ހއ. އަތޮޅުން ފެށިގެން ދ. އަތޮޅަށް ވައިޓް އެލަރޓް ނެރެފި
ހުރިހާ ފަރާތްތަކުން، ވަކިން ޚާއްސަކޮށް ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށް ވަނީ އިލްތިމާސްކޮށްފައި
ވިލާގަނޑުގައި ގަޑިއަކު 40 މޭލަށް ވައިގަދަވުން އެކަށީގެންވޭ
ކަނޑުތައް ގަދަވާނެކަމަށް ލަފާކޮށް, ހއ. އަތޮޅުން ފެށިގެން ދ. އަތޮޅަށް ވައިޓް އެލަރޓް ނެރެފިއެވެ.
މޫސުމާބެހޭ ގައުމީ އިދާރާއިން ބުނީ, ހޮނިހިރު ދުވަހުގެ ރޭ 10:00ން ފެށިގެން އާދީއްތަ ދުވަހުގެ މެންދަމު 3:00 ޖެހުމާ ހަމައަށް އެސަރަހައްދަށް ވައިޓް އެލަރޓް ނެރޭ ކަމަށެވެ. މެޓް އޮފީހުން ބުނީ މިވަގުތުތަކުގައި އެސަރަހައްދަށް ގަޑިއަކު 22 މޭލާ 27 މޭލާ ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވޭކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވުން އެކަށީގެންވާކަމަށެވެ.
މީގެއިތުރުން މެޓް އޮފީހުން ބުނީ އާންމު ގޮތެއްގައި ރާއްޖޭގެ ކަނޑުތައް ގަދަވާނެކަމަށެވެ. އެހެންކަމުން ހުރިހާ ފަރާތްތަކުން، ވަކިން ޚާއްސަކޮށް ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
މޫސުމާބެހޭ ގައުމީ އިދާރާއިން ހޮނިހިރު ދުވަހުގެ ހެނދުނު ވެސް ވަނީ މި ސަރަހައްދަށް ވައިޓް އެލަރޓް ނެރެފައެވެ. އަދި އެއަށްފަހު ޔެލޯ އެލަރޓް ނެރުމަށްފަހު އަނެއްކާވެސް އެލަރޓްގެ މުއްދަތު ހަމަވުމުން މިވަނީ ވައިޓް އެލަރޓް ނެރެފައެވެ.
ރާއްޖެއަށް ވިއްސާރަ ކުރަމުންދަނީ ބޭ އޮފް ބެންގާލްގެ ހުޅަނގު ދެކުނުގައި އުފެދިފައިވާ ކޮޅިގަނޑުގެ ސަބަބުންނެވެ. އަދި ވޭތުވެދިޔަ 3 ދުވަހު މޫސުން ވަރަށް ބޮޑަށް ގޯސްވި އިރު، ކުޑަ ޑިންގީއެއް ބަންޑުންޖަހާލި ހާދިސާއެއް ވަނީ ހިނގާފައެވެ.
