ގައުމީ ޓީމުން ކުޅުދުއްފުށީގައި ޚާއްސަ މެޗެއް ކުޅެނީ

ރާއްޖޭގެ ގައުމީ ފުޓްބޯޅަ ޓީމުން ހދ. ކުޅުދުއްފުށީގައި ޚާއްސަ މެޗެއް ކުޅޭ ގޮތަށް ހަމަޖެހިއްޖެއެވެ.

ކުޅުދުއްފުށިން ހޮވާލެވޭ ޓީމަކާ ދެކޮޅަށް ގައުމީ ޓީމުން ކުޅޭ މި މެޗު އޮންނާނީ އަންނަ ހޮނިހިރު ދުވަހުއެވެ. މައުލޫމާތު ލިބޭ ގޮތުން މި މެޗަކީ އެ ރަށުގައި ސަރުކާރުގެ ފަރާތުން އެޅި ފެންވަރު ރަނގަޅު ޓާފް ދަނޑު ހުޅުވުމުގެ ގޮތުން ބާއްވާ ރަސްމިއްޔާތުގައި ކުޅެން ރޭވި މެޗެކެވެ. މި ރަސްމިއްޔާތުގައި ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވެސް ބައިވެރިވެވަޑައިގަންނަވާއިރު، އަންނަ ހުކުރު ދުވަހު ފާހަގަކުރާ މި އަހަރުގެ ޒުވާނުންގެ ދުވަސް ރަސްމީކޮށް ފާހަގަކުރުމަށް ސަރުކާރުން ހަމަޖައްސާފައިވަނީވެސް ކުޅުދުއްފުށީގައެވެ.

މައުލޫމާތު ލިބޭ ގޮތުން ކުޅުދުއްފުށީގައި ކުޅޭ މެޗަށް ގައުމީ ޓީމުގެ 23 ކުޅުންތެރިންގެ ސްކޮޑެއް ދާއިރު، ނިމިގެންދިޔަ "އުރީދޫ ސާފް ޗެމްޕިއަންޝިޕް 2021" ގައި ކުޅުނު ގައުމީ ޓީމުގެ ސްކޮޑަށް ކޮންމެވެސް ވަރެއްގެ ބަދަލުތަކެއް އަންނާނެއެވެ. އެގޮތުން ކުރިއަށް އޮތް 23 އަހަރުން ދަށުގެ ކޮލިފައިން މެޗުތައް ކުޅުމަށް ބަހްރޭނަށް ފުރާފައިވާ ޒުވާން ޑިފެންޑަރު ހައިޝަމް ހަސަން (ބިޑި) މި ދަތުރުގައި ބައިވެރިނުވާނެއެވެ. އަދި އަނިޔާގެ ސަބަބުން މިޑްފީލްޑަރު ހަމްޒާ މުހައްމަދު (ހަމްޕު) ވެސް ބައިވެރިނުވާނެ ކަމަށް މައުލޫމާތުލިބެއެވެ.

އަންނަ ހޮނިހިރު ދުވަހުގެ ހަވީރު ގައުމީ ޓީމުން ކުޅުދުއްފުށީގައި ޚާއްސަ މެޗެއް ކުޅޭއިރު، މި މެޗަކީ މި މަހުމާލޭގައި ކުރިއަށްދިޔަ ސާފް ޗެމްޕިއަންޝިޕަށް ފަހު ގައުމީ ޓީމުން ކުޅޭނެ ފުރަތަަމަ މެޗެވެ. ގައުމީ ޓީމުން އެންމެ ފަހުން މި ގޮތަށް ރަށެއްގެ ދަނޑު ހުޅުވަން މެޗެއް ކުޅުނީ ބ. އޭދަފުށީގައެވެ. އެއީ 2019 ވަނަ އަހަރުގެ މާޗު މަހުގެ 16 ވަނަ ދުވަހެ އެ ރަށުގައި އެޅި މަތީ ފެންވަރުގެ ފީފާ އެޕްރޫވްޑް ޓާފް ދަނޑު ހުޅުވުމުގެ ގޮތުން ކުޅުނު ޚާއްސަ މެޗެވެ. އެކަމަކު އެ މެޗުގައި ގައުމީ ޓީމުގައި ހިމެނޭ އޭދަފުށީ ކުޅުންތެރިން ކުޅެފައިވަނީ އަމިއްލަ ރަށު ޓީމަށެވެ.

ކުޅުދުއްފުށީގައި ގައުމީ ޓީމުން ޚާއްސަ މެޗެއް ކުޅުމަށް ތާވަލުކުރިއިރު، އެ ރަށުގައި 2015 ވަަނަ އަހަރު ވަނީ ޕްރެޒިޑެންޓްސް ކަޕުގެ އެއް ގްރޫޕެއްގެ މެޗުތައް ކުޅެފައެވެ. އެގޮތުން ނިއު ރޭޑިއަންޓް ސްޕޯޓްސް ކުލަބާއި، ބީޖީ ސްޕޯޓްސް ކުލަބާއި، ޓީސީ ސްޕޯޓްސް ކުލަބު އަދި މަހިބަދޫ ސްޕޯޓްސް ކުލަބު ވާދަކުރި ގްރޫޕުގެ މެޗުތައް އެ ރަށުގައި ކުޅުނެވެ.

މި އަހަރުގެ ސާފް ޗެމްޕިއަންޝިޕަށްފަހު ގައުމީ ޓީމުން ޚާއްސަ މެޗެއް ކުޅޭއިރު، ގައުމީ ޓީމަށް ދެން އެންމެ އަވަހަށް އޮތީ ސްރީ ލަންކާގައި އަންނަ ނޮވެމްބަރު މަހު ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ އިންޓަނޭޝަނަލް މުބާރާތެވެ. އެ މުބާރާތުގައި ހަތަރު ގައުމު ވާދަކުރާއިރު، މުބާރާތުގެ ކުޅުން ކުރިއަށްދާނީ އަންނަ މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށެވެ.