ރާއްޖޭގެ އާބާދީ މަދު ރަށްރަށް ކޯޒްވޭއަކުން ގުޅާލުމުގެ މަސައްކަތުގެ ތެރެއިން ލ. އަތޮޅުން 5 ރަށެއް ގުޅާލެވުމުން، ހައްދުންމައްޗަށް ބޮޑެތި ކުރިއެރުންތަކެއް އަންނާނެ ކަމަށް ލ. އަތޮޅު ކައުންސިލްގެ ރައީސް އިސްމާއިލް އަލީ ވިދާޅުވެއްޖެއެވެ.

ރާއްޖޭގެ މީހުން ދިރިއުޅޭ ރަށްރަށުގެ ތެރެއިން އާބާދީ މަދު ރަށްރަށް އެއްފަސްކުރުމުގެ ގޮތުން ރަށްތަކުގެ މެދުގައި ކޯޒްވޭއެއް ގާއިމްކުރުމުގެ މަސައްކަތުގެ ތެރެއިން ލ. އަތޮޅުގެ 5 ރަށެއް އެއްފަސްކުރުމަށް ސަރުކާރުން ވަނީ އަންނަ އަހަރުގެ ބަޖެޓުގައި ހިމަނާފައެވެ. މީގެ ތެރެއިން ކޯޒްވޭއިން ގުޅާލަން ނިންމާފައިވާ ރަށްތަކަކީ ލ. ކަލައިދޫ އާއި ލ. ދަނބިދޫ ގުޅާލުމާއި، ލ. ހިތަދޫ، ލ. މެންދޫ އަދި ލ. ކުނަހަންދޫ ކޯޒްވޭއަކުން ގުޅާލުމުގެ މަސައްކަތް ކުރަން ސަރުކާރުން ވަނީ ނިންމާފައެވެ. މިއިން ކޮންމެ ރަށެއް އެއްފަސްކުރުމަށް ކޮންމެ ރަށަކަށް ކަނޑައަޅާފައިވަނީ އެއް މިލިއަން ރުފިޔާއެވެ.

މިކަމާ ގުޅޭގޮތުން ރާއްޖެއެމްވީއަށް މައުލޫމާތުދެއްވަމުން ލ. އަތޮޅު ކައުންސިލްގެ ރައީސް އިސްމާއިލް އަލީ ވިދާޅުވީ މި ރަށްތައް ގުޅާލެވުމުން އެ ސަރަހައްދުގެ މީހުންގެ ދިރިއުޅުމުގެ ފެންވަރު ރަނގަޅުވެގެންދާނެ ކަމަށެވެ. އަދި މި ސަރަހައްދުތަކުގައި ތަރައްގީގެ އެކި މަޝްރޫއުތައް ހިންގި، ދަތުރުފަތުރުގެ ގޮތުންނާއި، ވިޔަފާރީގެ ގޮތުން ވެސް ކުރިއެރުންތައް ގެނުވާނެ ކަމަށް އިސްމާއިލް ވިދާޅުވިއެވެ.

މި ސަރަހައްދުތަކަކީ ދަނޑުވެރިކަމުގެ މަސައްކަތްކުރާ މީހުން ވެސް ގިނަ ސަރަހައްދަކަށްވުމާއެކު ދަނޑުވެރިކަމުގެ މަސައްކަތްތައް ވެސް އިތުރަށް ފުޅާވެގެންދާނެ ކަމަށް އޭނާ ވިދާޅުވިއެވެ. ފަތުރުވެރިކަމުގެ ރޮނގުން ވެސް މި ސަރަހައްދުތަކަށް ކުރިއެރުންތަކެއް ގެނުވާނެ ކަމަށާއި، ތައުލީމާއި ސިއްހީ ފަރުވާ ފަދަ ޚިދުމަތްތައް ވެސް ފަސޭހައިން ފޯރުކޮށްދެވިގެންދާނެކަން އޭނާ ފާހަގަކުރެއްވިއެވެ. އިސްމާއިލް ވިދާޅުވީ މި މަސައްކަތަކީ ހުރިހާ ސަރުކާރަކުން ވެސް ކުރަން އަމާޒު ހިފިނަމަވެސް ނުވެ އޮތް މަސައްކަތެއް ކަމަށެވެ. މިއީ މި ސަރަހައްދުގެ ރައްޔިތުންގެ ވެސް ބޮޑު އުންމީދެއްކަމަށް އޭނާ ވިދާޅުވިއެވެ.

މިކަމާ ގުޅޭގޮތުން ރާއްޖެއެމްވީއަށް މައުލޫމާތުދެއްވަމުން ލ. ކުނަހަންދޫ ކައުންސިލްގެ ރައީސް އިބްރާހިމް ޝަކީބް ވިދާޅުވީ މި މަސައްކަތަކީ ކުނަހަންދޫއަށް ގިނަ ތަރައްގީތަކެއް ގެނުވާނެ މަސައްކަތެއް ކަމަށެވެ. މިގޮތުން ލ. ހިތަދޫ، ލ. މެންދޫ އަދި ލ. ކުނަހަންދޫ ކޯޒްވޭއަކުން ގުޅާލުމަށް ވަނީ ނިންމާފައެެވެ. މެންދޫއަކީ ދަނޑުވެރިކަމަށް ބޭނުންކުރާ ރަށަކަށްވުމުން ދަނޑުވެރިކަން އިތުރަށް ކުރިއެރުމަށް މަގުފަހިވެގެންދާނެކަން ޝަކީބް ފާހަގަކުރެއްވިއެވެ. އަދި ތައުލީމާއި، ސިއްހީ ޚިދުމަތް ހޯދުމަށް ވެސް އިތުރަށް ފަސޭހަވެގެންދާނެކަމަށް އޭނާ ވިދާޅުވިއެވެ.

ޝަކީބު ވަނީ މިއާއެކު އެރަށުގައި ހުރި އެހެނިހެން ބައެއް މައްސަލަތަކަށް ވެސް ހައްލު ލިބިގެންދާނެކަމަށް އުންމީދުކުރައްވާކަމަށް ވިދާޅުވެފައެވެ. އެގޮތުން ނަރުދަމާގެ މައްސަލައާއި، މަގުތަކުގައި ފެން ހެދުމުގެ މައްސަލައަށް ވެސް ހައްލު ލިބިގެންދާނެ ކަމަށް އުންމީދުކުރައްވާކަމަށް އޭނާ ވިދާޅުވިއެވެ.

އަންނަ އަހަރަށް ސަރުކާރުން ލަފާކުރާ ބަޖެޓުގައި ހިމަނާފައިވަނީ މ، ތ، ލ. އަދި ބ. އަތޮޅުގެ ރަށްތަކެއް ގުޅާލުމަށެވެ. އޭގެތެރޭގައި ހިމެނެނީ ބ. ގޮއިދޫ އާއި ބ. ފެހެންދޫ ގުޅާލުމާއި، ލ. ކުނަހަންދޫ އާއި ލ. މެންދޫ އަދި ލ. ހިތަދޫ ގުޅާލުމާއި، ލ. ކަލައިދޫ އާއި ލ. ދަނބިދޫ ގުޅާލުމާއި ތ. ވޭމަންޑޫ އާއި ތ. ކިނބިދޫ ގުޅާލުމުގެ އިތުުރުން މ. މުއްޔާއި މ. ނާލާފުށި ގުޅާލުމެވެ. މި ޕްރޮޖެކްޓަށް މިލިއަން ރުފިޔާ ވަނީ ބަޖެޓުގައި ކަނޑައަޅާފައެވެ.