނެގިދާނެކަމަށް ބުނެއެވެ. މި ގަވާއިދުގެ 4 ވަނަ މާއްދާގެ (ދ)ގައި ބުނެފައިވަނީ ކައުންސިލްތަކުން ޕާކިންގ ޒޯނުތައް ކަނޑައެޅުމުގައި، ހިލޭ ޕާކު ކުރެވޭނެ ސަރަހައްދުތަކާއި، ވަކި ވަގުތުތަކަށް ވަކި ފީއެއް ދައްކައިގެން ޕާކު ކުރެވޭނެ ސަރަހައްދުތައް ކަނޑައެޅިދާނެ ކަމަށެވެ. މިފަދައިން ސަރަހައްދުތައް ކަނޑައެޅުމުގައި، ގިނަބަޔަކު ޚިދުމަތް ހޯދަން ދާންޖެހޭ ތަންތަން ހުންނަ ސަރަހައްދުތަކުގައި ފީނަގައިގެން ޕާކުކުރާ ތަންތަން ބެހެއްޓުމަށާއި، ނިސްބަތުން މަދު އަދަދެއްގެ މީހުން ޕާކުކުރަންޖެހޭ ފަދަ ސަރަޙައްދުތަކުގައި ހިލޭ ޕާކުކުރެވޭނެ އިންތިޒާމު ހަމަޖެއްސުމަށް އިސްކަންދޭންވާނެއެވެ.
އަދި މި ގަވާއިދުގެ ދަށުން، ކަނޑައަޅާފައިވާ އަގަށްވުރެ ބޮޑު ނުވާނެ ގޮތަށް އަގު ކަނޑައެޅުމުގެ ބާރު ކައުންސިލްތަކަށް މި ގަވާއިދުގެ ދަށުން ލިބެއެވެ.
މި ގަވާއިދާ ޚިލާފަށް ޕާކުކުރާ އެއްގަމު އުޅަނދުގައި، މި ގަވާއިދުގެ ޖަދުވަލު 1 ގައިވާ "ޕާކިންގ ވަޔަލޭޝަން ސްޓިކަރ" ހަރުކުރުމުގެ އިޚުތިޔާރު، މިނިސްޓްރީއަށާއި މިނިސްޓްރީން ކަނޑައަޅާ އެހެން ފަރާތްތަކަށް ލިބިގެންވެއެވެ. މި މާއްދާގެ (ހ)ގައި ބަޔާންކޮށްފައިވާ ޕާކިންގ ވަޔަލޭޝަން ސްޓިކަރ ހަރުކުރާތާ ގިނަވެގެން 24 ގަޑިއިރުގެ ތެރޭގައި އުޅަނދުގެ ވެރިފަރާތުން އެ އުޅަނދު އޮތް ތަނުން ނަގަންވާނެއެވެ.
އެއްގަމު އުޅަނދެއް ގަވާއިދާ ޚިލާފަށް ޕާކު ކުރުމުގެ ސަބަބުން އުޅަނދުގައި ޕާކިންގ ވަޔަލޭޝަން ސްޓިކަރ ޖަހާ ކޮންމެ ފަހަރަކު އުޅަނދު ޕާކްކުރި ފަރާތުގެ ލައިސަންސުން 5 ކްރެޑިޓް ޕޮއިންޓް އުނިކުރުމުގެ އިޚްތިޔާރު މިނިސްޓްރީއަށް، ނުވަތަ މިނިސްޓްރީން ކަނޑައަޅާ ފަރާތަކަށް ލިބިގެންވާކަމަށް މި ގަވާއިދުގައި ބުނެއެވެ. އަދި އެ އުޅަނދެއް ނުނަގައިފިނަމަ، އެ އުޅަނދެއް ޓޯވ ކުރުމަށްޓަކައި ފުރޮޅުގައި ތަޅު އެޅުވުމުގެ އިޚުތިޔާރު އެ ރަށެއްގެ ރަށު ކައުންސިލަށް ނުވަތަ އެ ސިޓީއެއްގެ ސިޓީ ކައުންސިލަށް ނުވަތަ ފުލުހުންނަށް ލިބިގެންވެއެވެ. މިގޮތުން އެ އުޅަނދެއްގެ ފުރޮޅުގައި އަޅުވައިފައިވާ ތަޅަށް، އެއްވެސް ގެއްލުމެއް އެއްވެސް ފަރާތަކުން ދިނުމަކީ މަނާކަމެކެވެ.
މި ގަވާއިދު ބުނާގޮތުން، އެއްގަމު އުޅަނދު ޕާކުކުރުމަށް ކަނޑައަޅައިފައިވާ ތަނެއްގައި، މެދުކެނޑުމެއްނެތި އުޅަނދު ބޭއްވޭނީ، ގިނަވެގެން 7 ދުވަހުގެ މުއްދަތަށެވެ. ނަމަވެސް ޚާއްސަ އެހީއަށް ބޭނުންވާ ފަރާތްތަކުގެ އުޅަނދުތައް މި މުއްދަތުން އިސްތިސްނާވެއެވެ.
