ނެޓް ޒީރޯ އެމިޝަންގެ އަމާޒަށް ވާސިލްވުމަށް ޖަޕާނުން 10 ބިލިއަން ޑޮރުގެ އެހީއެއް

ކުރިޔަށް އޮތް 5 އަހަރުތެރޭ، "ނެޓް ޒީރޯ އެމިޝަން"ގެ އަމާޒަށް ވާސިލްވުމަށް އޭޝިއާއިން ކުރަމުންދާ މަސައްކަތްތަކަށް 10 ބިލިއަން ޑޮރުގެ އެހީ ފޯރު ކޮށްދޭނެކަން ޖަޕާނުގެ ބޮޑުވަޒީރު ފުމިއޯ ކިޝިޑާ ހާމަކުރައްވައިފިއެވެ.

އިގިރޭސިވިލާތުގައި މިހާރު ކުރިޔަށްދާ ކޮޕް26 ސަމިޓުގައި ކިޝިޑާވަނީ، ދުނިޔެ ހޫނުވަމުންދާ މައްސަލައަށް ހައްލު ހޯދުމަށް ކުރެވެމުންދާ މަސައްކަތްތަކުގައި އޭޝިއާ "ޒީރޯ އެމިޝަން"އަށް ވާސިލް ކުރުމަށް ޖަޕާންއިން މަސައްކަތް ކުރާނެ ކަމަށް ބޮޑުވަޒީރު ވިދާޅުވެފައެވެ. ދުނިޔޭގެ އިޤްތިޞާދީ ކުރިއެރުމުގެ އިންޖީނަކީ އެއީ ކަމަށް ބޮޑުވަޒީރު ކިޝިޑާ ސިފަކުރެއްވިއެވެ. ބޮޑުވަޒީރުކަމާ ހަވާލުވެވަޑއިގަތްތާ މާ ގިނަ ދުވަހެއް ނުވެ އިނގިރޭސިވިލާތަށް ވަޑައިގެން، ގްލާސްގޯގައި ކުރިޔަށްދާ ކޮޕް26 ސަމިޓުގައި ކިޝިޑާ ވަނީ ލީޑަރޝިޕް ދައްކަވާފައެވެ.

މި އަހަރުގެ ޖޫންމަހު، ކްލައިމެޓް ފައިނޭންސްގެ ގޮތުން ޖަޕާނުން ހޭދަކުރާނެކަމަށް ވައުދުވެފައިވާ 60 ބިލިއަން އެމެރިކާ ޑޮލަރުގެ އިތުރަށް ދޭން ނިންމި މި އެހީއަކީ، ދުނިޔޭގެ ތަރައްގީ ވެފައިވާ ގައުމުތަކުން ކޮންމެ އަހަރަކު ވެސް ކްލައިމެޓް ފައިނޭންސްގެ ގޮތުގައި 100 ބިލިއަން ޑޮލަރު ޚަރަދު ކުރުމަށް ވެފައިވާ ވައުދު ފުއްދުމަށް ބާރު އެޅުމުގެ ގޮތުން ޖަޕާނުން ފޯރުކޮށްދޭ ފައިސާގެ އެހީތެރިކަމެވެ. ކްލައިމެޓް ފައިނޭންސްގެ ގޮތުގައި 100 ބިލިއަން ޑޮލަރު ޚަރަދު ކުރުމަށް ދުނިޔޭގެ ތަރައްގީވެފައވާ ގައުމުތަކުން ވެފައިވާ ވައުދަކީ އިނގިރޭސިވިލާތުގައި މިހާރު ކުރިޔަށްދާ ކޮޕް26 ސަމިޓްގެ މައިގަނޑު އެންމެ މުހިންމު އެއް އަމާޒު ވެސް މެއެވެ.

ކޮޕް26 ސަމިޓްގައި ވާހަކަ ދައްކަވަމުން ކިޝިޑާ ވިދާޅުވެފައިވަނީ އެހެނިހެން ގައުމުތައް ތިމާވެއްޓަށް އަންނަ ބަދަލުތަކުގެ ނުރައްކަލުން ސަލާމަތްވުމަށް މިހާރު ކުރަމުންދާ 14.8 ބިލިއަން ޑޮލަރުގެ ހޭދަ ދެގުނަށް ކުރުމަށް ނިންމާފައިވާ ކަމުގައެވެ.

ޖަޕާނުން ވަނީ 2050 އަންނަން ވާއިރަށް "ނެޓް ޒީރޯ އެމިޝަން"އަށް ވާސިލްވުމަށް ނިންމާފައެވެ. އަދި 2030 އަންނަން ވާއިރަށް އެގައުމުން ޖައްވަށް ބޭރުކުރާ ގްރީންހައުސް ގޭހުގެ މިންވަރު %46 މަދުކުރުމަށް ވެސް ނިންމާފައެވެ.

ކޮޕް26ގައި ދުނިޔޭގެ 200 އަށްވުރެ ގިނަ ގައުމުތަކުން އެންމެމަތީ ވެރިން ބައިވެރިވެވަޑައިގަންނަވައެވެ.