ބޮޑު ޕްލޭނަކާއެކު ރާއްޖޭގެ 23 އަހަރުން ދަށުގެ ގައުމީ ވޮލީބޯޅަ ޓީމު އެކުލަވާލައި، ޓީމުގެ ކުޅުންތެރިންނަށް ޖާޒީ ހަވާލުކޮށްފިއެވެ.
ޒުވާން ގައުމީ ޓީމަށް ކުޅުންތެރިން ނެގުމަށް މި މަހުގެ ނުވަވަނަ ދުވަހުން ފެށިގެން ކުރިއަށްގެންދިޔަ ޓްރަޔަލްތަކުގައި 70 އަށްވުރެ ގިނަ ކުޅުންތެރިންވަނީ ބައިވެރިވެފައެވެ. އޭގެ ތެރެއިން 30 ކުޅުންތެރިން ވަނީ ޒުވާން ގައުމީ ޓީމުގެ ސްކޮޑުގައި ހިމަނާފައެވެ.
އެ ކުޅުންތެރިންނަށް ޖާޒީ ހަވާލުކުރުމަށް ހޯމަ ދުވަހުގެރޭ ޒުވާނުންގެ މަރުކަޒުގައި ބޭއްވި ޚާއްސަ ރަސްމިއްޔާތުގައި ވަނީ ޕްލެޔާސް ކޯޑް އޮފް ކޮންޑަކްޓުގައި ކުޅުންތެރިޔާ އާއި ބެލެނިވެރިޔާ ސޮއިކޮށްފައެވެ. ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނީ ޕްލެޔާސް ކޯޑް އޮފް ކޮންޑަކްޓަކީ ކުޅުންތެރިޔާ ދިރިއުޅުން ކުރިއަށް އޮތްތަނުގައި ބައްޓަން ކުރަންވީ ގޮތް ކަމަށެވެ. އަދި ސީނިއާ ގައުމީ ޓީމަށް އެރުން ދެން އެ ކުޅުންތެރިއަކު ބިނާވެގެންދާނީ މި ކޯޑް އޮފް ކޮންޑަކްޓާ އެއްގޮތަށް ކަމަށްވެސް ވަނީ ބުނެފައެވެ.
މި ރަސްމިއްޔާތުގައި ވާހަކަ ދައްކަވަމުން ކުޅިވަރުގެ ދާއިރާއިން ޝަރަފުވެރިކަމުގެ އިނާމު ހާސިލްކުރައްވާފައިވާ އަދި ދިވެހި ވޮލީއަށް އެތައް ގޮތަކުން ޚދުމަތްކުރައްވާފައިވާ ސައްޔިދު އަލީ ވިދާޅުވީ ޒުވާން ސްކޮޑުގައި ކުރިއަަށް އޮތް ތަނުގައި ސީނިއާ ގައުމީ ޓީމަށް ކުޅޭނެ ކުޅުންތެރިން ތިބޭނެ ކަމަށެވެ. އެހެންކަމުން ސީނިއާ ގައުމީ ޓީމަށް އެރުމަށް މަސައްކަތް ކުރުމަށް ހުރިހާ ކުޅުންތެރިންނަށްވެސް ސައްޔިދު އަލީ ވަނީ އިލްތިމާސް ކުރައްވާފައެވެ.
މި ރަސްމިއްޔާތުގައި ވާހަކަ ދައްކަވަމުން ވޮލީބޯލް ވީއެއެމުގެ ރައީސް މުޙައްމަދު ރަނޭޝް (ރަނޭ) ވިދާޅުވީ ޒުވާން ޓީމުގެ ކޮންމެ ކުޅުންތެރިއަކަށްވެސް މަތީ ފެންވަރުގައި ވޮލީބޯޅަ ކުޅުމުގެ ފުރުސަތު އޮންނާނެ ކަމަށާއި، އެކަމަކު އެންމެ މުހިންމީ ކުރާ ބުރަ މަސައްކަތް ކަމަށެވެ. އަދި މިއީ ވޮލީބޯޅަ ކުރިއަރުވަން ކުރާ މަސައްކަތުގެ ފެށުމެއް ކަމަށާއި، މިކަމަށް ކުޅުންތެރިންގެ އާއިލާއިން ދެމުންގެންދާ އެއްބާރުލުމަށް ޝުކުރުދަންނަވާ ކަމަށްވެސް ވިދާޅުވިއެވެ.
ބޮޑު ޕްލޭނަކާއެކު ޒުވާން ގައުމީ ވޮލީބޯޅަ ޓީމު އެކުލަވާލިއިރު، މި ޓީމުގެ ކޯޗަކަށް ހަމަޖައްސާފައިވަނީ ތަޖުރިބާކާރު ކޯޗު ފަތުހުﷲ ވަހީދު (ފައްލޯ) އެވެ. އަދި އެސިސްޓަންޓް ކޯޗަކީ ރާއްޖޭގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ އަޙްމަދު އަބްދުލްކަރީމް (ލޯންގޭ) އެވެ. ރަނޭ ވިދާޅުވީ ޒުވާން ޓީމުގެ ދެ ކޯޗުންނަކީވެސް ނަމޫނާ ދެ ކޯޗުން ކަމަށާއި، އެގޮތުން ފައްލޯ އާއި ލޯންގޭ އަކީ ވޮލީބޯޅައިގައި އިތުރު ތައާރަފެއް ބޭނުންވާނެ ދެ ކޯޗުން ނޫން ކަމަށެވެ.
އަދި ޒުވާން ޓީމު އެކުލަވާލައި މަސައްކަތް ފެށިއިރު، މި އަހަރުން ފެށިގެން މި ޓީމުގެ ދެ ކުޅުންތެރިންނަށް ސީނިއާ ވޮލީބޯޅަ ޓީމުން ފުރުސަތު ލިބިގެންދާނެ ކަމަށްވެސް ރަނޭ ވިދާޅުވިއެވެ. އަދި އެއީ ޒުވާން ކުޅުންތެރިންނަށް ތަޖުރިބާ ދިނުމުގެ ގޮތުން ކުރަން ނިންމާފައިވާ ކަމެއް ކަމަށްވެސް ވަނީ ވިދާޅުވެފައެވެ.
ވީއޭއެމުން ޒުވާން ގައުމީ ވޮލީބޯޅަ ޓީމު އެކުލަވާލިއިރު، އަންނަ އަހަރު ގިނަ މުބާރާތްތަކެއްގައި ޒުވާން ގައުމީ ވޮލީބޯޅަ ޓީމު ވާދަކުރާނެއެވެ. އޭގެ ތެރޭގައި އަންނަ އަހަރު ޗައިނާގައި ބާއްވާ އޭޝިއަން ޔޫތު ގޭމްސް އާއި، އެ އަހަރުގެ އޮގަސްޓް މަހު ތުރުކީގައި ބާއްވާ އިސްލާމިކް ސޮލިޑާރިޓީ ގޭމްސް ހިމެނެއެވެ.
