މަހުމޫދުގެ މަރުގެ މައްސަލަ: ތުހުމަތުކުރެވޭ ތިން މީހުން ބަންދުގައި
15 އޮކްޓޯބަރު 2021 | ހުކުރު 12:53މި މައްސަލައިގެ ތުހުމަތުކުރެވެނީ އެރަށަށް ގޮސްއުޅޭ ދެ މީހަކަށް
މަހްމޫދު މަރާއެކު މުޅި ރަށަށް ސިހުން، ދެ މީހަކު ހައްޔަރުކޮށްފި
އަރިއަތޮޅު ދެކުނުބުރީ ދަނގެތީގައި އަނިޔާވެރިގޮތަކަށް މަރާލާފައި އޮއްވާ ފެނުނު މަހުމޫދު އަބޫބަކުރު މަރާލި ކަމަށް ތުހުމަތުކުރެވޭ ތިން މީހުން މިވަގުތު ތިބީ ފުލުހުންގެ ބެލުމުގެ ދަށުގައި ކަމަށް ފުލުހުން ބުނެފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަހުމޫދުގެ މަރާގުޅިގެން އެރަށު ރައްޔިތުން ދެ މީހަކަށް ތުހުމަތު ކުރެއެވެ. އެއީ އެރަށަށް ގޮސް އުޅޭ އެހެން ރަށެއްގެ ދެ މީހުންނެވެ. މި މައްސަލައިގައި އަދިވެސް އިތުރު މީހަކަށް ތުހުމަތުކުރެވޭއިރު، ތުހުމަތު ކުރެވޭ އެންމެން އދ. މަހިބަދޫއަށް ގެންގޮސްފައިވާކަމުގެ މައުލޫމާތު ރާއްޖެއެމްވީއަށް ވަނީ ލިބިފައެވެ.
މިކަމާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބުދެމުން ފުލުހުން ބުނީ މަހުމޫދުގެ މަރުގެ މައްސަލައިގައި ތުހުމަތުކުރެވޭ މީހުން މިވަގުތު ތިބީ ފުލުހުންގެ ބަންދުގައި ކަމަށެވެ. އެމީހުން ބަންދުގައި ތިބީ ތަހުގީގުކުރަމުންދާ މައްސަލައަކާއި ގުޅިގެން ސުވާލުކުރުމަށް ކަމަށް ބުނެފައިވެއެވެ. އެއީ ސީދާ މަހުމޫދުގެ މަރުގެ މައްސަލަކަމެއް ބުނެފައެއް ނުވެއެވެ.
އެމީހުން އަމިއްލައަށް މަހިބަދޫއަށް ގޮސްފައިވާކަމަށް ދެކެވޭ ވާހަކަތަކާއި ގުޅިގެން ފުލުހުން ބުނީ އެމީހުން މަހިބަދޫއަށް ގެންގޮސްފައިވަނީ ފުލުހުންގެ ބެލުމުގެ ދަށުގައި ކަމަށެވެ.
މަހުމޫދުގެ ހަށިގަނޑުގެ އިތުރު ތަހުލީލުތަކެއް ހެދުމަށް ހުކުރު ދުވަހުގެ ހެނދުނުގެ ވަގުތެއްގައި ހަށިގަނޑު މާލެ ގެނެސްފައިވެއެވެ. މައުލޫމާތު ލިބޭ ގޮތުގައި ސީޓީ ސްކޭނެއްގެ އިތުރުން އެހެން ޓެސްޓުތަކެއް ވެސް އައިޖީއެމްއެޗްގައި ހަދާފައިވެއެވެ. ކަނޑު ގަދަވުމާއެކު މާލެ ގެނައުމަށާއި، ރަށަށް ގެންދިއުމުގައި ކޯސްޓްގާޑުން އެހީތެރިކަން ފޯރުކޮށްދީފައިވެއެވެ. އެއަށްފަހު މަހުމޫދުގެ ހަށިގަނޑު ވަނީ އަލުން އެރަށަށް ގެންގޮސްފައެވެ.
މަހުމޫދުގެ ކަށުކަމާކެމީގެ ކަންކަން ކުރިއަށްގެންދާނީ ދަނގެތީގައެވެ.
