ރައީސް ސާލިހާ އޮތް ގުޅުން ދުވަހަކުވެސް ނުކެނޑޭނެ - ރައީސް ނަޝީދު
13 އޮކްޓޯބަރު 2021 | ބުދަ 09:52ރައީސުލްޖުމްހޫރިއްޔާއާއި އޮތް ގުޅުން ހީނަރުވިޔަސް އިބްރާހިމް މުހައްމަދު ސާލިހާއި އޮތް ގުޅުން ހީނަރެއް ނުވާނެ
ރައީސް ނަޝީދު ރާއްޖެ ވަޑައިގެންނެވުމުން ރައީސް ސާލިހު އެމަނިކުފާނަށް މަރުހަބާ ވިދާޅުވުން
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި އޮތް ގުޅުން ދުވަހަކުވެސް ނުކެނޑޭނެކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ސާލިހާއި، ރައީސް ނަޝީދަކީ ޒަމާންވީ ދެ އެކުވެރިންނެވެ.
މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ، ސިޔާސީ ގޮތުން ރައީސް ސާލިހާއިއެކު މަސައްކަތް ކުރުމަށް ބޭނުން ނުވާކަމަށް ވިދާޅުވި ނަމަވެސް އެމަނިކުފާނާއި ރައީސުލްޖުމްހޫރިއްޔާއާއި އޮތް ގުޅުން ހީނަރުވި ނަމަވެސް އިބްރާހިމް މުހައްމަދު ސާލިހާއި އޮތް ގުޅުން ހީނަރު ނުވާނެކަމަށެވެ. އަދި ދުވަހަކުވެސް ރައީސުލްޖުުމްހޫރިއްޔާއާއިވެސް އަދި އަދި އިބްރާހިމް މުހައްމަދު ސާލިހާއިވެސް ވާހަކަ ނުދައްވަކައި ހުންނެވުމަކީ އެމަނިކުފާނު ދުވަހުވެސް ހިތްޕުޅަށް އަރާ ވަޑައިގަތް ކަމެއް ނޫން ކަމަށެވެ.
ރައީސް ނަޝީދު ވިދާޅުވީ ރާއްޖެއަށް ބަރުލަމާނީ ނިޒާމެއް ގެނައުމަށް މަސައްކަތްޕުޅު ކުރައްވަނީ ރައީސް އިބްރާހިމް މުހައްމަދު ސާލިހާއި މަޝްވަރާ ކުރައްވައިގެން ކަމަށެވެ. އަދި މިއީ އެކަން ކުރައްވަން އެންމެ ރަނގަޅު ވަގުތުކަމަށް ރައީސް ނަޝީދު ވިދާޅުވިއެވެ. އެމަނިކުފާނު ވިދާޅުވީ ރާއްޖެއަށް ހެޔޮގޮތްތައް ވާނީ ރަނގަޅު ބަރުލަމާނީ ނިޒާމެއް އޮވެގެން ކަމަށެވެ. އެކަން ކުރެވޭނީ ރައީސް ސާލިހާއި ވާހަކަފުޅު ދައްކަވައިގެން ކަމަށްވުމުން އެކަން ވަރަށް އަވަހަށް ހާމަ ކުރައްވާނެކަމަށެވެ.
ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް އެމްޑީޕީގެ އާންމު މެންބަރުންތަކެއް ދަނީ ކުރަމުންނެވެ. މި ޕެޓިޝަން ރައީސުލްޖުމްހޫރިއްޔާގެ އިތުރުން ރައްޔިތުންގެ މަޖިލީހަށްވެސް ހުށައަޅާނެ ކަމަށް މިކަން އިންތިޒާމު ކުރާ ޓީމުންވަނީ ބުނެފައެވެ.
