2023ގައި ބާއްވާ ރިޔާސީ އިންތިޚާބަކީ ކާމިޔާބު އިންތިޚާބަކަށް ވާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީޤް ވިދާޅުވެއްްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ފުއާދު ވިދާޅުވީ, އިލެކްޝަންސް ކޮމިޝަންގައި މިހާތަނަށް ކުރެވުނު ތަޖުރިބާތަކަށް ބަލާއިރު، ރައްޔިތުންގެ މެދުގައި އިލެކްޝަންސް ކޮމިޝަންއަށް އޮންނަ އިތުބާރު ކުރިއަށްވުރެ މިހާރު ބޮޑުވެފައިވާކަން ފާހަގަކުރެވުނު ކަމަށެވެ. އިންތިޚާބުތައް ކުރިއަށްދާއިރު އިންތިޚާބުތަކާމެދު ޝައްކު އުފައްދާ ބަޔަކުވެސް އުޅޭ ކަމަށާއި, އެހެންނަމަވެސް އިންތިޚާބު ނިމުމުން, އެއީ ގޯހުން ގޯހަށް ދިޔަ އިންތިޚާބެކޭ ބުނާނެ މީހަކު މިހާރު ނޫޅޭ ކަމަށް ފުއާދު ވިދާޅުވިއެވެ.
ފުއާދު ވިދާޅުވީ މީގެ ކުރީގެ އަހަރުތަކަށް ބަލާއިރު، 2013 ވަނަ އަހަރު ބޭއްވުނު އިންތިޚާބު ބެއްވުމުގެ ކުރިން ރައްޔިތުންގެ ހިތުގައި ގިނަ ސުވާލުތަކަކާއި، ހަމަނުޖެހުންތަކެއްވެސް އޮތް ކަމަށެވެ. އެހެންނަމަވެސް 2018 ވަނަ އަހަރު ބޭއްވި އިންތިޚާބު ކަައިރިވީއިރު ރައްޔިތުން ތިބީ ވަރަށް ބޮޑަށް ހަމަޖެހިފައިކަމަށެވެ. އަދި ނަތީޖާ ނިކުތުމުންވެސް ރައްޔިތުންގެ އަމަލުތައް ހުރި ގޮތް ވަރަށް ތަފާތު ކަމަށެވެ.
ފުއާދު ވިދާޅުވީ 2023ގައި ބާއްވަން ނިންމާފައިވާ ރިޔާސީ އިންތިޚާބުގެ ކުރިންވެސް އަދި ފަހުންވެސް މިފަދަ އެއްވެސް ކަމެއް ނުހިނގާނެފަދަ ގޮތަކަށް އިންތިޚާބުގެ ކަންކަން ރޭވުމަށް މަސައްކަތްކުރައްވާނެ ކަމަށެވެ. އަދި ކުރިއަށްވުރެ ބޮޑަށް މިހާރު އިލެކްޝަންސް ކޮމިޝަނާމެދު ރައްޔިތުން ކުރާ އިތުބާރާއި، އެ ކޮމިޝަންގެ މަސައްކަތްތަކަށް ލިބޭ އެއްބާރުލުންވެސް ބޮޑު ކަމަށް ފުއާދު ވިދާޅުވިއެވެ.
އެހެންވީމަ އަޅުގަނޑު ވަރަށް އުންމީދާ އެކީގައި މިހުރީ. 2023ގައި ކާމިޔާބު ރިޔާސީ އިންތިޚާބެއް ބޭއްވޭނެ ކަމަށް.އިލެކްޝަންސް ކޮމިޝަންގެ ރައީސް ފުއާދު ތައުފީޤް
މީގެ އިތުރުން އިންތިޚާބުތަކުގެ ސައްހަކަމާދޭތެރޭގައި ކޯޓުން ގޮތް ނިންމުމަކީ ރަނގަޅު ގޮތެއް ނޫން ކަމަށް ފުއާދު ވިދާޅުވިއެވެ. 2013ގައި ކުރިއަށްދިޔަ އިންތިޚާބުގައި ކޯޓުން ގޮތް ނިންމަން ޖެހުމުގެ ސަބަބުން މިކަމަށް ދައުލަތުން ވަރަށް ބޮޑު ޚަރަދެއް ކުރަންޖެހުނުކަން ފުއާދު ފާހަގަކުރެއްވިއެވެ.
އެހެންނަމަވެސް ކޯޓުގެ ނިންމުންތަކުގެ ސަބަބުން އެއްވެސް ބަދަލެއް އައިސްފައި ނުވާކަމަށާއި، ކުރިއަށްއޮތްތަނުގައި ޖުޑީޝަރީން އިލެކްޝަންސްގެ ތެރެއަށް ނުވަނުމަށް ފުއާދު ވަނީ އެދިވަޑައިގެންފައެވެ.
