އޮލިމްޕަސް ފުރިހަމައަށް ތަރައްގީކޮށް އަންނަ އަހަރުގެ މާޗުމަހުގެ ތެރޭގައި ހުޅުވޭނެ: މިނިސްޓްރީ
23 އޮކްޓޯބަރު 2021 | ހޮނިހިރު 10:22ޖުމްލަ 10 މިލިއަން ރުފިޔާ އޮލިމްޕަހަށް ޚަރަދުވެފައިވޭ
އޮލިމްޕަސް
މާލޭގައި ހުންނަ އޮލިމްޕަސް ފުރިހަމައަށް ތަރައްގީކޮށް އަންނަ އަހަރުގެ މާޗުމަހުގެ ތެރޭގައި ހުޅުވޭނެ ކަމަށް މިނިސްޓްރީ އޮފް އާރޓްސް، ކަލްޗަރ އެންޑް ހެރިޓޭޖުން ބުނެފިއެވެ.
ރާއްޖެއެމްވީއަށް މިނިސްޓްރީގެ ޑެޕިއުޓީ މިނިސްޓަރު މުހައްމަދު އިކްރާމް ވިދާޅުވީ އޮލިމްޕަސް ހޯލް އަޕްގްރޭޑިން މަޝްރޫއުގައި ސޮއިކޮށްފައިވަނީ މިމަހުގެ 21 ވީ ބުރާސްފަތި ދުވަހު ކަމަށްވާއިރު، ދާދި އަވަހަށް އަމަލީ މަސައްކަތް ފެށިގެންދާނެ ކަމަށެވެ. އިކްރާމް ވިދާޅުވީ މިހާރު ޕްލޭންކޮށްފައިވާ ގޮތަށް މަސައްކަތްތައް ކުރިއަށްދާ ކަމަށްވާނަމަ އަންނަ އަހަރުގެ މާޗް މަހުގެ ތެރޭގައި އޮލިމްޕަސް ތަރައްގީކުރުމުގެ މަސައްކަތް ނިންމައި އާއްމުންނަށް ހުޅުވާލާނެ ކަމަށެވެ. އަދި މަސައްކަތް ފަށައިގަތުމާއެކު އެކިއެކި ސަބަބުތަކާއި ހުރެ މަސައްކަތްތައް ލަސްވާކަން ވެސް އޭނާ ފާހަގަކުރެއްވިއެވެ.
އިކްރާމް ވިދާޅުވީ އޮލިމްޕަހުގެ ފުރަތަމަ ފިޔަވަހީގެ މަސައްކަތްތައް ނިމުމަކާ ގާތް ވެފައިވާ ކަމަށާއި އެކަމަށް ދެ މިލިއަން ރުފިޔާ ޚަރަދުވެފައިވާ ކަމަށެވެ. އިންޑިއާގެ ހިލޭ އެހީގެ ދަށުން ދެ ވަނަ ފިޔަވަހީގެ މަސައްކަތްތައް ފަށާއިރު، 8 މިލިއަން ރުފިޔާ ހޭދަވާނެ ކަމަށް އޭނާ ވިދާޅުވިއެވެ. ޖުމްލަ 10 މިލިއަން ރުފިޔާ ހޭދަވާކަން ފާހަގަކުރައްވައި އިކްރާމް ވިދާޅުވީ ރައްޔިތުން އެދޭ ފަދަ އޮލިމްޕަހެއް ލިބިގެންދާނެ ކަމަށެވެ.
އެންމެ ޒަމާނީ ފެންވަރަށް އޮލިމްޕަހުގެ ހޯލް އަޕްގްރޭޑް ކުރެވޭނެ ކަމަށާއި، ފިލްމްގެ ޕްރޮޖެކްޓްގެ ސްކްރީން ބަދަލުވެގެންދާނެ ކަމަށް އިކްރާމް ވިދާޅުވިއެވެ. އޭނާ ވިދާޅުވީ ޑިޖިޓަލް ސްޓޭންޑް، ސައުންޑް އިންސްޓޯލް ކުރެވިގެންދާނެ ކަމަށާއި، އިޝްތިހާރުތައް ދެއްކޭނެހެން ލެޑް ޕެނަލްއެއް ދޮރުމައްޗަށް ބަދަލުކުރާނެ ކަމަށެވެ. އަދި ވިދާޅުވީ ފިލްމް ނަގާ ކޮލިޓީގައި ފިލްމް ދެއްކޭނެ ކަމަށާއި، އޮލިމްޕަހުން ޚިދުމަތް ލިބިގަންނަ މީހުންނަށް އެތަނަކީ ފުރިހަމަ ތަނަކަށް ވެގެންދާނެ ކަމަށެވެ.
މީގެ އިތުރުން އިކްރާމް ވިދާޅުވީ އޮލިމްޕަސް ތަރައްގީ ކުރެވިގެންދިއުމާއެކު މިއުޒިކް އާޓިސްޓުންނަށް ވެސް ވަރަށް ބޮޑެތި ލުއި ފަސޭހަތަކެއް ލިބޭނެ ކަމަށެވެ. މިއުޒިކް ތަފާތު ހަރަކާތްތައް ބޭއްވުމަށް ފުރިހަމަ ހޯލެއް ހެޔޮ އަގުގައި ލިބިގެންދާނެ ކަމަށާއި، ސައުންޑް ސެޓް ނުވެ އިތުރު ޚަރަދުތަކެއް އަމިއްލަ އަތުން ކުރަން ނުޖެހޭނެ ކަމަށް އޭނާ ވިދާޅުވިއެވެ.
