ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ހަމަލާއާ ގުޅިގެން ހައްޔަރު ކޮށްފައިވާ އއ މާޅޮސް އަސަރީގޭ މުހައްމަދު ނާޒިމްގެ މައްޗަށް އުފުލާފައިވާ ޓެރަރިޒަމާ ގުޅޭ އިތުރު ދައުވާގެ އަޑުއެހުމެއް އާދީއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި މުހައްމަދު ނާޒިމްގެ މައްޗަށް އުފުލާފައިވަނީ ޓެރަރިސްޓު ޖަމާއަތަކަށް ތާއީދު ކުރާ މީހެއްކަމަށް ދޭހަވާ ފަދަ ލިއުމެއް، ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާއެވެ. މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަކީލަކު އައްޔަން ކުރުމަށް 3 ދުވަހުގެ މުއްދަތެއް ވަނީ ދީފައެވެ. ނަމަވެސް އާދީއްތަ ދުވަހުގެ އަޑުއެހުމާ ހަމައަށްވެސް ވަކީލަކު އައްޔަން ކޮށްފައި ނުވާކަމަށް ކޯޓުން ބުނެއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހަސަން ސައީދެވެ.
މި މައްސަލައިގައި ދައުވާލިބޭ ނާޒިމް ބުނެފައިވަނީ ވަކީލާއި ލިއެކިއުންތައް ހަވާލު ކޮށްފައިވާ ކަމަށާއި، ވަކީލު ހަމަޖެހޭނެ ކަމަށް މައުލޫމާތު ލިބިފައިވާ ކަމަށެވެ. އަދި ވަކީލަށް ގުޅައި، ވީގޮތް ސާފު ކުރުމަށް އޭނާ ވަނީ ވަގުތުކޮޅަކަށް އެދިފައެވެ. ދައުލަތުންވެސް އެ ފުރުސަތު ދިނުމަށް އެދުމުން ގާޒީ ހަސަން ސައީދު އެ ފުރުސަތު ދެއްވިއެވެ.
ވަކީލަށް ގުޅުމަށް ކުރި މަސައްކަތް ކާމިޔާބު ނުވުމުން، އަޑުއެހުން އެހެން ދުވަހަކަށް ފަސް ކޮށްދިނުމަށް އޭނާ ވަނީ އެދިފައެވެ. ނަމަވެސް ގާޒީ ވަނީ ދައުލަތުންވެސް ވަކީލަކު ހަމަޖެއްސިދާނެ މައްސަލައެއްކަން ހަނދާން ކޮށްދެއްވާފައެވެ.
ދައުލަތުން ވަނީ އޭނާ އަމިއްލައަށް ވަކީލަކު އައްޔަން ކުރުމަށް ބޭނުންވާނަމަ އިތުރު ފުރުސަތެއް ދިނުމާމެދު އިއުތިރާޒު ނުކުރާކަން ފާހަގަ ކޮށްފައެވެ. ވުމާއެކު، ވަކީލަކާއެކު މައްސަލަ ކުރިއަށް ގެންދިއުމަށްޓަކައި، ވަކީލަކު އައްޔަން ކުރުމަށް 7 ދުވަހުގެ މުއްދަތެއް ދެއްވުމަށްފަހު ގާޒީ ވަނީ އަޑުއެހުން ނިންމަވާލައްވާފައެވެ.
ނާޒިމަކީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން ހައްޔަރުކުރި މީހެކެވެ. އެ މައްސަލައާ ގުޅިގެން ބޭއްވުނު އިބްތިދާއީ އަޑުއެހުމުގައި އޭނާ ވަނީ ދައުވާއަށް އިންކާރު ކޮށްފައެވެ. ދައުވާއަށް އިންކާރު ކުރުމުން ދައުލަތުން ވަނީ ޚުލާސާ ގޮތެއްގަައި ހެކިވެސް ހުށައަޅާފައެވެ.
