ރާއްޖެއިން ބަންގްލަދޭޝް އަދި ނޭޕާލަށް އެސްޓްރަޒެނެކާ ވެކްސިންގެ ހަތަރު ލައްކަ ޑޯޒް ހަދިޔާކުރަން ނިންމައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ކޮންމެ ގައުމަކަަށް ދެލައްކަ ޑޯޒް ހަދިޔާ ކުރަން ސަރުކާރުން ނިންމާފައިވާ ކަމަށެވެ. މަބްރޫކް ވިދާޅުވީ އެންމެ ފުރަތަމަ އެސްޓްރަޒެެނެކާ ވެކްސިން ތައާރަފުކުރިއިރު ސްޓޮކް މަދުކޮށް ހުރުމުން، ހުރިހާ ރައްޔިތުންނަށް ވެކްސިން ކަށަވަރު ކުރުމަށް ސަރުކާރުން އެންމެހާ ރައްޔިތުންނަށް ވާވަރަށް ވެކްސިން ގަތް ކަމަށެވެ. އަދި އެއަށްފަހު ބޭރުގެ ޕާޓްނަރުންގެ ފަރާތުން ލިބުނު އެހީގެ ދަށުން އިތުރު ވެކްސިންގެ ޑޯޒްތައް ރާއްޖެއަށް ލިބި، ވެކްސިންގެ ސްޓޮކްތައް މިހާރު އިތުރުވެފައިވާ ކަމަށެވެ.
މިކަންތައްތައް މަގުފަހިވެގެން ދިޔައީ ބައިނަލްއަގްވާމީ ގުޅުންތަކުގެ ސަބަބުންކަން ފާހަގަކުރައްވައި މަބްރޫކް ވިދާޅުވީ އެ ގައުމުތަކަށް އެހީތެރިވުމަށް ރާއްޖޭގެ ޒިންމާއެއް ވެސް އެބައޮތް ކަމަށެވެ. މި އުސޫލުގެ ދަށުން ވެކްސިންގެ ޑޯޒްތައް އިސްރާފުނުކޮށް ވެކްސިން ހަދިޔާ ކުރަން ނިންމީ ކަމަށް ވެސް މަބްރޫކް ވިދާޅުވިއެވެ.
ކޮވެކްސް ފެސިލިޓީ މެދުވެރިކޮށް، ޖަޕާން ސަރުކާރުން ވެސް ވަނީ ދިވެހިރާއްޖެއަށް 112،000 (އެއްލައްކަ ބާރަ ހާސް) ޑޯޒްގެ އެސްޓްރަޒެނެކާ ކޮވިޑް-19 ވެކްސިން އޮގަސްޓް މަހު ހަދިޔާކޮށްފައެވެ. މި ވެކްސިން ހަދިޔާކޮށްފައިވަނީ ޖަޕާންގެ "ލާސްޓް ވަން މައިލް ސަޕޯޓް"ގެ ދަށުންނެވެ.
ރާއްޖެއަށް ލިބުނު ވެކްސިން ޝިޕްމަންޓަކީ ދުނިޔޭގެ ސިއްހަތު ޖަމުއިއްޔާ (ޑަބްލިޔު.އެޗް.އޯ)ގެ ކޮވެކްސް ފެސިލިޓީ މެދުވެރިކޮށް ރާއްޖެއަށް ލިބުނު ވެކްސިންގެ 4 ވަނަ ޝިޕްމަންޓެވެ. ކޮވެކްސްގެ ދަށުން މި އޮގަސްޓް މަހުގެ ކުރީކޮޅު އެމެރިކާއިން ފޯރުކޮށްދިން 128،700 ޑޯޒްގެ ފައިޒާ ވެކްސިން ލިބި، މިހާރު ދަނީ ވެކްސިން ޖަހަމުންނެވެ.
އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިން ދިނުމަށް ސަރުކާރުން ވަނީ ވެކްސިނޭޝަން ޕްރޮގްރާމެއް ފަށާފައެވެ. އެހެންނަމަވެސް އޮގަސްޓު މަސް ނިމުމުގެ ކުރިން ސަރުކާރުން ކަނޑައެޅި އަމާޒަށް ވާސިލްވެވިފައެއް ނުވެއެވެ. އެހެންކަމުން އަދިވެސް މި ވެކްސިނޭޝަން ޕްރޮގްރާމް ދަނީ ކުރިއަށެވެ.
ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ. ބަލިން ދިފާއުވުމަށް ވެކްސިން ވަރަށް މުހިންމު ކަމަށާއި، ބައްޔަށް ޕޮޒިޓިވްވި ނަމަވެސް ވެކްސިން ފުރިހަމަކޮށްފައިވާނަމަ ބަލިން މީހާއަށް ކުރާ އަސަރު ކުޑަ ކަމަށް ޑޮކްޓަރުން ވިދާޅުވެއެވެ.
