ކަރަންޓް ކަނޑާލާފައިވާ އެއްވެސް ކައުންސިލް އިދާރާއެއް މިހާރު ނުހުންނާނެ: ފެނަކަ
ކައުންސިލް އިދާރާތަކަށް ކަރަންޓް ދިނީ އެލްޖީއޭ އަދި ފިނޭންސް މިނިސްޓްރީއާ އެކު ކުރެވުނު މަޝްވަރާތަކަށް ފަހު
މިލަދޫ ކައުންސިލްގެ އިދާރާ: މި އިދާރާ އިން ވެސް ބިލް ނުދައްކައިގެން ކަރަންޓް ކަނޑާލި
ކަރަންޓް ބިލްތައް ނުދައްކައިގެން މިދިޔަހަފްތާ ތެރޭގައި ބައެއް ކައުންސިލް އިދާރާތަކުން ކަރަންޓް ކަނޑާލި ނަމަވެސް މިހާރު ކަރަންޓް ކަނޑާލާފައިވާ އެއްވެސް ކައުންސިލް އިދާރާއެއް ނުހުންނާނެ ކަމަށް ފެނަކަ ކޯޕްރޭޝަނުން ބުނެފިއެވެ.
ރާއްޖެއެމްވީ އަށް މައުލޫމާތު ދެއްވަމުން ފެނަކަ ކޯޕްރޭޝަންގެ މެނޭޖިންގް ޑައިރެކްޓަރު އަހުމަދު ޝަރީފް ވިދާޅުވީ ކައުންސިލް އިދާރާތަކަށް އަލުން ކަރަންޓް ދީފައި ވަނީ ފިނޭންސް މިނިސްޓްރީ އާއި ލޯކަލް ގަވަމެންޓް އޮތޯރިޓީ އާއި ފެނަކަ ކޯޕްރޭޝަންއާ ދެމެދު ކުރެވުނު މަޝްވަރާތަކަށް ފަހު ކަމަށެވެ.
އެގޮތުން ޝަރީފް ވިދާޅުވީ ކަރަންޓް ބިލްތައް ފައިސާ ދައްކާނެ ގޮތްތަކެއް ފިނޭންސް މިނިސްޓްރީ އާއި ލޯކަލް ގަވަމެންޓް އޮތޯރިޓީން މިހާރު ހަމަޖައްސާފައިވާ ކަމަށެވެ.
ޝަރީފް އިއްޔެ ވިދާޅުވީ ބައެއް ކައުންސިލްތަކުން ކަރަންޓު ބިލް ނުދައްކާތާ އަހަރަކަށް ވުރެ ގިނަ ދުވަސް ވެފައިވާ ކަމަށާއި އެތަންތަނުން ކަރަަންޓް ބިލަށް ނުލިބި ހުރި ފައިސާގެ އަދަދު 80 މިލިޔަން ރުފިޔާ އަށް އަރާ ކަމަށެވެ.
ޝަރީފް ވިދާޅުވީ ކައުންސިލް އިދާރާތަކަށް ކަރަންޓް ބިލްތައް ދެއްކުމަށް ފިނޭންސުން ފައިސާ ދޫނުކުރަނީ ކަރަންޓް ބިލްތައް ދެއްކުމަށް ފިނޭންސް މިނިސްޓްރީން ކަނޑައަޅާފައިވާ އުސޫލްތަކުގެ ތެރެއިން އަމަލު ކުރަމުން ނުދާތީ ކަމަށެވެ.
އެގޮތުން ކަރަންޓް ބިލްތަކުގެ ތަފްސީލް ފިނޭންސް މިނިސްޓްރީން ކަނޑއަޅާފައިވާ ސިސްޓަމަށް ބައެއް ކައުންސިލް އިދާރާތަކުން އަޅަމުން ނުދާ ކަމަށް ފިނޭންސް މިނިސްޓްރީން ބުނެފައިވާ ކަމަށް ޝަރީފް ވިދާޅުވިއެވެ. އަދި ހަމަޖއްސާފައިވާ އުސޫލްތަކުގެ ދަށުން ކަރަންޓް ބިލްތަކުގެ މައުލޫމާތު ފިނޭންސްއާ ހިއްސާކުރާ ކައުންސިލްތަކަށް ގަވާއިދުން ކަރަންޓް ބިލްތައް ދެއްކުމަށް ފިނޭންސުން ފައިސާ ދޫކުރާ ކަމަށް ޝަރީފް ވިދާޅުވިއެވެ.
މީގެ އިތުރުން ޝަރީފް ވިދާޅުވީ ކަރަންޓު ބިލު ދެއްކުމަށް ކައުންސިލްގެ ބަޖެޓްގައި ކަނޑައަޅާފައިވާ ފައިސާއިން، ބައެއް ކައުންސިލްތަކުން އެހެން ކަންކަމަށް ބޭނުން ކުރާ ކަމަށެވެ. އަދި އެކަމުގެ ސަބަބުން ބިލް ދައްކާނެ ފައިސާ ނެތިގެން ފިނޭންސް މިނިސްޓްރީގައި އެދޭ ކަމަށް ޝަރީފް ވިދާޅުވިއެވެ.
