އިރާގު އަތުން ޒުވާން ގައުމީ ޓީމު ބަލިވެއްޖެ

އަންނަ އަހަރު އުޒްބެކިސްތާނުގައި ބޭއްވުމަށް ހަމަޖެހިފައިވާ 23 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގައި ކުޅުނު ފުރަތަމަ މެޗުން އިރާގު އަތުން ރާއްޖޭގެ ޒުވާން ގައުމީ ފުޓްބޯޅަ ޓީމު ބަލިވެއްޖެއެވެ.

ކޮލިފައިން މެޗުތައް ހޯމަ ދުވަހުން ފެށިގެން އަންނަ އާދީއްތަ ދުވަހުގެ ނިޔަލަށް ކުޅުމަށް ތާވަލުކޮށްފައިވާއިރު، ރާއްޖެ ހިމެނޭ ގްރޫޕް ސީގައި ދެން އޮތް ގައުމުތަކަކީ އިރާގުގެ އިތުރުން ބަހްރޭނެވެ. މި ގްރޫޕުގައި އަފްޣާނިސްތާން ހިމެނުނު ނަމަވެސް، ފަހު ވަގުތު އަފްޣާނިސްތާނަށް ބަހްރޭނަށް ދެވޭގޮތް ވަނީ ނުވެފައެވެ. އެހެންކަމުން މި ގްރޫޕުގައި ކޮންމެ ގައުމަކަށްވެސް ކުޅެން ލިބޭނީ ދެ މެޗެވެ.

ރާއްޖެ ހިމެނޭ ގްރޫޕް ސީގެ މެޗުތައް ހޯމަ ދުވަހުގެރޭ ފެށިއިރު، ކޮލިފައިންގައި ކުޅުނު ފުރަތަމަ މެޗުން އިރާގު އަތުން ރާއްޖެ ބަލިވީ 4-0 ގެ ނަތީޖާއަކުންނެވެ.

މި މެޗާ ކުރިމަތިލިއިރު، ޒުވާން ގައުމީ ޓީމުގެ ކެޕްޓަނަކަށް ދާދި ފަހުން ރާއްޖޭގައި ބޭއްވި "އުރީދޫ ސާފް ޗެމްޕިއަންޝިޕް 2021" ގައި ތަފާތު މޮޅު ކުޅުމެއް ދެއްކި ޒުވާން ޑިފެންޑަރު ހައިޝަން ހަސަން (ބިޑި) ވަނީ ހަމަޖައްސާފައެވެ. އަދި ސާފް ޗެމްޕިއަންޝިޕުގައި ވާދަކުރި ސީނިއާ ގައުމީ ޓީމުގެ ކޯޗުގެ މަގާމު އަދާކުރި އަލީ ސުޒޭނުވެސް ވަނީ ޒުވާން ޓީމާ ހަވާލުވެފައެވެ. މީގެ ކުރިން ޒުވާން ގައުމީ ޓީމުގެ ކަންކަން ބަލަހައްޓާފައިވަނީ އެސިސްޓަންޓް ކޯޗުން ކަމަށްވާ ޒުވާން ކޯޗު ސޮބާހު މުޙައްމަދު އިބްރާހީމް (ސޮބާ) އާއި މުޙައްމަދު ޝާހިދު (ޝާޑު) އެވެ.

ހޯމަ ދުވަހުގެރޭ ބަހްރޭނުގައި ކުޅުނު މެޗު ފަށައިގެން 10 ވަަނަ މިނިނެޓުގައި އިރާގުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ މޯމެލް އަބްދުލްރިދާއެވެ. އަދި މެޗުގެ 35 ވަނަ މިނެޓުގައި ލިބުނު ޕެނަލްޓީއަކުން އަޙްމަދު ސަރްތީޕް ވަނީ އިރާގަށް ލީޑު ފުޅާކޮށްދީފައެވެ. ދެން މި މެޗުގައި އިރާގުން ކާމިޔާބުކުރި އަނެއް ދެ ލަނޑު ދެވަނަ ހާފުގައި ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ވަކާ ރަމްދާން ޖުމާހެވެ.

އިރާގު އަތުން 4-0 ގެ ނަތީޖާއަކުން ރާއްޖޭގެ ޒުވާން ގައުމީ ޓީމު ބަލިވިއިރު، ރާއްޖޭގެ ޒުވާން ގައުމީ ޓީމުން ވަނީ 2015 ވަަނަ އަހަރުވެސް 23 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގައި އިރާގާ ދެކޮޅަށް ކުޅެފައެވެ. އެ ފަހަރު ރާއްޖެ ބަލިވީ 7-1 ގެ ނަތީޖާއަކުންނެވެ.

މި ފަހަރުގެ ކޮލިފައިންގައި ކުޅުނު ފުރަތަމަ މެޗުން ރާއްޖެ ބަލިވިއިރު، ކޮލިފައިންގެ ދެވަނަ މެޗުގައި އަންނަ ބުރާސްފަތި ދުވަހު ރާއްޖެ ނުކުންނާނީ ބަހްރޭނާ ދެކޮޅަށެވެ. ކޮލިފައިންގައި 11 ގްރޫޕް ހިމެނޭއިރު، ކޮންމެ ގްރޫޕެއްގެ އެއްވަނައަށްދާ ގައުމަށް އޭއެފްސީ އޭޝިއަން ކަޕުން ފުރުސަތު ލިބޭނެއެވެ. އަދި އެ 11 ގްރޫޕުން ދެވަނައަށްދާ ގައުމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ގައުމަކަށްވެސް މުބާރާތުން ފުރުސަތު ލިބޭނެއެވެ.