ހިލޭ އެހީއާއި އަންދާޒާކުރާ އާމްދަނީ ލިބޭނެކަން ކަށަވަރުކުރުން މުހިއްމު - އޮޑިޓް އޮފީސް

ހިލޭއެހީއާއި އަންދާޒާކުރާ އާމްދަނީ ލިބޭނެކަން ކަށަވަރުކުރުން މުހިއްމު ކަމަށް އޮޑިޓް އޮފީން ބުނެފިއެވެ.

އަންނަ އަހަރަށް ދައުލަތުން ލަފާކުރާ ބަޖެޓް ދިރާސާ ކުރާ ކޮމެޓީގެ ބައްދަލުވުމުގައި އޮޑިޓަރ ޖެނެރަލް އޮފީހުން ވަނީ ބަޖެޓުގައި ހުރި ކަންބޮޑުވުންތައް މެމްބަރުންނާއި ހިއްސާ ކުރައްވާފައެވެ. އޮޑިޓް އޮފީހުން ބުނީ މިސަރުކާރުން ފައިތުވެދިޔަ ދެ އަހަރުގެ ބަޖެޓުގައި ހިލޭ އެހީގެ ގޮތުގައި ލިބޭނެކަމަށް އަންދާޒާކުރި ފައިސާގެ 50 އިންސައްތަ ލިބިފައި ނުވާކަމަށެވެ. އެހެންކަމުން ބަޖެޓުގައި ބޮޑު ބައެއް ހިލޭއެހީއާއި، ލިބޭނެކަމަށް އަންދާޒާކުރާ އާމްދަނީއަށް ބަރޯސާވެފައިވާއިރު އެލިބޭނެކަން ކަށަވަރު ކުރު ކުރުމަކީ މުހިންމު ކަމެއްކަމަށެވެ.

އަންނަ އަހަރަށް ދައުލަތުން ލަފާކުރި ބަޖެޓުގައިވެސް 2.9 ބިލިޔަން ރުފިޔާގެ ހިލޭ އެހީ ލިބޭނެކަމަށް ލަފާކުރާއިރު، ފާއިތުވެދިޔަ ދެ އަހަރުގައި ލިބޭނެކަމަށް އަންދާޒާކުރި ފައިސާގެ ދެބައިކޮށްފައި އެއްބައި ލިބިފައި ނުވާކަމަށެވެ. އަދި މިހާރު އޮތް ބަޖެޓަކީ ދަރަނި ބޮޑު ބަޖެޓަކަށްވުމުން އަންނަ އަހަރު ޚަރަދުތައް ކުރަންވާނީ ލަފާކުރާ ބަޖެޓް ލިބޭނެކަން ކަށަވަރު ކުރުމަށްފަހުކަމަށެވެ.

ދައުލަތުން ކުރާ ޚަރަދުތަކުގެ ތެރެއިން އެންމެބޮޑު ޚަރަދެއް ކުރަމުންދަނީ އާސަންދަ ސްކީމަށް ކަމަށް އޮޑިޓް އޮފީހުން ވަނީ ފާހަގަކޮށްފައެވެ. އާސަންދަ ސްކީމަށް އަަންނަ އަހަރަށްވެސް 730.9 މިލިޔަން ރުފިޔާ ބަޖެޓުގައި ހިމަނާފައިވެއެވެ. އާސަންދަ ސްކީމަށް ފާއިތުވެދިޔަ 3 އަހަރު އެވްރެޖްކޮށް 2.1 ބިލިޔަން ރުފިޔާ ޚަރަދުކޮށްފައިވާކަމަށާއި، މިއީ 300 މިލިޔަން ރުފިޔާގެ ދަރަނިކަމަށް އޮޑިޓް އޮފީހުން ބުނެއެވެ. އެހެންކަމުން އަންނަ އަހަރު އަސަންދަ ސްކީމަށް ޚަރަދު ކުރާއިރު މިފައިސާ ހޯދޭނެ ގޮތެއް ކަށަވަރު ނުވެއްޖެނަމަ އިތުރު 300 މިލިޔަން ރުފިޔާ އަނެއްކާވެސް ދަރަނިވެރިވާނެ ކަމުގެ ކަންބޮޑުވުން އޮޑިޓް އޮފީހުން ފާޅުކުރެއެވެ.