"އެއްވެސް މީހަކު ބަންދު ކުރަންވެސް ދޫކުރަންވެސް ޕީޖީ އޮފީހަށް އެއްވެސް ދިމާއަކުން ނުރަނގަޅު ނުފޫޒެއް ނާދޭ"
100 ކިލޯގެ މަސްތުވާތަކެތީގައި މައްސަލައިގައި ފުލުހުން ޖުމްލަ 10 މީހަކު ހައްޔަރުކުރި
ޕްރޮސެކިއުޓާ ޖެނެރަލް ހުސައިން ޝަމީމް
އެއްވެސް މައްސަލައެއްގައި މީހަކު ބަންދު ކުރުމަށް ނުވަތަ ދޫކޮށްލުމަށްވެސް ނުރަނގަޅު ނުފޫޒެއް ސަރުކާރުގެ ފަރާތުންވެސް އެހެން ބައެއްގެ ފަރާތުންވެސް ކުރިމަތިނުވާކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އާދިއްތަ ދުވަހު އޮތް ނޫސްވެރިންގެ ބައްދަލުވުމެއްގައި ނޫސްވެރިން ވަނީ 100 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުނުކަމަށް ބުނާ 2 މީހުން ދޫކޮށްލި މައްސަލައާ ގުޅިގެން ސުވާލު ކޮށްފައެވެ. އެކަމުގައި އެއްވެސް ނުފޫޒެއް އޮތްތޯ ނޫސްވެރިން ވަނީ ސުވާލުކޮށްފައެވެ.
އެކަމާ ގުޅޭގޮތުން ޕީޖީ ވިދާޅުވީ، އެއްވެސް މައްސަލައެއްގައި މީހަކު ބަންދު ކުރުމަށް ނުވަތަ ދޫކޮށްލުމަށްވެސް ނުރަނގަޅު ނުފޫޒެއް ސަރުކާރުގެ ފަރާތުންވެސް އެހެން ބައެއްގެ ފަރާތުންވެސް ޕީޖީ އޮފީހަށް ކުރިމަތިނުވާ ކަމަށެވެ. އަދި ކިތަންމެ ވިޔާނުދާ މީހެއް ނަމަވެސް، އޭނާގެ މައްޗަށް ދައުވާ ކުރުމުގެ ކުރިން ނުވަތަ ބަންދު ކުރުމުގެ ކުރިން ބަލަންޖެހޭ ގާނޫނީ އިޖުރާއަތުތަކެއް ހުންނަކަން ޕީޖީ ފާހަގަ ކުރެއްވިއެވެ.
އެމީހުންގެ ވަނަވަރު އާންމުކޮށްފައި ނުވުމާއި ގުޅޭގޮތުން ޕީޖީ ވިދާޅުވީ، ފުލުހުން ވަނަވަރު އާންމު ކުރުމާމެދު އޮންނަ އުސޫލުގެ ދަށުން ކަންކަން ކޮށްފައިވާނަމަ އެކަމުގެ ތެރެއަށް ޕީޖީ އޮފީހުން ވަނުމުގެ ބޭނުމެއް ނެތް ކަމަށެވެ.
100 ކިލޯގެ މަސްތުވާތަކެތީގައި މައްސަލައިގައި ފުލުހުން ޖުމްލަ 10 މީހަކު ހައްޔަރުކުރިއެވެ. އެ މީހުންގެ ބަންދާ މެދު އެންމެ ފުރަތަމަ ގޮތެއް ނިންމުމަށް މިދިޔަ އޮކްޓޫބަރު 14 ވަނަ ދުވަހު ކޯޓަށް ހާޒިރުކުރުމުން އެ ދުވަހު ކޯޓުން ވަނީ ދެ މީހަކު ދޫކޮށްލާފައެވެ.
މި މައްސަލައިގައި ހައްޔަރުކުރި މީހުންގެ ތެރެއިން ވަނަވަރު ހާމަ ކޮށްފައިވަނީ 8 މީހެއްގެއެވެ. ހައްޔަރު ކުރި 10 މީހުންގެ ތެރެއިން ފުރަތަމަ ދޫކޮށްލި މީހުންގެ މައްސަލަ އިސްތިއުނާފް ކުރުމަށް ފުލުހުންގެ ފަރާތުން ޕީޖީގައި އެދުނު ނަމަވެސް މައްސަލަ އިސްތިއުނާފް ނުކުރުމަށް ޕީޖީ ވަނީ ނިންމަވާފައެވެ.
