މޭ6ގެ ހަމަލާއާ ގުޅިގެން ރައީސް ނަޝީދު އައްޔަން ކުރެއްވި އނގިރޭސިވިލާތުގެ ވަކީލު ކާރސްޓީ ބްރިމްލޯ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާ ބައްދަލުކުރައްވައިފިއެވެ.

މުލިއާގޭގައި އޮތް މި ބައްދަލުކުރެއްވުމަށް ފަހު ބްރިމްލޯ ކުރެއްވި ޓްވީޓެއްގައި ވިދާޅުވީ، ރައީސްއާ ބައްދަލުކުރެއްވީ ދިވެހި ރައްޔިތުންނާއި އޭނާގެ މުވައްކިލު ރައީސް ނަޝީދާ ދެކޮޅަށް ހިންގާ ޓެރަރިޒަމްގެ އަމަލުތަކާ ގުޅޭގޮތުންނާއި މޭ6 ވަނަ ދުވަހު ނަޝީދު އަވަހާރަކޮށްލަށް ދިން ހަމަލާއާ ގުޅޭ ގޮތުން މަޝްވަރާކުރުމަށް ކަމަށެވެ.

ނަޝީދުގެ ވަކީލް ވަނީ ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲ އާއި، އެމްޑީޕީގެ ޗެއާރޕާސަން ހަސަން ލަތީފާވެސް ބައްދަލު ކުރައްވާފައެވެ. އަދި މޭ6ގެ ހަމަލާގެ ކަންކަން ބެލުމަށް އެމްޑީޕީން އެކުލަވާލި ކޮމިޓީގެ މެމްބަރުންނާ ވެސް ވަކިވަކިން އޭނާވަނީ ބައްދަލުކުރައްވާފައެވެ.

އިންސާނީ ހައްގުތަކާއި ޖިނާއީ މައްސަލަތަކަށް ހާއްސަ ވަކީލު ބްރިމްލޯ އަކީ އިނގިރޭސިވިލާތުގެ ޕްރިސްޓީޖިއަސް ކުއީންސް ކައުންސިލްގެ މެމްބަރެކެވެ.

ނަޝީދުގެ އަނެއް ވަކީލަކީ އެމަނިކުފާނުގެ ކޮއްކޯފުޅު އަލްއުސްތާޒް ނާޒިމް އަބްދުއްސައްތާރެވެ. ހަމަލާއާ ގުޅިގެން ޖަރުމަންގައި ފަރުވާ ހޯއްދެވުމަށްފަހު އިތުރު ފަރުވާއަށް އިނގިރޭސި ވިލާތުގައި ރައީސް ނަޝީދު ހުންނަވައި ވަކީލަކަށް ނާޒިމް ހަމަޖެއްސެވީ އެމަނިކުފާނުގެ ބަޔާނެއް މުހިއްމު ކަމަށް ފުލުހުންނާއި ޕީޖީން ބުނުމުންނެވެ. ނަޝީދު ވަނީ ބަޔާން ދެއްވަން ތައްޔާރުކަމަށާއި، ތުހުމަތުކުރެވޭ މީހުންގެ ޝަރީއަތްތަކުގެ އިބްތިދާއީ މަރުހަލާ ނިމުމުގެ ކުރިން ބަޔާން ނެންގެވުމަށް އެދިވަޑައިގެންފައެވެ.

ރައީސް ނަޝީދަށް އަމާޒުކޮށް ދިން ހަމަލާއާ ގުޅުންހުރި 10 މީހަކު ހައްޔަރުކޮށް އެމީހުންގެ މައްޗަށްވަނީ ދައުވާ އުލާފައެވެ. އެމީހުންގެ ޝަރީއަަތްތައް ވެސް ކްރިމިނަލް ކޯޓުގައި ވަނީ ފަށާފައެވެ.