ކޮމަންޑޫ ނެރުމައްޗަށް ދޯންޏެއް އަޑިއަށް ހިނގައްޖެ
ދޯނި ނެރު ފައިކަށްޓަށް އަރާފައި ވަނީ ހުކުރު ދުވަހުގެރޭ 07:30 ހާއިރު
ށ.ކޮމަނޑޫ
ށ. ކޮމަންޑޫއަށް މުދާ ހިފައިގެން ދަތުރުކުރި ދޯންޏެއް އެރަށު ނެރުގެ ފައިކައްޓަށް އެރުމާގުޅިގެން އެދޯނި ފެތިއްޖެއެވެ.
މިހާދިސާގައި ފެތިފައިވަނީ ކޮމަންޑޫއަށް މުދާ އުފުލާ އެރަށު 'މަހުރޯދި' ނަމަކަށް ކިޔާ ދޯންޏެކެވެ. ނެރުގެ ފައިކަށްޓަށް ދޯނި އަރާފައި ވަނީ ހުކުރު ދުވަހުގެރޭ 07:30 ހާއިރުއެވެ. މިހާދިސާ ހިނގީ މާލެއިން މުދާ ހިފައިގެން ކޮމަންޑޫއަށް ގޮސް ނެރުން ވަންނަން އުޅުމުގެ ތެރޭގައެވެ.
ދޯނި ފެތުނީ ވިއްސާރަވުމާއެކު ރާޅު ބޮޑުވުމުގެ ސަބަބުން ކަމަށް ކޮމަންޑޫ ކައުންސިލްގެ ރައީސް މުހައްމަދު ސިނާން ރާއްޖެ އެމްވީއަށް ވިދާޅުވިއެވެ.
މިހާދިސާ ހިނގިއިރު ދޯނީގައި ގާތްގަނޑަކަށް ހަތަރު ލައްކަ ރުފިޔާގެ މުދާ ހުންނާނެ ކަމަށް ސިނާން ވިދާޅުވިއެވެ. ދޯނީގައި ތިބީ ހަތަރު މީހުންނެވެ. އެއިން މީހަކަށް ޖިސްމާނީ އަނިޔާއެއް ނުވާކަމަށާއި އެމީހުން މިހާރު ކޮމަންޑޫއަށް އަރާފައިވާ ކަމަށް މައުލޫމާތު ލިބެއެވެ.
ރަށުގެ ރައްޔިތުން ނުކުމެ ދޯނީގައި ހުރި މުދާ ރަށަށް އެރުވުމުގެ މަސައްކަތް މިހާރު ކުރަމުން އަންނަ ކަމަށް ވެސް ކައުންސިލްގެ ރައީސް ސިނާން ވިދާޅުވިއެވެ.
