ޖައިލަމް މަރާލި މައްސަލަ: ދެން އޮތީ ޑޮކްޓަރުގެ ހެކިބަސް ނެގުން
މި މައްސަލައިގެ އަޑުއެހުމެއް އޮންނާނީ 21 ނޮވެމްބަރުގެ 10:00 ގައި
ޖައިލަމްގެ މަރުގެ މައްސަލައިގައި ދައުވާ އުފުލާފައިވާ ފަރާތްތައް | ރާއްޖެއެމްވީ
ހ. ހަންޑްރެޑް ފްލާވާސް, ޖައިލަމް އަހުމަދު ޝާކިރުގެ މަރުގެ މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމަކީ ދައުލަތުން ހުށަހަޅާފައިވާ ހެކިވެރިންގެ ހެކިބަސް ނެގުމަށް ބޭއްވި އަޑުއެހުމެކެވެ. މި މައްސަލައިގެ އެންމެ ފަހުން ބޭއްވިއަޑުއެހުމުގައި ވެސްވަނީ ދައުލަތުން ހުށަހަޅާފައިވާ 5 ހެކިންގެ ތެރެއިން ހެއްކެއްގެ ހެކިބަސް ނަގާފައެވެ. އަދި އަންގާރަ ދުވަހުގެ އަޑުއެހުމުގައި ވަނީ ބާކީ ތިބި 2 ހެއްކެއްގެ ހެކިބަސް ނަގާފައެވެ. އެއީ މި މައްސަލައިގައި ދައުވާލިބޭ މުޙައްމަދު ހުމައިދު ޖައިލަމަށް ޙަމަލާ ދިންއިރު އޭނާގެ އަތް ކަނޑައިގެން ގޮސްފައިވާތީ އެކަން ސާބިތުކުރުމަށް ހާޒިރުކުރި ފުލުސް އޮފިސަރެކެވެ.
އެކަން ސާބިތު ކުރުމަށް ހުށަހަޅާފައިވަނީ ޕޮލިސް ކޯޕްރަލް މުޙައްމަދު އަރީފެވެ. ހެކިބަސް ދެއްވަމުން އަރީފް ވިދާޅުވީ، ސިނަމާލޭ ފްލެޓުގައި ހުރި އެޕާޓްމަންޓު ޗެކްކުރިއިރު ހުމައިދުގެ މެޑިކަލް ލިއެކިއުންތަކެއް ފެނިފައިވާ ކަމަށެވެ. އެގޮތުން އަތްތިލަ ކަނޑައިގެން ގޮސްފައިވާކަން އެ ލިއެކިއުންތަކުން ފެންނަކަން ހެކިވެރިޔާ ފާހަގަކުރެއްވިއެވެ. އަދި އެތަކެތީގެ ފޮޓޯ ނެންގެވިކަން ފާހަގަކުރައްވައި ހެކިވެރިޔާ ވަނީ އެކަމާ ގުޅޭ ތަފްސީލުތައް ހިއްސާކުރައްވާފައެވެ.
ދެން ހާޒިރު ކޮށްފައިވަނީ ޕޮލިސް ކޯޕްރަލް އަހުމަދު ފަޔާޒެވެ. އޭނާއަކީ ކްރައިމް ސީން އިންވެސްޓިގޭޝަން އޮފިސަރެއްގެ ގޮތުން އެ ޙާދިސާ ހިނގިއިރު ސީންއަށް ދިޔަ އޮފިސަރެކެވެ. އޭނާ ވަނީ ޙާދިސާ ހިނގި ސަރަޙައްދުން ފެނުނު ކަންކަން ޝަރީއަތުގައި ހިއްސާ ކުރައްވާފައެވެ.
މި މައްސަލައިގައި ދައުލަތުން ހުށަހަޅާފައިވާ 5 ހެކިންގެ ތެރެއިން 3 ހެއްކެއްގެ ހެކިބަސް ނަގާފައިވާއިރު، ބާކީ ތިބި 2 ހެކިންނަކީ ދައުލަތުން ހެކިންގެ ގޮތުގައި ހުށަހަޅާފައިވާ 2 ޑޮކްޓަރެކެވެ. އެއީ ޖައިލަމްގެ މެޑިކޯ ލީގަލް ރިޕޯޓު ތައްޔާރު ކުރެއްވި ބިދޭސީ ޑޮކްޓަރާއި، އެ ރިޕޯޓު ތަރުޖަމާ ކުރެއްވި ދިވެހި ޑޮކްޓަރެވެ. މި މައްސަލަ ބައްލަވާ ގާޒީ ސޮފްވަތު ޙަބީބް ވަނީ މިހާރުވެސް ހެކިން ހާޒިރު ކުރުމަށް ދައުލަތަށް ގިނަ ފުރުސަތުތަކެއް ދެވިފައިވާކަން ފާހަގަ ކުރައްވައި، ދެން ބާއްވާ އަޑުއެހުމަކީ ދައުލަތަށް އެ ހެކިން ހާޒިރު ކުރުމަށް ދެވޭނެ ފަހު ފުރުސަތުކަން ފާހަގަ ކުރައްވާފައެވެ.
އޭގެ އިތުރުން، ބިދޭސީ ޑޮކްޓަރު ހާޒިރު ނުކުރެވިއްޖެ ޙާލަތެއްގައި އެކްސްޕަރޓް އޮޕީނިއަންއެއް ހޯދުމަށް ހަބީރަކު ހާޒިރުކުރަން ދައުލަތުން ބޭނުންވާނަމަ އެކަމާ ގުޅޭ ލިއެކިއުންތައް ހުށަހެޅުއްވުމަށް ޝަރީއަތުން ވަނީ އެދިފައެވެ. އަދި ޑޮކްޓަރު ހާޒިރު ނުކުރެވޭ ޙާލަތެއްގައި ތަރުޖަމާނު ހާޒިރު ކުރުމާ ގުޅޭގޮތުން ދެފަރާތުން ފާހަގަކުރި ކަންކަމަށް ދެން އޮންނަ އަޑުއެހުމެއްގައި ގޮތެއް ނިންމަވާނެކަން ގާޒީ ސޮފްވަތު ޙަބީބު ފާހަގަ ކުރެއްވިއެވެ.
ދެން މި މައްސަލައިގެ އަޑުއެހުމެއް އޮންނާނީ 21 ނޮވެމްބަރުގެ 10:00 ގައެވެ.
