61 ކިލޯ ޑްރަގް މައްސަލައިގައި ދައުވާކުރާ މީހުންގެ އަޑުއެހުމެއް މާދަމާ

ފުލުހުން ހިންގި އޮޕަރޭޝަނެއްގައި ހޯދި 61 ކިލޯގެ މަސްތުވާތަކެތީގެ މައްސަލައިގައި ހިމެނޭ 11 މީހެއްގެ މައްޗަށް ދައުވާ އުފުލާފައިވާ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

އަޑުއެހުން ތާވަލުކޮށްފައިވަނީ އާދިއްތަ ދުވަހުގެ މެންދުރު 14:30 އަށެވެ. މި މައްސަލައަކީ މިދިޔަ އަހަރުގެ މާޗު މަހުގެ 26 ވަނަ ދުވަހު ފުލުހުންގެ ޑްރަގް އިންޓެލިޖެންސް ޑިޕާޓްމަންޓާއި، ޑްރަގް އެންފޯސް ޑިޕާޓްމަންޓާއި، މެރިން ޕޮލިހުން ހިންގި އޮޕަރޭޝަނެއްގައި މަސް ދޯންޏަކުން 61.06 ކިލޯގެ ހެރޮއިން އަތުލައިގަތް މައްސަލައެކެވެ. މިތަކެތީގެ އަގު 72 މިލިއަން ރުފިޔާއަށް އަރާ ކަމަށް ފުލުހުން މައުލޫމާތު ދެއެވެ.

އެކަމާ ގުޅޭގޮތުން ޕީޖީ އޮފީހުން ބުނީ، މިއީ މ. ބޮއިލިންފިޝް، އަހުމަދު ވިސާމް ނަމަކަށް ކިޔާ މީހަކު އިސްވެހުރެ، އިތުރު ބަޔަކާ ބައިވެރިވެގެން ހިންގި ކަމެއް ކަމަށެވެ. މިތަކެތި އެތެރެކޮށްފައި ވަނީ "އިރުއަލިމަސް" ކިޔާ ދޯންޏެއްގައި ކަމަށް ވެސް ޕީޖީ އޮފީހުން ބުނެފައި ވެއެވެ.

އެހެންނަމަވެސް، މި މައްސަލައިގައި އިސްކޮށްހުރި ވިސާމް ބަންދުން ދޫކޮށްލުމަށް 24 ޖަނަވަރީ 2021 ދުވަހު ކްރިމިނަލް ކޯޓުން ނިންމިއެވެ. އެ ނިންމުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުން ހައިކޯޓުން ވަނީ ކްރިމިނަލް ކޯޓުގެ ނިންމުން ބާތިލުކޮށްފައެވެ. އެއާއެކު ވިސާމުގެ މައްސަލަވެސް އެ އެންމެންގެ މައްސަލައާއެކު ކުރިއަށްދެއެވެ.

މައްސަލައިގައި ދެން ހިމެނެނީ މުހައްމަދު ހަމީދު، ގދ. ރަތަފަންދޫ، ގުލްދަސްތާގެ، މުހައްމަދު މާއިޝް، މ. މާކޮޅު، މުހައްމަދު ޝާމިން، މއ. ވިރާހު، އަހުމަދު ޝިފާޒް، ހުޅުމާލޭ ފްލެޓް 06ޖީ4، އަބްދުﷲ ޝާމް، މއ. ބޯޅަކިންކިރިމާގެ، ހުސައިން ސުނާޒް، މ. މުލި، ސޯސަންވިލާ، ސައުދުﷲ ރަޝީދު، މ.ކެޕްރިކޯން، މުހައްމަދު ނަޝީދު، މ.މުލި، ހުދުފިނިފެންމާގެ، މުހައްމަދު މާއިދު، މ. ކޮޅުފުށި، އޯޝަންވިއު އަދި މުހައްމަދު ރިޟްވާން އިބްރާހިމް، މ. މުލި، މުޝްތަރީގެއެވެ.

މަސްތުވާތަކެތީގެ މައްސަލަތަކުގައި އެންމެ އިސްކޮށް އުޅޭ މީހުން ޖިނާއީ އަދުލުގެ ނިޒާމުގެ ތެރެއިން ދޫވާކަމުގެ ކަންބޮޑުވުން ވަރަށް ގިނަ ބަޔަކު އަބަދުވެސް ފާޅުކުރަމުންދެއެވެ.