ވެކްސިން ފުރިހަމަކޮށްފައިވާ ފަތުރުވެރިންނަށް އިންޑިޔާ ހުޅުވާލައިފި
15 ނޮވެމްބަރު 2021 | ހޯމަ 16:38އިންޑިޔާއަށް އެތެރެވެވޭނީ 72 ގަޑިއިރު ހަމަނުވާ، ނެގެޓިވް ޕީސީއާރު ޓެސްޓަކާއެކު
ތާޖުމަހަލް
ވެކްސިން ފުރިހަމަކޮށްފައިވާ ފަތުރުވެރިންނަށް ކޮމަރޝަލް ފްލައިޓްގައި އިންޑިޔާއަށް އެތެރެވެވޭގޮތަށް ހަމަޖައްސައިފިއެވެ.
ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް ހޯމަ ދުވަހުން ފެށިގެން އިންޑިޔާއަށް އެތެރެވެވޭގޮތަށް ހަމަޖެއްސިއިރު، އިންޑިޔާއަށް އެތެރެވެވޭނީ 72 ގަޑިއިރު ހަމަނުވާ ނެގެޓިވް ޕީސީއާރު ޓެސްޓަކާއެކުއެވެ. އިންޑިޔާގެ ހެލްތު މިނިސްޓްރީން ނެރެފައިވާ ބަޔާނެއްގައި ބުނެފައިވަނީ، އިންޑިޔާއަށް އެތެރެވުމަށްފަހުވެސް ކޮވިޑް ޓެސްޓް ހަދަންޖެހޭނެކަމަށެވެ.
އެހެންނަމަވެސް އިންޑިޔާއިން ގަބޫލުކުރާ ވެކްސިން ސެޓްފިކެޓް ގެންގުޅޭ ގައުމުތަކުގެ ރައްޔިތުންނަށް، އެގައުމަށް އައުމަށްފަހު އެއަރޕޯޓުން ހަދަންޖެހޭ ކޮވިޑް ޓެސްޓް ހަދަންނުޖެހޭނެކަމަށް ހެލްތު މިނިސްޓްރީން ބުނެއެވެ. އޭގެތެރޭގައި އެމެރިކާ، އިނގިރޭސިވިލާތް އަދި ޔޫރަޕްގެ ގިނަ ގައުމުތަކެއް ހިމެނެއެވެ.
ކޮވިޑާ ގުޅިގެން އިންޑިޔާގެ ބޯޑަރުތައް 2020 ވަނަ އަހަރުގެ މާޗް މަހު ބަންދުކުރި ފަހުން ފުރަތަމަ ފަހަރަށް އެގައުމު ފަތުރުވެރިންނަށް ހުޅުވާލާއިރު، މިދިޔަ މަހުން ފެށިގެން ވަނީ ވެކްސިން ފުރިހަމަކޮށްފައިވާ ފަތުރުވެރިންނަށް ޗާޓަރު ފްލައިޓްތަކުގައި އެގައުމަށް އެތެރެވުމުގެ ފުރުސަތު ހުޅުވާލާފައެވެ.
އިންޑިޔާއަށް ފަތުރުވެރިން އައުމަށް ހިތްވަރުދިނުމުގެ ގޮތުން، މާޗް މަސް ނިމެންދެން 500،000 ހިލޭ ވިސާ ދިނުމަށް އިންޑިޔާ ސަރުކާރުން ވަނީ ނިންމާފައެވެ. މިއާއެކު އެގައުމުގައި އިނދަޖެހިފައިވާ ފަތުރުވެރިކަމާއި ހޮސްޕިޓާލިޓީ ކުރިއަރާނެކަމަށް ބެލެވެއެއެވެ.
އިންޑިޔާގައި ކޮވިޑް ޖެހިފައިވާ މީހުންގެ އަދަދު 35 މިލިއަނަށް އަރާއިރު، އިންޑިޔާއަކީ މުޅި ދުނިޔެއިން ކޮވިޑް ޖެހިފައިވާ މީހުންގެ އަދަދު ދެވަނަ އަށް އެންމެ ގިނަ ގައުމެވެ. އިންޑިޔާގެ އާބާދީގެ ބޮޑެތި މީހުންގެ ތެރެއިން 79 އިންސައްތަ މީހުން ވެކްސިންގެ އެއް ޑޯޒް ފުރިހަމަކޮށްފައިވާއިރު، 38 އިންސައްތަ މީހުން ވަނީ ދެ ޑޯޒް ފުރިހަމަކޮށްފައެވެ. ވެކްސިން ދިނުން ހަލުވިކުރުމުގެ ގޮތުން އިންޑިޔާ ސަރުކާރުން މިހާރު ނިންމާފައިވަނީ، ވަކިވަކިން ކޮންމެ ގެއަކަށް ގޮސްގެން ވެކްސިން ދިނުމަށެވެ.
އިންޑިޔާއަށް 2020 ވަނަ އަހަރު އައި ފަތުރުވެރިން، އޭގެކުރީ 2019 ވަނަ އަހަރާ އަޅާބަލާއިރު 75 އިންސައްތަ ވަނީ ދަށްވެފައެވެ. 2019 ވަނަ އަހަރު އިންޑިޔާއަށް، ފަތުރުވެރިކަމުގެ ދާއިރާއިން 30 ބިލިއަން ޑޮލަރުގެ އާމްދަނީއެއް ވަނީ ލިބިފައެވެ.
