އެރައިސް މަޝްރޫއާއެކު ހިންނަވަރުގައި ކޮންމެ އަހަރަކު ތެލަށް ކުރާ ޚަރަދު ކުޑަކުރެވޭނެ
2.4 މިލިއަން ޔުނިޓް ކަރަންޓު ސޯލަރ ހަކަތައިން އުފެދޭނެ
ޅ. ހިންނަވަރު
އެރައިސް މަޝްރޫއުގެ ދަށުން ޅ. ހިންނަވަރުގައި ގާއިމުކުރާ ސޯލަރ ހަކަތައިގެ ނިޒާމުގެ ސަބަބުން ތެލަށް ކުރާ ހޭދައިން 5.3 މިލިއަން ރުފިޔާ ކުޑަކުރެވޭނެ ކަމަށް އެންވަޔަރުމަންޓް މިނިސްޓްރީއިން ބުނެފިއެވެ.
އެންވަޔަރުމަންޓް މިނިސްޓްރީއިން ބުނެފައިވަނީ، މި މަޝްރޫއުގައި މިހާރު ކުރިއަށް ދަނީ ބީލަމުގެ މަރުހަލާ ކަމަށެވެ. މި މަޝްރޫއުގައި ކުރުމަށް ފްލޭން ކޮށްފައިވާ މަސައްކަތްތަކުގެ ތެރޭގައި، 1.5 މެގަވޮޓް ސޯލަރ ޕީވީގެ ނިޒާމުގާއިމުކުރުމާއި، 1 މެގަ ވޮޓްގެ ބެޓަރީ އެނަރޖީ ސްޓޯރޭޖް ސިސްޓަމް ޤާއިމުކުރުމާއި، ކަރަންޓު ވިއުގަ އަޕްގްރޭޑް ކުރުން ހިމެނެއެވެ.
މީގެ އިތުރުން، މި މަޝްރޫއުގެ މަސައްކަތްތައް ނިމުމުން، 2020 ވަނަ އަހަރުގެ ޕީކް ޑިމާންޑްގެ 188 އިންސައްތަ ރަށުގެ ޕީކް ލޯޑް ސޯލަރ ހަކަތައިން ދެވޭނެ ކަމަށް އެންވަޔަރުމަންޓް މިނިސްޓްރީއިން ބުނެފައިވެއެވެ. އަދި 2.4 މިލިއަން ޔުނިޓްގެ ކަރަންޓު ސޯލަރ ހަކަތައިން އުފެދޭނެ ކަމަށާއި، 6.6 ލައްކަ ލީޓަރުގެ ތެޔޮ މަދުކުރެވޭނެ ކަމަށް ވެސް ބުނެފައިވެއެވެ.
މީގެ އިތުރުން، 5.3 މިލިއަން ދިވެހިރުފިޔާ ތެލަށްކުރާ ޚަރަދު ދައުލަތުގެ ބަޖެޓުން ކުޑަ ކުރެވޭނެ ކަމަށް ވެސް އެންވަޔަރުމަންޓް މިނިސްޓްރީއިން ބުނެއެވެ.
މި މަޝްރޫއުގެ ދަށުން ޖައްވަށް ދޫކުރާ ވިހަ ގޭހުން 1732 މެޓްރިކް ޓަން ދަށްކުރެވޭނެއެވެ. އަދި މިއީ 69،280 ގަހުން އަހަރަކަށް ދައްކޮށްދޭ ކާބަންއާ އެއްވަރުގެ އަދަދެކެވެ.
އެކްސަލަރޭޓިންގ ރިނިއުވަބަލް އެނަރޖީ އިންޓެގްރޭޝަން އެންޑް ސަސްޓެއިނަބަލް އެނަރޖީ (އެރައިސް) މަޝްރޫޢު މައިގަނޑު ބޭނުމަކީ ރާއްޖޭގައި ބޭނުން ކުރެވޭ އިއާދަކުރަނިވި ހަކަތައިގެ ނިސްބަތް އިތުރުކޮށް، ރަށްރަށުގެ ކަރަންޓު ވިއުގަތައް ޒަމާނީ ފެންވަރަށް ތަރައްޤީކުރުން ކަމަށް އެންވަރުމަންޓް މިނިސްޓްރީން ބުނެފައިވެއެވެ.
