"އަދުލުވެރިކަން ނެތް އެއްވެސް މުޖުތަމައެއްގައި ހެޔޮކަމެއް ނޯންނާނެ"
12 ނޮވެމްބަރު 2021 | ހުކުރު 08:08ހެޔޮލަފާ މުޖުތަމައެއް ބިނާކުރުމަށް ރާއްޖެއިން ގިނަ މަސައްކަތްތަކެއް ކުރަންޖެހޭ
ހުކުރު ޚުތުބާ
ދިވެހިރާއްޖޭގައި ހެޔޮލަފާ މުޖުތަމައެއް ބިނާކުރެވޭނީ މުހިންމު ރުކުންތަކެއް ފުރިހަމަވެގެންކަމަށް މިއަދުގެ ހުކުރު ޚުތުބާގައި ބުނެފިއެވެ.
"ހެޔޮލަފާ މުޖުތަމައެއް ބިނާކުރުން" މި މައުލޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ބުނީ ދިވެހިރާއްޖެއަށް މިއަދު މިވަނީ، ހެޔޮ ލަފާ މުޖުތަމައެއް ބިނާކުރުމަށާއި، ތަރައްގީއާއި، ތަހުޒީބުގެ އައު އުސްމިންތަކަށް ވާސިލްވުމަށްޓަކައި، ގިނަގުނަ މަސައްކަތްތަކެއް ކުރަން ޖެހިފައި ކަމަށެވެ.
މި މަސައްކަތްތައް ކާމިޔާބީއާ ހަމައަށް ގެންދެވޭނީ މުހިންމު ރުކުންތަކެއް ފުރިހަމަވެގެން ކަމަށާއި، އޭގެ ތެރެއިން އެންމެ މުހިންމު ރުކުންތަކަކީ، އަދުލުވެރިވުމާއި، އިންސާފު ގާއިމުކުރުމާއި، ހެޔޮކަންކަމަށް އަމުރުކުރުމާއި، ނުބައިކަންތައްތައް ނަހީކުރުން ކަމުގައި ޚުތުބާގައި ބުނެފައިވެއެވެ. އަދުލުވެރިކަން ނެތް އެއްވެސް މުޖުތަމައެއްގައި ހެޔޮކަމެއް ނޯންނާނެ ކަމަށާއި، އިންސާފާއި ހަމަހަމަކަން ނެތް މުޖުތަމައެއްގައި ސުލްހަވެރިކަމެއް ނޯންނާނެކަމަށް ޚުތުބާގައި ބުނެފައިވެއެވެ. ހެޔޮ ކަންކަމަށް އަމުރުކޮށް ނުބައި ކަންކަން ހުއްޓުވުމަކީ އިސްލާމީ މުޖުތަމައެއްގެ އެންމެ އިސް ރުކުން ކަމުގައި ޚުތުބާގައި ބުނެފައިވެއެވެ.
މީގެ އިތުރުން މުންކަރާތްތައް މަނާކުރާއިރު މީހުން ބަދުނާމުކޮށް، އެމީހުންގެ އާއިލާއަށް މަލާމާތް ރައްދުކޮށް، ފަޟީހަތްކުރުމަކީ، ކީރިތި ރަސޫލާ މަނާކުރައްވާފައިވާ ކަންކަން ކަމުގައި ޚުތުބާގައި ބުނެފައިވެއެވެ. ކުށަކަށް އަރައިގަންނަ މީހާއަށް މަލާމާތްކުރުމުގެ ބަދަލުގައި އެމީހުންނަށް ރަނގަޅަށް ތަރުބިއްޔަތުކޮށް އެމީހުންނަށް ރަނގަޅު މުސްތަގުބަލެއް ހޯދައިދޭން މަސައްކަތް ކުރަން ޖެހޭނެކަމަށް ކީރިތި ރަސޫލާ ނަސޭހަތްތެރިވެލައްވާކަމަށް ޚުތުބާގައި ބުނެފައިވެއެވެ.
މި ހަދީސްގައިވާފަދައިން ހެޔޮލަފާ ސުލްހަވެރި ޒުވާނުން ބިނާކުރުމުގައި ކޮންމެ މީހަކު ވެސް އެމީހެއްގެ މަސްއޫލިއްޔަތު އަދާކުރަންޖެހޭކަމަށް ޚުތުބާގައި ބުނެފައިވެއެވެ. އަދި އިސްލާމީ އުންމަތް ހެޔޮގޮތުގައި ބިނާވެގެން ދިއުމުގެ އަސްލަކީ މުސްލިމުން އެބައިމީހުންގެ ދަރިން ތަރުބިއްޔަތު ކުރުމަށް ދިން ސަމާލުކަން ކަމުގައި ޚުތުބާގައި ވަނީ ބުނެފައެވެ.
