މިސަރުކާރުން ތިމާވެއްޓާއި ގުޅުންހުރި 33 ސަރަހައްދެއް ހިމާޔަތްކޮށްފި
30 އޮކްޓޯބަރު 2021 | ހޮނިހިރު 07:56މުރަކަޔާއި ފަރުތަކުގެ 13 އިންސައްތައާ ގާތް ކުރާ މިންވަރަށް ހިމާޔަތް ކުރެވިފައިވޭ
ބ އަތޮޅުގެ ބަޔޯސްފިއަރ،
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން ތިމާވެށީގެ 33 ސަރަހައްދެއް ހިމާޔަތް ކޮށްފައިވާ ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި މިނިސްޓަރު ޝައުނާ ވިދާޅުވީ ތިމާވެށި ރައްކާތެރިކުރުމުގެ ގޮތުން ވަރަށް ގިނަ މަސައްކަތްތައް ކުރަމުންދާ ކަމަށާއި، ކުރިއަށް އޮތްތަނުގައި ވެސް ކުރަންޖެހޭ ގިނަ މަސައްކަތްތަކެއް އެބަހުރި ކަމަށެވެ. މިނިސްޓަރު ޝައުނާ ވިދާޅުވީ މިސަރުކާރުން ތިމާވެއްޓަށް ޚާއްސަ ސަމާލުކަމެއްދޭ ކަމަށެވެ. އެގޮތުން މިސަރުކާރުގައި މިހާތަނަށް 33 ސަރަހައްދެއް ހިމާޔަތް ކުރެވިފައިވާ ކަމަށް މިނިސްޓަރު ޝައުނާ ވިދާޅުވިއެވެ. އަދި ވިދާޅުވީ 1995ން 2018ގެ ނޮވެންބަރު މަހާ ހަމައަށް ރާއްޖޭގައި ހިމާޔަތް ކުރެވިފައި އޮތީ 47 ސަރަހައްދެއް ކަމަށެވެ.
މިނިސްޓަރު ޝައުނާ ވިދާޅުވީ މުރަކަޔާއި ފަރުތަކުގެ 13 އިންސައްތައާ ގާތް ކުރާ މިންވަރަށް ހިމާޔަތް ކުރެވިފައިވާ ކަމަށެވެ. ނޫ ރާއްޖެ ޕްރޮގްރާމްއާއެކު ފިޝަރީޒް މިނިސްޓްރީ ބެލުމުގެދަށުން ރާއްޖޭގެ ކަނޑުފަޅު ސަރަހައްދުގެ އެންމެ މަދުވެގެން 20 އިންސައްތަ ހިމާޔަތް ކުރުމުގެ މަސައްކަތް ފެށިފައިވާ ކަމަށް މިނިސްޓަރު ޝައުނާ ވިދާޅުވިއެވެ.
ނޫ ރާއްޖެ ޕްރޮގްރާމް ވެގެންދާނީ ރާއްޖޭގެ ކަނޑުފަޅުގެ ދިރުންތައް ހިމާޔަތްކޮށް، ރާއްޖޭގެ އިގްތިސާދަކީ ތިމާވެއްޓާއި ރައްޓެހި އިގްތިސާދަކަށް ހެދުމަށް ކުރެވޭ މަސައްކަތުގެ އެހީއަކަށެވެ. ބްލޫ ޕްރޮސްޕެރިޓީ ކޯލިޝަން ގުޅިގެން ކުރިއަށްގެންދާ ނޫ ރާއްޖެ ޕްރޮގްރާމް މެދުވެރިކޮށް ކުރާ ސައިންޓިފިކް ދިރާސާތަކުގެ ނަތީޖާއަށް ރިއާޔަތްކޮށް ނޫ އިގްތިސާދެއް ބިނާކުރުމުގައި ގުދުރަތީ ދިރުންތައް ދެމެހެއްޓޭނެ ގޮތަކަށް ސިޔާސަތުތައް އެކަށައަޅައި ކުރިޔަށް ދިޔުމަށް މެރިޓައިމް ސްޕެޝަލް ޕްލޭނެއް އެކުލަވާލާނެއެވެ. އަދި ސަރުކާރުގެ ޖަޒީރާ ރާއްޖެ އަދި ނޫ އިގްތިސޯދުގެ ސިޔާސަތުތައް ތަންފީޒުކުރުމަށް ބޭނުންވާ އެހީތެރިކަމާއި އެއްބާރުލުން މި ހަރަކާތުގެ ތެރެއިން ލިބިގެންދާނެ އެވެ.
ގައުމީ އިގުތިސޯދާއި ގައުމީ ދުޅަހެޔޮކަން ބަރޯސާވެފައި ވަނީ ތިމާވެއްޓާއި ވަކިން ޚާއްސަ ގޮތެއްގައި ކަނޑުތަކުގެ ދުޅަހެޔޮކަމާއި މުއްސަނދިކަމުގެ މައްޗަށެވެ. އެހެންކަމުން ސަރުކާރުން އެކުލަވާލާފައިވާ ސްޓްރެޓެޖިކް އެކްޝަން ޕްލޭންގައި ހިމަނާފައިވާ ނޫ އިގްތިސޯދުގެ ސިޔާސަތުގެ ދަށުން ރާއްޖޭގެ އިގްތިސޯދުގެ އެންމެ މުހިންމު 2 ސިނާއަތް ކަމަށްވާ މަސްވެރިކަމާއި ފަތުރުކަން ކުރިއެރުވުމުގައި ތިމާވެއްޓާއި ރައްޓެހި އަދި ދެމެހެއްޓެނިވި ތަރައްގީއަށް ބާރުލިބޭ ކަންކަމަށް މި ސަރުކާރުން އިސްކަން ދޭނެއެވެ.
