ޑިގްރީއާއެކު ކުރަން ޖެހޭ މަސައްކަތް ދެ ގުނަ!
ވަޒީފާ ހޯދުމަށް ތައުލީމީ ޒުވާނުން އުފުލަންޖެހޭ ބުރަ ބޮޑު
ގައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތުގެ ތެރެއިން
ނިމިދިޔަ ހަފްތާއަކީ ރާއްޖޭގެ ކޮލެޖު/ ޔުނިވަރސިޓީއިން ތައުލީމު ހާސިލްކުރި ބައެއް ދަރިވަރުންނަށް ވަރަށް މުހިންމު ހަފްތާއެކެވެ. އެ ދަރިވަރުންގެ ހަޔާތުގައި ތައުލީމު އުނގެނުމަށް ކުރި މަސައްކަތް ކާމިޔާބުވެ ސަނަދު ހާސިލްކުރިއިރު، ސަނަދާއިއެކު ދެން އެދަރިވަރުން އުފުލަންޖެހޭ ބުރަ ބޮޑެވެ. ކީއްވެ ހެއްޔެވެ؟.
ރާއްޖޭގައި އެކަށޭނެ މިންވަރަށް ވަޒީފާގެ ފުރުސަތު އެބައޮތްތޯއެވެ؟ މި ސުވާލުގެ ޖަވާބަށް ބައެއް ފަރާތްތަކުން އެބައޮތް ކަމަށް ބުނަމުން އަންނައިރު، އަނެއްބައި ފަރާތްތަކުން ބުނަމުން އަންނަނީ ނެތް ކަމަށެވެ. ކޮންމެއަކަސް ވަޒީފާ ހޯދުމަށް ގިނަ ޒުވާނުން (ޚާއްސަކޮށް ތައުލީމީ ޒުވާނުން) އުފުލަންޖެހޭ ބުރަ ބޮޑުކަމީ ފެންނަން އޮތް ހަގީގަތެކެވެ.
ޑިގްރީގެ ސަނަދާއެކު ލިބޭ އުފަލަށްވުރެ ވަޒީފާ ހޯދުމަށް ކުރަން ޖެހޭ މަސައްކަތް އޮތީ ބޮޑުވެފައެވެ. އަމިއްލަ ކުންފުނިތަކުންވެސް ތައުލީމީ ޒުވާނުން ވަޒީފާއަށް ނެގުމުގެ ބަދަލުގައި، ރަހުމަތްތެރިއެއްގެ ދަރިއެއް ނުވަތަ އޮފީސް މެނޭޖަރުގެ ރަހުމަތްތެރިއަކަށް ވަޒީފާދޭތަން އަންނަނީއެވެ. މިއީ ހަމައެކަނި އަމިއްލަ ކުންފުނިތަކުގެ ހާލަތެއް ނޫނެވެ. މިއީ ސަރުކާރު އޮފީސްތަކާއި ކުންފުނިތަކުގެ ވެސް ހާލަތެވެ. ގިނަ ފަހަރު ވަޒީފާ ދެމުން އަންނަނީ އޮފީހުގެ ނުފޫޒުގަދަ ފަރާތެއްގެ ދަރިއަކަށެވެ. ނުވަތަ އާއިލާ މީހަކަށެވެ. ނުވަތަ ރަހުމަތްތެރިއަކަށެވެ.
ވަޒީފާ ހޯދުމަށް ކުރާ މަސައްކަތް ބޮޑުވެ ބައެއް މީހުންނަށް ޖެހިފައިވާ ހާލަކީ, ކިޔެވި ދާއިރާ ނޫން ދާއިރާއަކުން ވަޒީފާ ހޯދުމެވެ. މިއީ ބައެއް ފަހަރު ތިމާގެ މޯޓިވޭޝަން ދަށްވާ ކަމެކެވެ.
މިކަން ހައްލުކުރުމަށް މިހާތަނަށް އެއްވެސް ސަރުކާރަކަށް އެކަށޭނެ ފިޔަވަޅެއް އެޅިފައިނުވާއިރު، ކޮންމެ ސަރުކާރަކުންވެސް ވޯޓާއި ދިމާކޮށް އަޑު ހަރުކޮށް ދައްކާ އެއްވާހަކައަކީ ވަޒީފާގެ ފުރުސަތު ހޯދައިދޭނެ ވާހަކައެވެ. މިއީ މިހާރު ދިވެހީން އެވާހަކަތަކަށް އައު ވާހަކަތަކެއްނޫނެވެ.
ޑިގްރީ ސަނަދާއެކު ދެން ކުރަން ޖެހޭ މަސައްކަތް ބޮޑުވެފައިވާ އަނެއް ސަބަބަކީ ސަނަދާއިއެކު ވެސް އެކަށޭނެ މުސާރައެއް ނުލިބުމުގެ މައްސަލައެވެ. އާންމުކޮށް ޑިގްރީއާއެކު ލިބޭ މުސާރައަކީ 15،000އެއްހާ ރުފިޔާއެވެ. އެހެންނަމަވެސް އެއީ (ޚާއްސަކޮށް) ފުރަ މާލޭގައި ދިރިއުޅޭ މީހަކަށް ދެކޮޅު ޖެހޭނެ މުސާރައަކަށް ނުވާނެ އެވެ.
އެހެންކަމުން މޮޅަށް ކިޔަވައިގެން ޑިގްރީ ހޯދާ ދަރިވަރުން ޑިގްރީގެ ސަނަދާއެކު ދެން ކުރަން ޖެހޭ މަސައްކަތް ވަނީ ދެގުނައަށް އިތުރުވެފައެވެ.
