މުޅިން އަލަށް އިންޑޯ ކްރިކެޓް ރާއްޖެއަށް ތައާރަފުކޮށްފި

މާލެ ކުޅިވަރު އެކުވެނި އިންޑޯ ހޯލުގައި ޕްލެޔާސް ލައުންޖް ހުޅުވައިދެއްވައި، "ހިތާއި ރޫހުން ކުޅޭށެ ކްރިކެޓް" ގެ ލޯގޯ އަދި އިންޑޯ ކްރިކެޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިފުތިތާހުކޮށްދެއްވައިފިއެވެ.

ހޮނިހިރު ދުވަހުގެ ހަވީރު ބޭއްވި ރަސްމިއްޔާތުގައި ރައީސް ޞާލިޙް ވަނީ ޕްލެޔާސް ލައުންޖް ހުޅުވައިދެއްވައި، އެތަން ބައްލަވައިލައްވާފައެވެ. މި ރަސްމިއްޔާތުގައި ރައީސް ޞާލިޙުގެ އަރިހުގައި ނައިބު ރައީސް ފައިޞަލް ނަސީމާއި، ކްރިކެޓް ބޯޑް އޮފް މޯލްޑިވްސްގެ ރައީސް މުޙައްމަދު ފައިޞަލާއި، މިލާން ކްރިކެޓް އެކެޑަމީގެ ފައުންޑާ އަދި ރައީސް ފަރުހަތު ޖަލީލް ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަފުޅުދައްކަވަމުން ކްރިކެޓް ބޯޑުގެ ރައީސް ފައިޞަލް ވިދާޅުވީ ކޮވިޑް-19 އާ ގުޅިގެން އެހެން ހުރިހާ ކުޅިވަރުތަކެކޭ އެއްގޮތަށް ކްރިކެޓަށްވެސް ވަރަށް ބޮޑެތި ގޮންޖެހުންތަކެއް ކުރިމަތިވި ކަމަށެވެ. އެގޮތުން މިދިޔަ ދުވަސްތަކުގައި ކްރިކެޓުގެ އެއްވެސް އަމަލީ މަސައްކަތެއް ކުރެވިފައި ނުވާ ކަމަށާއި، ނަމަވެސް ކްރިކެޓް ހިންގުމުގެ އިތުރުން ބައެއް އިންފްރާސްޓްރަކްޗާތައް ގާއިމުކުރުމުގެ މަސައްކަތް ކުރެވުނު ކަމަށްވެސް ވިދާޅުވިއެވެ.

ފައިޞަލް ވިދާޅުވީ މިހާތަނަށް ކުރެވުނު މަސައްކަތަކުގެ ތެރެއިން އެންމެ ބޮޑަށް ފާހަގަކޮށްލެވެނީ ވައިޑީޕީގެ އައު ސްޓްރަކްޗާގެ މަސައްކަތް ކަމަށާއި، އެޑިއުކޭޝަން މިނިސްޓްރީން ހުއްދަލިބުމާއެކު ސްކޫލުތަކާ ގުޅިގެން އެ ޕްރޮގްރާމް ފައްޓާނެ ކަމަށްވެސް ވިދާޅުވިއެވެ. އަދި މިހާރު އެންމެ ބޮޑު އެއް އަމާޒަކީ 2030 ވަނަ އަހަރަށް އަމާޒުކޮށް ދުރުރާސްތާ ޕްލޭނެއް އެކުލަވާލުން ކަމަށާއި، އެ މަސައްކަތްވެސް ކުރިއަށްދާ ކަމަށް ވަނީ ވިދާޅުވެފައެވެ.

ހޮނިހިރު ދުވަހުގެ ހަވީރު ޕްލެޔާސް ލައުންޖަކީ ރާއްޖޭގެ އެންމެ ދުވަސްވީ ކްރިކެޓް އެކެޑަމީ ކަމުގައިވާ މިލާން ކްރިކެޓް އެކެޑަމީގެ ފަރާތުން "ޖަލީލް މާލަން" ގެ ނަމުގައި ތަރައްގީކޮށް، ކްރިކެޓް ބޯޑަށް ހަދިޔާކުރި ލައުންޖެކެވެ.

މި ރަސްމިއްޔާތުގައި ވާހަކަފުޅުދައްކަވަމުން މިލާން ކްރިކެޓް އެކެޑަމީގެ ފައުންޑާ އަދި ރައީސް ފަރުހަތު ޖަލީލް ވިދާޅުވީ ޖަލީލް މާލަން ތަރައްގީކުރުމަށް ވަރަށް ގިނަ ބައެއްގެ އެއްބާރުލުން ލިބުނު ކަމަށެވެ. އަދި މި ލައުންޖުގައި ގާތްގަނަޑަކަށް 110 ވަރަކަށް ކްރިކެޓުގެ ފޮޓޯ ހިމަނާފައިވާނެ ކަމަށާއި، އޭގެ ބޭނުމަކީ ކްރިކެޓުގެ ތާރިޚު ފޮޓޯ މެދުވެރިކޮށް ގެނެސްދިނުން ކަމަށްވެސް ވިދާޅުވިއެވެ.

މީގެ އިތުރުން މި ރަސްމިއްޔާތުގައި ރާއްޖޭގައި އިންޑޯ ކްރިކެޓް އިފްތިތާހުކުރުމުގެ ގޮތުން ޚާއްސަ މެޗެއް ކުޅުނުއިރު، މި މެޗުގައި ރައީސް ޞާލިޙާއި ނައިބު ރައީސް ފައިޞަލް ބައިވެރިވެވަޑައިގެންނެވިއެވެ. އެގޮތުން ރައީސް ކުޅުއްވީ "ޕްރެޒިޑެންޓް އިލެވަން" ޓީމަށެވެ. އަދި ނައިބު ރައީސް ކުޅުއްވީ "ވައިސް ޕްރެޒިޑެންޓް އިލެވަން" ޓީމަށެވެ. ރާއްޖޭގައި ކުޅުނު ފުރަތަމަ އިންޑޯ މެޗު ކާމިޔާކުރީ ނައިބު ރައީސްގެ ކެޕްޓަންކަމުގައި ކުޅުނު ޓީމުންނެވެ. ނައިބު ރައީސްގެ ކެޕްޓަނުކަމުގައި ކުޅުނު ޓީމުން 10 އޯވަރުގެ ތެރޭގައި 89 ލަނޑު ހެދިއިރު، ރައީސްގެ ކެޕްޓަންކަމުގައި ކުޅުނު ޓީމަށް 12 އޯވަރުގެ ތެރޭގައި ހެދުނީ 85 ލަނޑެވެ.

މި މެޗަށްފަހު ކުރިކެޓް ބޯޑް އޮފް މޯލްޑިވްސްގެ ފަރާތުން ރައީސް އާއި ނައިބު ރައީސަށް ވަނީ "ހިތާއި ރޫހުން ކުޅޭށެ ކްރިކެޓް" ގެ ލޯގޯ ވެދުމަށް އަރުވާފައެވެ.