ޖިންސީ ގޯނާގެ މައްސަލައިގައި ހައްޔަރުކުރި އަންހެން މީހާ ދޫކޮށްލައިފި

ގަލޮޅު މަދުރަސާގައި 4 އަހަރުގެ ކުޑަ އަންހެން ކުއްޖަކަށް ޖިންސީ އަނިޔާކުރި މައްސަލައިގެ ތުހުމަތުގައި ހައްޔަރުކުރި އެ ސްކޫލުގެ މަސައްކަތު އަންހެން މީހާ ފުލުހުންގެ ބަންދުން ދޫކޮށްލައިފިއެވެ.

ފުލުހުން ބުނީ އެމީހާ ދޫކޮށްލާފައިވަނީ އިތުރަށް ބަންދުގައި ބަހައްޓަން ނުފެންނަ ކަމަށް ޕްރޮސެކިއުޓަރ ޖެނެރަލް އޮފީހުން ލަފާ ދީފައިވާތީ ކަމަށެވެ. އެހެންނަމަވެސް މައްސަލަ އިތުރަށް ތަހުގީގު ކުރަމުންދާ ކަމަށް ބުނެފައިވެއެވެ.

މިކަމާއި ގުޅޭގޮތުން ޕީޖީ އޮފީހުން ބުނީ މިގޮތަށް ނިންމީ މި މައްސަލައިގައި އެ އޮފީހަށް ހުށަހަޅާފައިވާ ލިޔުންތަކާއި، ލިބިފައިވާ މައުލޫމާތުތަކާއި ވަށައިގެންވާ އެންމެހާ ކަންކަމަށް ރިއާޔަތްކޮށް ބެލިއިރު، މައްސަލާގައި ތުހުމަތުކުރެވޭ މީހާ، ކުޑަކުދިންނަށް ޖިންސީ ގޯނާ ކުރާ މީހުންނާމެދު ޚާއްސަ އުސޫލުތަކަކަށް އަމަލުކުރުމުގެ ގާނޫނުގެ 30 ވަނަ މައްދާގެ ދަށުން، ބަންދުގައި ބަހައްޓަންޖެހޭ ފަދަ ސަބަބެއް މިވަގުތު އޮތް ކަމަށް ނުފެންނާތީ ކަމަށެވެ.

މި މައްސަލައިގައި ހައްޔަރުކުރީ ސްކޫލްގައި މަސައްކަތު މީހެއްގެ ގޮތުގައި މަސައްކަތްކުރާ 63 އަހަރުގެ އަންހެނެކެވެ. މާލޭގެ ސްކޫލެއްގައި ކިޔަވާ ކުޑަ އަންހެން ކުއްޖަކަށް ޖިންސީ ގޯނާކުރި މައްސަލައިގައި މަސައްކަތު އަންހެނަކަށް ތުހުމަތުކުރެވިފައިވާތީ، އެ ސްކޫލުގެ މަސައްކަތު ހުރިހާ އަންހެން މުވައްޒަފުން ހޮނިހިރު ދުވަހުން ފެށިގެން ވަނީ ސަސްޕެންޑް ކޮށްފައެވެ.

މައްސަލަ ތަހުގީގު ކުރަމުން އަންނާތީ މިކަމާ ގުޅުން ހުރި 2 މީހަކު އޭގެ ކުރިންވެސް ވަނީ ސަސްޕެންޑްކޮށްފައެވެ. ސްކޫލްގެ މެނޭޖްމަންޓުން ބެލެނިވެރިންނަށް ފޮނުވާފައިވާ ދެންނެވުމެއްގައި ބުނެފައިވަނީ، މަސައްކަތު ހުރިހާ އަންހެނުން ހޮނިހިރު ދުވަހުން ފެށިގެން ވަޒީފާއިން އެކަހެރިކޮށްފައިވާ ކަމަށާއި، ކުދިން ދެން ފާޚާނާއަށް ދާނީ ޓީޗަރުންގެ ބެލުމުގެ ދަށުން ކަމަށެވެ. އަދި ސްކޫލްގެ އެކި ސަރަހައްދުގައި 18 ސީސީޓީވީ ކެމެރާ ހަރުކޮށް މޮނީޓަރ ކުރަން ފަށާފައިވާކަމަށެވެ.

ހަތަރު އަހަރުގެ އަންހެން ކުއްޖާއަށް ޖިންސީ އަނިޔާވެފައިވަނީ މަސައްކަތު މީހެއްގެ ބެލުމުގެ ދަށުން, ފާޚާނާއަށް ފޮނުވި ފަހުން ކަމަށް ކުއްޖާގެ ބެލެނިވެރިން ވަނީ މައުލޫމާތު ދީފައެވެ. ނަމަވެސް ކުއްޖާ ފާޚާނާއަށް ގެންދަން ހަވާލުކުރި ވަކި މީހަކު ނޭނގޭ ކަމަށް ޓީޗަރު ބުނެފައިވާކަމަށް ސްކޫލުން ބުނެއެވެ.

ޖިންސީ ގޯނާގެ އެކި މައްސަލަތަކުގައި އެކި ސްކޫލުތަކުން 30 މުވައްޒަފަކު މިހާތަނަށް ވަޒީފާއިން ވަކިކޮށްފައިވާ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވަނީ ވިދާޅުވެފައެވެ. މިނިސްޓަރ ވިދާޅުވީ، އެޑިއުކޭޝަން ދާއިރާގައި ޖިންސީ ގޯނާގެ 40 ވަރަކަށް މައްސަލަ މިހާތަނަށް ހުށަހެޅި ބެލިފައިވާ ކަމަށާއި، އޭގެ ތެރެއިން 30 މުވައްޒަފަކު ވަޒީފާއިން ވަކިކޮށްފައިވާކަމަށެވެ. ޖިންސީ ގޯނާގެ މައްސަލަތަކަކީ މިނިސްޓްރީން ވަރަށް ސީރިއަސް މައްސަލަތަކެއްގެ ގޮތުގައި ބަލަމުންދާ މައްސަލަތަކެއްކަމަށް މިނިސްޓަރ ވިދާޅުވިއެވެ.