މަހުމޫދުގެ މަރު: އިތުރު ގެތައް ބަލައި ފާސްކުރަނީ!
16 އޮކްޓޯބަރު 2021 | ހޮނިހިރު 09:29ގިނަ އަދަދެއްގެ ފުލުހުން ދަނީ އެރަށުގައި ހަރަކާތްތެރިވަމުން
މަހުމޫދުގެ ހަށިގަނޑު ފެނުނު ވަޅު
އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލާގައި އެރަށުގެ އިތުރު ގެތައް ބަލައި ފާސްކުރަން ފަށައިފިއެވެ.
އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި، ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބި އެވެ.
މިމަރާ ގުޅިގެން ތަހުގީގު ކުރިއަށްދާއިރު، ގިނަ އަދަދެއްގެ ފުލުހުން ދަނީ އެރަށުގައި ހަރަކާތްތެރިވަމުންނެވެ.
ރާއްޖެއެމްވީއަށް މައުލޫމާތު ލިބޭ ގޮތުގައި މަހުމޫދުގެ ހަށިގަނޑު ފެނުނު ގެއާ ކައިރި ހިސާބުގެ ގެތައް ބަލައި ފާސްކުރުމުގެ މަސައްކަތްތައް ފުލުހުން ކުރަމުންދެއެވެ. އަދި މުޅި ސަރަހައްދު ވަނީ އާއްމުންނަށް ނުވަދެވޭނެ ގޮތަށް ބަންދުކޮށްފައެވެ. މީހުން ދިރިއުޅޭ ގެތައް ބަލައި ފާސްކުރަމުންދާއިރު، ބިދޭސީއަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމުގެ މައުލޫމާތު ލިބެއެވެ. ނަމަވެސް އެމީހާ ފުލުހުންގެ ބެލުމުގެ ދަށަށް ގެންގޮސްފައިވަނީ ކޮން ސަބަބަކާއި ހުރެ ކަމެއް ސާފެއް ނުވެއެވެ.
ތަހުގީގު އިތުރަށް ވަރުގަދަ ކޮށްފައިވާ ކަމަށް ފުލުހުން ބުނި ނަމަވެސް އިތުރު ތަފްސީލު ހާމަކޮށްފައިނުވެއެވެ.
މަހުމޫދުގެ މަރުގެ މައްސަލާގައި އެރަށުގެ ރައްޔިތުން ދެމީހަކަށް ތުހުމަތު ކުރެއެވެ. އެ ދެމީހުން ވެސް މިހާރު ތިބީ ފުލުހުން ބަންދުގައެވެ.
