މޯލްޑިވްސް ޕޮލިސް ސަރވިސްގެ ލޯންޗެއްގައި ގަސްދުގައި ރޯކޮށްލި މައްސަލައިގައި ދައުވާތައް އުފުލި ދެ މީހުންގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ދައުވާ އުފުލާފައި ވަނީ، ލ. ގަން، ތުނޑި، ލަވްސައިޑް ޢަބްދުއްލަޠީފް އާއި ލ. ކަޅައިދޫ ފިނިހިޔާގެ މޫސާ އިނާސްގެ މައްޗަށެެވެ. 

އާދިއްތަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމަކީ މި މައްސަލައިގައި އުފުލާފައިވާ ޓެރެރިސްޓް ޖަމާއަތަކަށް ތާއީދުކުރާ މީހެއް ކަމަށް ދޭހަވާ ފަދަ ލިޔުމެއް، ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާގެ ޝަރީއަތުގެ ކުރިން ހުށަހަޅާ ހުށަހެޅުންތަކަށް ވާހަކަ ދެއްކުމެވެ. އެގޮތުން މި މައްސަލައާ ގުޅިގެން ހުށަހަޅާފައިވާ ޓެރަރިޒަމްގެ ޢަމަލެއް ހިންގުމުގެ ކުށުގެ ދަޢުވާގެ ޝަރީއަތުގެ ކުރިން ހުށަހަޅާ ހުށަހެޅުންތަކުގެ ބައި ނިމި، މިހާރު އޮތީ އެ ހުށަހެޅުންތަކަށް ގޮތެއް ނިންމުމުގެ މަރުޙަލާގައެވެ.

މި އަޑުއެހުމުގައި ދިފާއީ ވަކީލު ވަނީ ބައެއް ލިއެކިއުންތައް ނުލިބޭ ކަމުގެ ޝަކުވާ ކުރައްވާފައެވެ. އަދި ދައުލަތުން ވެސް ވަނީ ދިފާއީ ވަކީލު ހުށަހަޅުއްވާފައިވާ މެއިލް ލިބިފައިވާކަން ކަށަވަރު ކުރުމަށް ވަގުތު ބޭނުންވާކަން ފާހަގަކުރައްވައި، ޓެރަރިޒަމްގެ ޢަމަލެއް ހިންގުމުގެ ކުށުގެ ދަޢުވާގެ ޝަރީއަތުގެ ކުރިން ހުށަހަޅާ ހުށަހެޅުންތަކަށް ގޮތެއް ނިންމެވުމުގެ ބައި ކުރިއަށް ގެންދިއުމަށް އެދިވަޑައިގަންނަވާފައެވެ. ނަމަވެސް ދިފާއީ ވަކީލު ވަނީ ދެ ދައުވާގެ ހުށަހެޅުންތަކަށް އެއް މަޖިލީހެއްގައި ބަހުސްކުރުމަށް ބޭނުންވާކަން ފާހަގަކުރައްވާފައެވެ.

އެކަމާ ގުޅޭގޮތުން މައްސަލަ ބައްލަވާ ގާޒީ ސޮފްވަތު ޙަބީބު ވިދާޅުވީ، ދިފާއުން ހުށަހަޅާފައިވާ 3 ހުށަހެޅުން ލިބުމުން، އެ ހުށަހެޅުންތައް ދިރާސާ ކުރުމަށް ދައުލަތަށް ވެސް ވަގުތު ބޭނުންވާނެ ކަމަށެވެ. ވުމާއެކު 27 އޮކްޓޯބަރުގެ 1400ށް އަޑުއެހުމެއް ތާވަލު ކުރައްވާނެކަމަށް ގާޒީ ވިދާޅުވިއެވެ. ގާޒީ ވިދާޅުވީ، އެ ދުވަހުގެ އަޑުއެހުމުގައި ދެފަރާތުން ހުށަހެޅުންތަކަށް ވާހަކަ ދެއްކުމުގެ ބައި ކުރިއަށް ގެންދަވާނެ ކަމަށެވެ. ދެފަރާތަށް ސް ލިއުމުން ހުށައެޅުންތައް ހުށަހެޅުމަށް ބޭނުންވާނަަަމަ އެ ފުރުސަތު ސް ގާޒީ ވަނީ ދެއްވާފައެވެ.

ގާޒީ ވިދާޅުވީ، 27 އޮކްޓޯބަރުގެ ފަހުން ބާއްވާ އަޑުއެހުމެއްގައި ހުށަހެޅުންތަކާ ގުޅޭގޮތުން ގޮތެއް ނިންމަވާނެ ކަމަށެވެ. އަދި އެއާއެކު އާދިއްތަ ދުވަހުގެ އަޑުއެހުން ވަނީ ކުރުކޮށްލައްވާފައެވެ. ގާޒީ ވަނީ ހުށަހެޅުންތައް ލިބިފައިވޭތޯ ދެފަރާތުން ވެސް ކުރިއަށް އޮތް ތަނުގައި ކަށަވަރު ކުރެއްވުމަށް ނަސޭޙަތްތެރިވެފައެވެ.

ލ. ގަން، ތުނޑި ބަނދަރު ސަރަހައްދުގައި އޮތް ފުލުހުންގެ ލޯންޗުގައި އަލިފާން ރޯކޮށްލާފައިވަނީ 22 މާރޗު 2020 ދުވަހުއެވެ.