އާއިލާއެއްގެ ގިނަ މެމްބަރުންތަކެއް މަރުވި މައްސަލާގައި ފައިސާ ދޭން އެމެރިކާއިން ހުށަހަޅައިފި

އެމެރިކާ ސިފައިން ޑްރޯން މެދުވެރިކޮށް އަފްޣާނިސްތާންގައި ދިން ހަމަލާއެއްގައި އެއް އާއިލާއެއްގެ ގިނަ މެމްބަރުންތަކެއް މަރުވި މައްސަލާގައި, އެއާއިލާގެ މިހާރު ދުނިޔޭގައި ތިބި މީހުންނަށް ފައިސާ ދޭން އެމެރިކާއިން ހުށަހަޅައިފިއެވެ.

އޮގަސްޓް މަހުގެ 29 ވަނަ ދުވަހު ކާބުލްް އެއާޕޯޓަށް ދަތުރުކުރަމުންދިޔަ ވެހިކަލަކަށް އެމެރިކާ ސިފައިން ޑްރޯން މެދުވެރިކޮށް ދިން ހަމަލާގައި ވެހިކަލާއި ކައިރީގައި ހުރި ގެއެއްގައި ރޯވެ 10 މީހަކު މަރުވެފައިވެއެވެ. މި ހާދިސާގައި މަރުވި މީހުންގެ ތެރޭގައި ދެ އަހަރުގެ ކުޑަ ކުއްޖަކުވެސް ހިމެނެއެވެ. މަރުވި މީހުންގެ ތެރޭގައި 7 ކުޑަކުދިން ހިމެނޭ ކަމަށް ވެސް ބޭރުގެ ރިޕޯޓުތަކުން ބުނެއެވެ.

މީޑިއާތަކުގައި ރިޕޯޓުކޮށްފައިވާގޮތުން މި ހަމަލާއާއި ގުޅިގެން އެމެރިކާގެ ސެންޓްރަލް ކޮމާންޑްގެ ތަރުޖަމާނު ވަނީ, ކުށެއް ނެތް ބަޔަކު އެމެރިކާގެ ހަމަލާއެއްގައި މަރުވުމުން ހިތާމަ ކުރާކަމަށް ވިދާޅުވެފައެވެ. އަދި އެހަމަލާ ނުދިން ނަމަ އަދި އިތުރު އެތައް ބަޔަކު މަރުވުމުގެ ފުރުސަތު ބޮޑުކަމަށް ތަރުޖަމާނު ވިދާޅުވިއެވެ. ނަމަވެސް މި ހާދިސާއާ ގިނަ ގުޅިގެން ގިނަ ބައެއްގެ ފާޑު ކިޔުން އަމާޒުވެފައިވަނިކޮށް, ހަމަލާ ދެވުނީތީ އެމެރިކާގެ ސަރުކާރުން މައާފަށް އެދިފައިވެއެވެ. ނަމަވެސް އާއިލާގެ ދުނިޔޭގައި ތިބި ބައެއް މެމްބަރުން ބުނެފައިވަނީ މައާފަށް އެދުމުން ނުފުދޭނޭ ކަމަށާއި، ދެވުނީ ވަރަށް ބޮޑު އަނިޔާއެއް ކަމަށެވެ. އަދި ހަމާލާގައި މަރާލެވުނީ އެއްވެސް ހަނގުރާމަވެރި ޖަމާއަތަކާ ގުޅުމެއް ނެތް ކުޑަކުދިންތަކެއް ކަމަށް, އާއިލާއާ ހަވާލާދީ މީޑިއާތަކުގައި ރިޕޯޓުކޮށްފައިވެއެވެ.

މި ހަމަލާއާ ގުޅިގެން އިތުރު މަޝްވަރާތައް ކުރަމުންދާއިރު، އެމެރިކާގެ ޑިޕާޓްމަންޓް އޮފް ޑިފެންސްއާއި ސްޓޭޓް ޑިޕާޓްމަންޓް ގުޅިގެން ވަނީ ބަދަލެއް ގޮތުގައި ފައިސާ ދިނުމަށް ހުށަހަޅާފައެވެ.