ރިހެބިލިޓޭޝަން ސެންޓަރުތައް ހިންގަން ބޭރުގެ ފަރާތްތަކަށް ދިނުމަށް އެމްޑީޕީގެ ޗެއަރޕަރސަން ގޮވާލައްވައިފި
ނެޝަނަލް ޑްރަގް އޭޖެންސީ (އެންޑީއޭ)ގެ އަންނަ އަހަރުގެ ބަޖެޓަށް 129 މިލިއަން ރުފިޔާ ބަޖެޓް ކޮށްފައިވޭ
ނޭޝަނަލް ޑްރަގް އެޖެންސީ
މަސްތުވާތަކެތި ބޭނުންކުރާ މީހުންނަށް ފަރުވާދޭ ރިހެބިލިޓޭޝަން ސެންޓަރުތައް ހިންގަން ބޭރުގެ ފަރާތްތަކާ ހަވާލުކުރުމަށް އެމްޑީޕީގެ ޗެއަރޕަރސަން، އަދި ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފް ގޮވާލައްވައިފިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓާ ގުޅޭ ގޮތުން ހޯމަ ދުވަހުގެ ޖަލްސާގައި ޙަސަން ވިދާޅުވީ، މަސްތުވާތަކެތީގެ ވަބާއިން ދިވެހި ޖީލު ސަލާމަތް ކުރުމަށް ޚާއްސަ މަސައްކަތްތަކެއް ކުރަން ޖެހިފައިވާ ކަަމަށާއި، އެހެން ނޫނީ ކުރިއަށް އޮތް ޖީލުވެސް ސަލާމަތް ނުކުރެވޭނެ ކަމަށެވެ. ސިޔާސަތަށް ބޮޑު ބަދަލު ގެންނަން ޖެހޭ ކަމަށާއި، ރާއްޖޭގެ ވަސީލަތްތައް ހުރި މިންވަރުން ރާއްޖެއަށް ބޭނުންވާ މިންވަރަށް އެކަން ކުރެވިދާނެ ކަމަށް ގަބޫލު ނުކުރެއްވޭ ކަމަށެވެ. އެހެންކަމުން ބޭރުގެ ފަރާތްތަކަށް އެކަން ދޫކޮށްލައިގެން، އެއީ ބޭރުގެ ފަރާތްތަކުން ކުރާ ކަމެއްގެ ގޮތުގައި ސިޔާސަތަށް ބަދަލު ގެނައުމަށް އެދިވަޑައިގަންނަވާ ކަމަށް ވިދާޅުވިއެވެ.
އަންނަ އަހަރު ނެޝަނަލް ޑްރަގް އޭޖެންސީ (އެންޑީއޭ)ގެ ބަޖެޓަށް 129 މިލިއަން ރުފިޔާ ބަޖެޓް ކޮށްފައިވާއިރު، 117 މިލިއަން ރުފިޔާ ކަނޑައަޅާފައި ވަނީ މަސްތުވާތަކެތި ބޭނުން ކުރުން ދުރުކުރުމަށާއި ފަރުވާގެ އެކި ކަންކަމަށެވެ.
މަސްތުވާތަކެތި ބޭނުންކުރާ މީހުންނަށް ފަރުވާ ދިނުމަށް ހަދާފައިވާ މަރުކަޒުތައް އެންޑީއޭގެ ބެލުމުގެ ދަށުން ހިންގަމުން އަންނަ ނަމަވެސް، އެތަނުގައި ބޮޑެތި މައްސަލަތަކެއް ހުރެ، ފަރުވާގެ ނިޒާމު ރަނގަޅަށް ކުރިއަށް ނުގެންދެވޭ ކަން ވަނީ ހާމަވެފައެވެ. ހިންގުން ހަރުދަނާ ކުރުމަށް ކުރަމުން އަންނަ މަސައްކަތުގެ ތެރެއިން އައު ބޯޑެއްވެސް ވަނީ އެކުލަވާލާފައެވެ. އަދި އެ ތަނުގެ ސްޓްރަކްޗަރއަށް ބަދަލުތަކެއް ގެނައުމަށް މަސައްކަތް ކުރަމުން އަންނަކަން އައު ބޯޑުންވަނީ ހާމަކޮށްފައެވެ.
