މާތް ނަބިއްޔާﷺ އުއްމަތަށް ދޫކުރެއްވި ތަރިކައިގައި ވަރުގަދައަށް ހިފާ، މަގު އޮޅިގެން ނުދާނެ: ޚުތުބާ
15 އޮކްޓޯބަރު 2021 | ހުކުރު 08:00އެކަލޭގެފާނުގެ މަތިވެރި ސީރަތުން ނަމޫނާ ލިބިގަންނަން ޖެހޭ
ހުކުރު ނަމާދުކުރުމަށް އިސްލާމީ މަރުކަޒުގައި ޖަމާއަތް ހަދައިގެން،
މާތް ނަބިއްޔާﷺއިސްލާމީ އުއްމަތަށް ދޫކުރެއްވި ތަރިކައިގައި ވަރަށް ވަރުގަދައަށް ހިފުމަށް ހުކުރު ޚުތުބާގައި ގޮވާލައިފިއެވެ.
''ކީރިތި މާތް ނިބިއްޔާﷺދެކެ ލޯބިވުން'' މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ޚުތުބާގައި ބުނީ މާތްﷲ ބާވާލެއްވި ފޮތާއި، ރަސޫލާﷺދެއްކެވި ގޮތާއި އެކަލޭގެފާނުގެ ސުންނަތުގައި ހިފަހައްޓައިފިކަމުގައިވާނަމަ ދުވަހަކު ވެސް މަގުއޮޅިގެން ނުދާނެ ކަމަށެވެ.
ޚުތުބާގައި ބުނީ މާތް ނަބިއްޔާއަށް ލޯބިކުރުމުގެ އެންމެ މުހިއްމު އަލާމާތަކީ އެކަލޭގެފާނަށް ފުރިހަމައަށް ތަބާވުމާއެކު، އެކަލޭގެފާނުގެ މަތިވެރި ސީރަތުން ނަމޫނާ ލިބިގަތުން ކަމަށާއި، އުއްމަތަށް ދައްކުވައިދެއްވި ރިވެތި އަހުލާގީ މިންގަނޑުތަކަށް ތަބާވުން ކަމަށެވެ. ތެދުބަސް ބުނުމާއި، ކެތްތެރިވުމާއި، އަދުލުވެރިވުމާއި، އެއްބަޔަކު އަނެއް ބަޔަކަށް އިހްތިރާމް ކުރުމާއި، މަޑުމޮޅިވުމާއި، މިނޫންވެސް އެކަލޭގެފާނު ގެނެސްދެއްވި އަހުލާގީ އެންމެހާ ސިފަތަކުން ޒީނަތްތެރިވުން ކަމަށް ޚުތުބާގައި ބުނެފައިވެއެވެ.
އިސްލާމް ދީނާއި މާތް ނަބިއްޔާ ދިފާއުކުރުމަކީ ކޮންމެ މުސްލިމެއްގެ މައްޗަށް ވެސް ވާޖިބު ކަމެއްކަން ފާހަގަކޮށް ޚުތުބާގައި ބުނީ ނަބީބޭކަލުންނަށް ފުރައްސާރަ ކުރުމަކީ އިއްޔެއަކު އަދަކު ކުރިމަތިވެގެން އުޅޭ އާ ކަމެއް ނޫން ކަމަށެވެ. މީސްތަކުންގެ ގާތަށް މާތްﷲ ފޮނުއްވި ކޮންމެ ނަބީބޭކަލަކާއި، ރަސޫލު ބޭކަލަކަށް ފުރައްސާރަކުރި ބަޔަކުވާ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މާތް ނައްބިޔާގެ އަދުލުވެރިކަމާއި، އޯގާވެރިކަމާއި، މާތްކަމާއި، އެކަލޭގެފާނު ގެނެސްދެއްވި ޚަބަރުތަކުގެ ތެދުކަމުގެ މައްޗަށް މިތުރުންނާއި ހަތުރުން ހެކިވާނެ ކަމަށެވެ. އަދި އެކަލޭގެފާނަށް އީމާންވާ، އެކަލޭގެފާނު ދެކެލޯބިވާ މީހުންގެ އަދަދު ދަނީ ދުވަހެއް ދުވަހަކަށް އިތުރުވަމުންކަން ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ އެމީހެއްގެ އަމިއްލަ ނަފްސާއި، މުދަލާއި، އަނބިދަރީންނަށް ވުރެ ބޮޑަށް އެކަލޭގެފާނު ދެކެ ލޯބިވެ، އެކަލޭގެފާނަށް ނަޞްރުދީގެން މެނުވީ، އެއްވެސް މުސްލިމެއްގެ އީމާންކަން ފުރިހަމައެއް ނުވާނެ ކަމަށެވެ.
