ޑަބްލިއުޑީސީގެ މުސާރަ އަންނަ އަހަރުން ފެށިގެން ބޮޑުވާނެ: ފިނޭންސް
20 އޮކްޓޯބަރު 2021 | ބުދަ 08:47މުސާރައިގެ އާ އޮނިގަނޑު ވަނީ އެލްޖީއޭއަށް ފޮނުވާފައި
ފިނޭންސް މިނިސްޓްރީ،
އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ)ގެ މުސާރަ އަންނަ އަހަރުން ފެށިގެން ބޮޑުވާނެ ކަމަށް ފިނޭންސް މިނިސްޓްރީން ބުނެފިއެވެ.
ޑަބްލިއުްީސީގެ މުސާރައާ ބެހޭ ގޮތުން ރާއްޖެއެމްވީއަށް މައުލޫމާތުދެމުން ފިނޭންސް މިނިސްޓްރީން ބުނީ މުސާރަ ބޮޑު ކުރުމަށް ރައީސް އިބްރާހިމް މުހައްމަދު ޞާލިޙް ނިންމެވުމާއެކު، އެމަސައްކަތް މިނިސްޓްރީގެ ފަރާތުން ކޮށް ނިމިފައިވާ ކަމަށާއި، މުސާރައިގެ އާ އޮނިގަނޑު ލޯކަލް ގަވަރުމަންޓް އޮތޯރިޓީ (އެލްޖީއޭ)އަށް ފޮނުވާފައިވާ ކަމަށެވެ. އެހެންކަމުން މިހާރު އެލްޖީއޭއިން ކުރަންޖެހޭ މަސައްކަތްތައްކޮށް ކައުންސިލްތަކަށް އަންގަމުންދާނެ ކަމަށް މިނިސްޓްރީން ބުނެއެވެ.
އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުން ބާރުވެރި ކުރުވުމަކީ މި ސަރުކާރުގެ އަމާޒެކެވެ. އަދި އެ ކޮމިޓީގެ މަސައްކަތްތައް ކުރެއްވުމަށް މަގުފަހިކުރެވެން ހުރި ކަންކަމުގައި ސަރުކާރުން އެހީތެރިވެދެއްވާނެ ކަމަށް މީގެކުރިން ރައީސް ވަނީ ވިދާޅުވެފައެވެ.
ލާމަރުކަޒީ ގާނޫނުގެ ދަށުން ފުރަތަމަ ފަހަރަށް އަންހެނުންގެ ތަރައްގީއަށް މަސައްކަތްކުރާ ކޮމެޓީތައް ރަށްރަށަށް އިންތިޚާބުކޮށްފައިވާއިރު، އެކޮމެޓީން ގިނަ މަސައްކަތްތަކެއް ކުރުމަށް ރާވާފައިވެއެވެ. އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރަކަށް މިހާރު އެލަވަންސްގެ ގޮތުގައި ލިބެނީ 2500 ރުފިޔާއެވެ. އަދި ކޮމެޓީގެ ރައީސާއަށް 3000 ރުފިޔާ ލިބެއެވެ. ނަމަވެސް މުސާރަ ބޮޑު ކުރަން ނިންމި ނިންމެވުމާއެކު، 01 ޖަނަވަރީ 2022 އިން ފެށިގެން ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސްއަކަށް ޖުމްލަ 6000 ރުފިޔާ ލިބޭނެއެވެ. ނައިބު ރައީސްއަކަށް 5000 ރުފިޔާ އަދި މެންބަރަކަށް 4000 ރުފިޔާ ލިބޭނެއެވެ.
ސިޓީ ކައުންސިލްތަކުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސްއަކަށް ޖުމްލަ 7000 ރުފިޔާ ލިބޭނެއެވެ. ނައިބު ރައީސްއަކަށް 6000 ރުފިޔާ އަދި މެންބަރަކަށް 5000 ރުފިޔާ ލިބޭނެއެވެ. މުސާރައިގެ ޖުމްލަ ހިމަނާފައިވަނީ ސިޓިންގ އެލަވަންސް ގެ ގޮތުގައި ކޮންމެ ބައްދަލުވުމަކަށް 500 ރޭޓުންނެވެ. ސިޓިން އެލަވަންސް ގެ ގޮތުގައި ގިނަވެގެން ނެގޭނީ 2000 ރުފިޔާ އެވެ.
