ދީނާ ޚިލާފު ފިކުރުތައް ފެތުރުމަށް ފައިސާއާއި ސިޔާސީ ނުފޫޒު ބޭނުންކުރޭ : ޚުތުބާ
މުސްލިމުންގެ ހިތްތަކުގައި އިސްލާމްދީނާ މެދު ޝައްކު އުފެއްދުމަށް މިއަދު ވެސް މަސައްކަތް ކުރޭ
އިސްލާމީ މަރުކަޒުގައި ޖަމާއަތް ހަދައިގެން،
އިސްލާމް ދީނާ ޚިލާފު ފިކުރުތައް ފެތުރުމަށް ގިނަ އަދަދެއްގެ ފައިސާއާއި، ސިޔާސީ ނުފޫޒު ބޭނުންކުރާ ކަމަށް ހުކުރު ޚުތުބާގައި ބުނެފިއެވެ.
''އިސްލާމް ދީނުގެ މަތިވެރި ނިއުމަތް'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އިސްލާމް ދީނުގެ އަދުއްވުން މިއަދު ވެސް މަސައްކަތް ކުރަމުންދަނީ، އިސްލާމް ދީނުގެ އަގީދާ ބަލިކަށިކޮށް މުސްލިމުންގެ ހިތްތަކުގައި އިސްލާމްދީނާ މެދު ޝައްކު އުފެއްދުމަށް ކަމަށެވެ. ޚުތުބާގައި ބުނީ އިސްލާމް ދީނާ ޚިލާފު ފިކުރުތަކުގެ އަހުލުވެރިން، މުސްލިމުންގެ ހިތްތަކަށް ވެރިވެގަތުމަށް ގިނަ އަދަދެއްގެ ފައިސާއާއި، ސިޔާސީ ނުފޫޒާއި މިނިވަންކަމުގެ ޝިއާރުތައް ބޭނުންކޮށް، އެމީހުންގެ ދީނަކީ ވަރަށް އޯގާތެރި ދީނެއްކަން މުސްލިމުންނަށް ދައްކާ ކަމަށެވެ. އެފަދަ މީހުންނަކީ ހަރުކަށިކަން އިންތިހާއަށް އިސްކުރާ ބައެއްކަން ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ މިހާރަކަށް އައިސް ސައްތައިން ސައްތަ މުސްލިމް ގައުމުގެ ބައެއް މީހުންގެ ފުށުން، އިސްލާމް ދީނާ ދެކޮޅު އަމަލުތައް ފެންނަ ކަމަށެވެ. އަދި އިސްލާމް ދީނުގެ ނަމުގައި، މީހުންގެ މުދަލަށް ގެއްލުންދިނުމާއި، މީހުން މެރުމާއި، އަނިޔާވެރި އަމަލުތައް ހިންގުމަށް ގޮވާލުމާއި، ދީނާމެދު ނަފުރަތު އުފެއްދުމުގެ އަމަލުތައް ހިންގުމަކީ އިސްލާމް ދީނަށް ކުރެވޭ ވަރަށް ބޮޑު އިހާނެތިކަމެއް ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ މަދުން ނަމަވެސް، ފާޅުގައި، އިސްލާމް ދީނަށް ފުރައްސާރަ ކުރާ ބަޔަކު އުޅޭކަމީ، ހިތާމަހުރި ކަމެއް ކަމަށެވެ.
ޚުތުބާގައި ބުނީ މީސްމީޑިޔާގައި، ފާޅުގައި، ނުވަތަ ވަގު އެކައުންޓުތައް ހަދައިގެން، އިސްލާމް ދީނާ މެދު ޝައްކު އުފައްދައި، އިސްލާމް ދީނަށާއި، އިސްލާމީ ޝިއާރުތަކަށް ޖޯކު ޖަހާ ކަމަށެވެ. އަދި އިސްލާމް ދީނާ ބެހޭ ޞައްޙަ މައުލޫމާތު ހޯދައި، ދީނާ ދެކޮޅަށް ހިންގާ ޖަރީމާގެ އަމަލުތައް ހުއްޓާލުމަށް ޚުތުބާގައި ނަސޭހަތްތެރިވެފައިވެއެވެ.
މީގެ އިތުރުން ޚުތުބާގައި ވަނީ ދިވެހިރާއްޖޭގެ ދީނީ އެއްބައިވަންތަކަމާއި، މިގައުމުގެ އަމްނުއަމާންކަން ދެމެހެއްޓުމަށް ހެދިފައިވާ ގާނޫނުތަކުގެ ދަށުން، މި ފަދަ އަމަލުތައް ހިންގާ ފަރާތްތައް ހޯދައި، ފިޔަވަޅު އެޅުމަށް ކަމާ ގުޅުން ހުރި ހުރިހާ މުއައްސަސާތަކަށް އިލްތިމާސްކޮށްފައެވެ.
އިސްލާމް ދީނުގެ މަތިވެރި ހިދާޔަތު ދެއްވިކަމަށްޓަކައި ޝުކުރުވެރިވާން ޖެހޭކަން ފާހަގަކޮށް ޚުތުބާގައި އިސްލާމް ދީނަކީ މުޅި ހަޔާތް އެ ދީނުގެ އުސޫލުތަކާ އެއްގޮތަށް ބައްޓަންކުރަންޖެހޭ ދީން ކަމަށެވެ. ދުނިޔެ ހޯދާފައިވާ ޓެކްނޮލޮޖީގެ ކުރިއެރުންތަކާއި، ރަށްވެހިކަމުގެ ސަބަބުން އިންސާނާގެ ހަޔާތަށް މާއްދީ ގިނަގުނަ ފާގަތިކަމާއި، އަރާމުތައް ލިބެމުން ދިޔަ ނަމަވެސް އިސްލާމް ދީނުގެ އިލްމާ ދުރުވެއްޖެ ނަމަ އޭނާއަށް ބޭނުންވާ ރޫޙާނީ ކާނާތައް ދާނީ، މަދުވަމުން ފަގީރުވަމުން ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އިސްލާމް ދީނަކީ މުސްލިމުންގެ ހަޔާތުގެ އެންމެހާ ކަންތައްތައް އެ ދީނުގައި ޝާމިލުވާ ފުރިހަމަ ދީން ކަމަށާއި، އިސްލާމް ދީނަކީ މުސްލިމަކު ދުނިޔެއަށް އުފަންވީން ސުރެ، އުޚްރަވީ ހަޔާތަށް ވާސިލުވަންދެން އޭނާގެ ހުރިހާ ކަމެއް ރާވައިދޭ މަންހަޖު ކަމަށެވެ. އެހެންކަމުން އިސްލާމް ދީނުގެ އަގުތައް މިއަދު މުސްލިމުންގެ ހިތްތަކުގައި އަލުން ދިރުވަން ޖެހިފައިވާ ކަމަށާއި، އިންސާނާގެ ހަޔާތަށް ހިތްހަމަޖެހުމާއި، ބާއްޖަވެރިކަން ގެނެސްދީ، ހިތްތަކުގައި އެކުވެރިކަމާއި، އޯގާތެރިކަމާއި، އެއްބަނޑު އެއްބަފާކަމުގެ ޝުއޫރުތައް އަށަގެންނެވުމަށް އިސްލާމް ދީނުގެ ހަމަތަކުގައި ހިފުމަށް ޚުތުބާގައި ގޮވާލާފައިވެއެވެ.
