9 މީޓަރަށްވުރެ ކުދި އުޅަނދުފަހަރުގައި ދަތުރުކުރާއިރު ލައިފް ޖެކެޓު އެޅުން މަޖުބޫރުވާގޮތަށް ލައިފްޖެކެޓް އެޅުމާ ބެހޭ ގަވައިދަށް އިސްލާހު ގެނެސްފިއެވެ.

ރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާ ބެހޭ ގަވައިދަށް ދެވަނަ އިސްލާހު ގެނެސް މިހާރު ވަނީ މި ގަވައިދަށް އަމަލުކުރަން ފަށާފައެވެ.

މިގޮތުން މޫސުމީ ސަމާލު ނެރެފައިވާ ސަރަޙައްދެއްގައި ދަތުރުކުރާނަމަ، އެ ސަރަޙައްދެއްގައި އެ ދަތުރެއް ފެށުމުގެ ކުރިން، މޫދު ކުޅިވަރަށް ރަޖިސްޓަރީ ކޮށްފައިވާ އުޅަނދުފަހަރާއި މުނިފޫހިފިލުވުމަށް ރަޖިސްޓަރީ ކޮށްފައިވާ އުޅަނދުފަހަރުގެ ތެރެއިން 9 މީޓަރަށްވުރެ ކުދި އުޅަނދުފަހަރު ދުއްވާނަމަ، އެ ދަތުރެއް ފެށުމުގެ ކުރިން ލައިފްޖެކެޓު އަޅަންޖެހޭނެ ކަމަށް ގަވައިދުގައި ވެއެވެ.

އާންމު ދަތުރުފަތުރުގެ ގޮތުގައި ފެރީގެ ޚިދުމަތް ދިނުމަށާއި، މީހުން އުފުލާ ހުރިހާ އުޅަނދުފަހަރުގައި ލައިފްޖެކެޓް ފަސޭހައިން ބޭނުންކުރެވޭގޮތަށް ބަހައްޓަން ވާނެ ކަމަށް ގަވައިދުގައި ވެއެވެ. އަދި އުޅަނދު ފުރުމުގެ ކުރިން ލައިފްޖެކެޓް ބޭނުންކުރާނެ ގޮތުގެ މައުލޫމާތު ފަސިންޖަރުންނަށް ފޯރުކޮށްދޭންވާނެ ކަމަށާއި، ދަތުރުމަތީގައި އެއްވެސް ބޭނުމެއްގައި ނޫނީ އެއްވެސް ހާލަތެއް މެދުވެރިވެގެން ފަސިންޖަރު ނުވަތަ ފަޅުވެރިން އުޅަނދުގެ ގެ ގަނޑުން ބޭރަށް ނުކުންނަންޖެހޭ ވަގުތުތަކުގައި ބޭރަށް ނުކުންނަންވާނީ ލައިފްޖެކެޓް އަޅައިގެން ކަމަށް ގަވައިދުގައިވެއެވެ.

އަދި މޫދުގައި އަޅާފައި ބާއްވައިގެން އޮޕަރޭޓްކުރާ އުޅަނދުފަހަރާއި، ދަތުރެއްގެ މަތީގައި ނަގިލި ލައިފައި ބާއްވައިގެން އޮޕަރޭޓްކުރާ އުޅަނދުފަހަރުގައި ތިބޭ ފަސިންޖަރުންނާއި ފަޅުވެރިންނަށް ހުރިހާ ވަގުތެއްގައި ލައިފްޖެކެޓް ފަސޭހައިން ލިބޭނެގޮތަށް އުޅަނދުގައި ހަމަޖެހިފައި ހުންނަން ވާނެކަމަށް ގަވައިދުގައި ވެއެވެ. އަދި އަޅާފައި ބާއްވައިގެން އޮޕަރޭޓްކުރުމުގައި، އޮރެންޖް އަދި ރެޑް ސަމާލު ނެރެފައިވާ ވަގުތުތަކުގައި އެއްވެސް ބޭނުމެއްގައި ނޫނީ އެއްވެސް ހާލަތެއް މެދުވެރިވެގެން ފަސިންޖަރު ނުވަތަ ފަޅުވެރިން އުޅަނދުގެ ގެ ގަނޑުން ބޭރަށް ނިކުންނަން ޖެހޭ ވަގުތުތަކުގައި ބޭރަށް ނުކުންނަންވާނީ ލައިފްޖެކެޓް އަޅައިގެން ކަމަށް ގަވައިދުގައި ވެއެވެ. މި ހާލަތްތަކުގައި ފަސިންޖަރުން ލައިފް ޖެކެޓް އެޅުވުމާއި، ލައިފްޖެކެޓް އަޅާނެ ގޮތުގެ މަޢުލޫމާތު ފޯރުކޮށްދިނުމަކީ ކެޕްޓަންގެ ޒިންމާއެއް ކަމަށް ގަވައިދުގައި ބުނެފައިވެއެވެ.

މީގެ އިތުރުން ކަނޑުގައި ދުއްވާ އުޅަނދުފަހަރުގެ ސާވޭ ފީ ނެގުމާއި ގުޅޭގޮތުން ގަވައިދުގައި ވަނީ ރަޖިސްޓަރީ ކޮށްގެން ދުއްވާ ދަގަނޑު، އެލްމިނިއަމް ނުވަތަ މައުދަނުން ބަނދެފައި ހުންނަ އުޅަނދުފަހަރުގެ ތެރެއިން, 24 މީޓަރުން ފެށިގެން ދިގު އުޅަނދުފަހަރު ނުވަތަ 100 ގްރޮސް ޓަނޭޖަށްވުރެ ބޮޑެތި އުޅަނދުފަހަރުން ފެށިގެން 99.34 މީޓަރު ނުވަތަ 299 ގްރޮސް ޓަނޭޖާ ހަމަވާ އުޅަނދުފަހަރުގެ ސަރވޭ ފީ އަކީ 500 ރުފިޔާއެވެ. އަދި 35 މީޓަރުން ފެށިގެން ދިގު އުޅަނދުފަހަރު ނުވަތަ 300 ގްރޮސް ޓަނޭޖަށްވުރެ ބޮޑެތި އުޅަނދުފަހަރުގެ ސަރވޭ ފީ އަކީ 1،000 ރުފިޔާއެވެ. އަދި މިފަދަ އުޅަނދުފަހަރަށް ދޫކުރާ ސެޓުފިކެޓުތަކުގެ ތެރެއިން ނޭޝަނަލް ޓަނޭޖް ސެޓުފިކެޓު ފިޔަވައި އެހެނިހެން ސެޓުފިކެޓުތަކުގެ ފީ އަކީ ކޮންމެ ސެޓުފިކެޓަކަށް 1500 ރުފިޔާ ނަގާނެ ކަމަށް ގަވައިދުގައި ވެއެވެ.

މީގެ އިތުރުން ރަޖިސްޓަރީ ކޮށްގެން ދުއްވާ ދަގަނޑު، އެލްމިނިއަމް ނުވަތަ މައުދަނުން ބަނދެފައި ހުންނަ އުޅަނދުފަހަރުގެ ތެރެއިން ދިގުމިނުގައި 35 މީޓަރު ހަމަވާ އުޅަނދުފަހަރު ނުވަތަ 300 ގްރޮސް ޓަނޭޖު ހަމަވާ އުޅަނދުފަހަރަށް ނޭޝަނަލް ޓަނޭޖް ސެޓުފިކެޓު ފިޔަވައި ދޫކުރާ އެހެނިހެން ސެޓުފިކެޓުތަކުގެ ފީ އަކީ ކޮންމެ ސެޓުފިކެޓަކަށް 1500 ރުފިޔާކަމަށް ގަވައިދުގައި ބުނެފައިވެއެވެ. ނޭޝަނަލް ޓަނޭޖް ސެޓުފިކެޓުގެ ފީ އަކީ އެ އުޅަނދުގެ ރަޖިސްޓަރީގައި ބަޔާން ކޮށްފައިވާ ގްރޮސް ޓަނޭޖުގެ ކޮންމެ ގްރޮސްޓަނަކަށް 1 ރުފިޔާއެވެ. މި ގަވާއިދަކީ ނޭޝަނަލް ސަރޗް އެންޑް ރެސްކިއު ކޮމިޓީގެ ލަފަޔާއެކު އެކުލަވާލާފައިވާ ގަވާއިދެކެވެ.

މިފަހުން ކަނޑުމަތީގެ ހާދިސާތައް އިތުރުވެގެން ދިއުމާއެކު، ލައިފް ޖެކެޓު ގަވާއިދުގެ ވާހަކަތައްވެސް ފެންމަތިވެގެން ދިޔައެވެ. އެގޮތުން މޫސުން އިންތިހާއަށް ގޯސްވެ، ދަތުރުފަތުރުގެ ސަމާލުތައް ނެރެފައި އޮއްވައި ކަނޑުމައްޗަށް ނުކުތް ލޯންޗެއްގައި ތިބި ބަޔަކު ކަނޑަށް ވެއްޓުނު ޙާދިސާގައި 33 އަހަރުގެ އަންހެނަކު މަރުވެފައިވާއިރު، އޭނާގެ ތުއްތު ދަރިފުޅު އަދިވެސް ނުފެނެއެވެ. އެއީ އުމުރުން އެންމެ 4 އަހަރުގެ ކުއްޖެކެވެ.