ޖިންސީ ގޯނާ އާންމުވެ، ސްކޫލްތަކުގެ އިންފާރުން އެތެރެއަށް!
6 ނޮވެމްބަރު 2021 | ހޮނިހިރު 07:32ގަދަރުވެރި މަގާމުތަކުގައި ތިބޭ މީހުންގެ ފަރާތުން ކުޑަކުދިން ޖިންސީ ގޯނާއަށް ހުށަހެޅިގެންދާ މިންވަރު ވަނީ އިތުރުވެފައި
ކުޑަކުދިންނަށް ޖިންސީ ގޯނާކުރުން
ޖިންސީ ގޯނާ އަކީ އަބަދުވެސް އަޑުއިވޭ ވާހަކައެކެވެ. އުމުރުން ކިތަންމެ ހަނގަސް ދޮއްޓަސް މިކަމުގެ ޝިކާރައަކަށްވާ މީހުންގެ އަދަދު އަންނަނީ ދުވަހެއް ދުވަހަކަށް އިތުރުވަމުންނެވެ.
ފުލުހުންނަށް ހުށަހެޅޭ މައްސަލަތަކުގެ ނިސްބަތަށް ބަލާލިޔަސް ޖިންސީ ގޯނާގެ މައްސަލަތައް ގިނައެވެ. މިހާރު މި ވާހަކަތަކުގެ އަޑު ގަދަވެފައިވާއިރު ކުރީ ޒަމާނުގައި ޖިންސީ ގޯނާގެ ވާހަކަތައް ދެއްކުމާއި އާންމުންނަށް އެނގުމަކީ އާއިލާގެ އަގުވެއްޓި ބޭޒާރުވާކަމެއްގެ ގޮތުގައި ގިނަ މީހުން ހީކުރިއެވެ. ނަމަވެސް ޒަމާން ބަދަލުވެ މިއަދު މިވާހަކަތައް ދައްކާ މިންވަރު ވަނީ އިތުރުވެފައެވެ. މިއަދު ބަސްބުނާ މީހުން އެ ބަސް ބުނަނީ، އިންސާފު ލިބޭނެކަމުގެ އުންމީދުގައެވެ. އެމީހެއްގެ އަމިއްލަ ނަފްސަށް ލިބުނު އަނިޔާތަކަށް އިންސާފު ހޯދުމަށެވެ. މި ބިރުވެރިކަމުން ސަލާމަތްވެ، ކުށްކުރި މީހާއަށް ހައްގު އަދަބު ދިނުމުގެ އުންމީދުގައެވެ.
ޖިންސީ ގޯނާގެ ޝިކާރަޔަކަށް ވަމުންދާ ގިނަ މީހުން މިއަދު މިކަމަށް ހޭލުންތެރިއެވެ. އެފަދަ އަމަލެއް ހިންގައިފިނަމަ އެންމެ ކުޑަ ކުއްޖާއަށް ވެސް އެއީ ގޯސްކަމެއްކަން އެނގޭ ވަރަށް ކުދިންގެ ހޭލުންތެރިކަން ވެސް އިތުރުވެއްޖެއެވެ.
މިއަދު މިވަނީ ކުއްޖާއަށް ރިވެތި އަޚުލާގާއި އުޅުން ދަސްކޮށްދޭން ތިބި ބައެއް މީހުންގެ ފަރާތުން މިފަދަ ހަޑިމުޑުދާރު އަމަލުތައް ފެންނަން ފަށާފައެވެ. މައިންބަފައިން ނަގާފައި ކުއްޖާގެ ދެވަނަ މަންމަ ނުވަތަ ބައްޕައަކަށް މިވަނީ އެކުއްޖާ ތައުލީމު ހާސިލް ކުރަންމުންދާ ތަނެއްގައި ތިބޭ މީހުންނެވެ. މިއަދު ޚަބަރުތަކުގެ ފަލަސުރުޚީން ފެންނަމުން މިދަނީ އަޑު އަހަން ފަސޭހަ ވާހަކަތަކެއް ނޫނެވެ. އަޑު އަހަން އުނދަގޫ ވާހަކަތަކެކެވެ. އެ ވާހަކައެއް އަޑުއިވުމުން، އެފަދަ ކުއްޖަކާ ދޭތެރޭގައި މިހާ ބޮޑު އިހުމާލެއް ވުމަށް ދޫކޮށްލި މީހުންނަށް ހިތް ނަފްރަތު ކުރާ ކަހަލަ ވާހަކަތަކެކެވެ.
ގަދަރުވެރި މަގާމުތަކުގައި ތިބޭ މީހުންގެ ފަރާތުން ކުޑަކުދިން ޖިންސީ ގޯނާއަށް ހުށަހެޅިގެންދާ މިންވަރު މިވަނީ އިތުރުވެފައެވެ. ހާލަތު މިއޮތީ އިތުބާރު ކުރަންވީ ކާކަށް ކަމެއް ނުވަތަ ނޫންކަމެއް ނޭނގޭ ހިސާބުގައެވެ. ދާދިފަހުން އެންމެ ބޮޑަށް އާންމުވެގެން ދިޔަ އެއް ވާހަކަ އަކީ މާލެ ސަރަހައްދުގެ ސްކޫލެއްގައި ކުޑަ އަންހެން ކުއްޖަކަށް ޖިންސީ ގޯނާ ކުރި ވާހަކައެވެ. މިފަދަ ކަމެއް ތަނެއްގެ ތެރޭގައި ހިނގާނީ އެތައް ބައެއްގެ އިހުމާލުންނެވެ. އެ އިހުމާލަށް ފަސް އަޅާ ފޮރުވަން މަސައްކަތް ކުރާ މަންޒަރު ފެނިގެންދެއެވެ. އެހެންނަމަވެސް އެތަނަކުން އެވީ ކަމަކަށް ޒިންމާ ނަގައި ކަން ހިނގައިދިޔަ ގޮތަށް ޖަވާބުދާރީ ވެސް ވާން ޖެހޭނެއެވެ. އެހެންނަމަވެސް ގިނަފަހަރަށް މިފެންނަނީ އެ މަންޒަރެއް ނޫނެވެ. މައްސަލަ އޮއްބުމަށް މަސައްކަތް ކުރާ ތަނެވެ. ވީކަމެއް ނުވާކަމަކަށް ހެދުމަށް އެކި ބަހަނާތައް ދައްކާ މަންޒަރެވެ.
މައިބަފައިން ދަރިން ސްކޫލަށް ފޮނުވަނީ އެ ސްކޫލަކަށް ނުހަނު އިތުބާރު ކުރުމަށްފަހުގައެވެ. އެ މައިންބަފައިން ވެސް ދަރިން ގެންގުޅޭހާ ލޯބިން، ހިތްހެޔޮކޮށް ހިތާނެ ކަމުގެ އުންމީދުގައެވެ. އެކުދިންނަށް ކުޑަވެސް އަނިޔާއެއް ލިބުމަށް ނޭދޭކަމަށް ދެކިގެންނެވެ. އެހެން ނަމަވެސް ކުޑަކުދިންނަށް ވެވޭ މިފަދަ އިހުމާލުތަކުން، މައިންބަފައިންގެ އިތުބާރު ގެއްލެނީއެވެ. ކުދިން ސްކޫލަށް ފޮނުވުމަށް ވެސް ޖެހިލުންވަނީއެވެ. އަމިއްލަ ދަރިފުޅުގެ ސަލާމަތާއި ރައްކާތެރިކަމަށް ބިރު ގަންނަނީއެވެ. ޖިންސީ ގޯނާ އާންމުވެ، ސްކޫލްތަކުގެ އިންފާރުން އެތެރެއަށް ވަދެފައިވާއިރު ޖިންސީ ގޯނާގެ ޝިކާރައަކަށް އަމިއްލަ ދަރިފުޅު ވާނީ ކޮންއިރަކު ބާއޭ ހިތަށް އަރާ މައިންބަފައިން މިހާރު މަދެއް ނޫނެވެ.
މާލެ ސަރަހައްދުގެ ސްކޫލެއްގައި ހިނގި މި ހާދިސާ ތަހުގީގު ކުރަމުންދާ ކަމަށް ފުލުހުން ބުނެފައިވާއިރު ގިނަ ފަހަރަށް މިފަދަ މައްސަލަތައް "ތަހުގީގު" ގެ މަރުހަލާގައި އޮންނަތާ އެތައް އަހަރުތަކެއްވާނެއެވެ. ކުށްކުރި މީހާ މުޖުތަމައުއަށް ދޫވެ، މިފަދަ އެހެން އަމަލުތައް ވެސް ހިންގަމުންދާއިރު މައްސަލަ އަދިވެސް އޮންނަނީ ބަލަމުންދާ މައްސަލައެއްގެ ގޮތުގައެވެ. މިއީ ހިތަމާވެރިކަމެކެވެ. މިފަދަ މައްސަލަތަކަށް ހަލުވި މިނެއްގައި އިންސާފު ލިބެން އެބަޖެހެއެވެ.
