ރާއްޖެޓީވީގައި ރޯކޮށްލި މައްސަލައިގައި ޓެރަރިޒަމްގެ ދައުވާ އުފުލާފައިވާ ހ. ގަސްވާ މުޙައްމަދު މީޢާދުގެ މައްސަލައިގެ އަޑުއެހުން އަނެއްކާވެސް ކެންސަލްކޮށްފިއެވެ.

މީއާދުގެ މައްޗަށް ދައުވާކުރާ މައްސަލައިގައި މިހާރު ވަނީ ހެކިބަސް ނަގައި ޚުލާސާ ބަޔާން ވެސް އިއްވާފައެވެ. މި މައްސަލައިގައި ނިމިދިޔަ ސެޕްޓެމްބަރު މަހުގެ 29 ވަނަ ދުވަހު ވެސް އަޑުއެހުމެއް ތާވަލުކުރިއެވެ. އެހެންނަމަވެސް، އެ އަޑުއެހުން ކެންސަލްވެފައިވަނީ ދިފާއީ ވަކީލުންނާއި މައްސަލަ ބައްލަވާ ގާޒީ އެހެން އަޑުއެހުމެއްގައި އިންނެވުމުގެ ސަބަބުންކަމަށް ކްރިމިނަލް ކޯޓުން އޭރު ބުނެފައިވެއެވެ.

މި މައްސަލައިގެ އަޑުއެހުމެއް ބުދަ ދުވަހުގެ ހެނދުނު 09:00ށް ތާވަލުކުރިއެވެ. އެހެންނަމަވެސް، އަޑުއެހުން ކެންސަލް ކޮށްފައިވަނީ މި މައްސަލައިގައި އަދިވެސް އިތުރަށް ބަލަންޖެހޭ ކަންކަން ހުރުމުންކަމަށް ކްރިިމިނަލް ކޯޓުން މައުލޫމާތު ދެއެވެ.

މި މައްސަލައިގެ ދައުވާލިބޭ މީއާދުގެ ފަރާތުން މީގެ ކުރިން ޚުލާސާ ގޮތެއްގައި އޭނާގެ ވަކީލު ވަނީ ތަހުގީގު މަރުޙަލާގެ ތެރެއިން މީއާދަށް ލިބެންޖެހޭ ޙައްޤުތައް ކަށަވަރު ކޮށްދީފައިވާކަން ސާފުވާން ނެތްކަމަށް ބުނެފައެވެ. އަދި ތުހުމަތު ކުރެވޭ މީހަކަށް ޤާނޫނު އަސާސީން ލިބެންޖެހޭ ޙައްޤުތައް ލިއްބައިދީފައި ނުވާކަމަށް ވަކީލު ވިދާޅުވިއެވެ. ދިފާއުން ވަނީ މީއާދުގެ މައްޗަށް ކޮށްފައިވާ ދައުވާ ސާބިތުވާ މިންވަރަށް ހެކި ހުށަހަޅާފައި ނެތްކަމަށް ބުނެފައެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމް ވަނީ މައްސަލައިގެ ޙުކުމަކަށްދާއިރު، ދެފަރާތުން ފާހަގަކުރި ކަންކަމަށް ރިއާޔަތް ކުރައްވާނެކަމަށް ވިދާޅުވެފައެވެ. ގާޒީ ވިދާޅުވީ ދެން މި މައްސަލައިގައި އޮންނާނީ ޙުކުމް ކުރެއްވުމަށް ބާއްވަވާ އަޑުއެހުމެއް ކަމަށެވެ.

މި މައްސަލައިގެ ޚުލާސާ ބަޔާން އިއްވުމުގެ އަޑުއެހުމުގައި ދައުލަތުގެ ވަކީލު ވިދާޅުވީ، ރާއްޖެޓީވީ ރޯކޮށްލި މީހުންގެ ތެރޭގައި މީއާދު ހިމެނޭކަން ސިއްރު ހެކިވެރިންގެ ހެކިބަހުން އެނގޭ ކަމަށެވެ. އަދި އޭނާ މޫނުގައި މާސްކް އަޅަން ހުރިތަން ފެނުނު ކަމަށާއި، އޭނާ ބީކޭޓީ އިމާރާތަށް ވަދެގެން ދިޔަތަން ފެނުނުކަމަށް ވެސް ސިއްރު ހެކިންގެ ހެކިބަހުން އެނގޭކަމަށް ދައުލަތުގެ ވަކީލާ ވިދާޅުވިއެވެ.