އަމާން އައްސޭރިއަކަށް ޤައުމު ގެންދިއުމަށް ހަރުދަނާ ސާބިތު ޖީލެއް ބިނާކުރަންޖެހޭ: ހޯމް މިނިސްޓަރ
އަމާނާތް މާދަމާގެ ޖީލުތަކަށް ފޯރުކޮށްދިނުމަކީ އަޅުގަނޑުމެން އެންމެންގެ ދީނީ އަދި ޤައުމީ ވާޖިބެއް ކަމަށް ވިދާޅުވި
މިނިސްޓަރ އޮފް ހޯމް އެފެއާޒް ޢިމްރާން ޢަބްދުالله
އަމާން އައްސޭރިއަކަށް ޤައުމު ގެންދިއުމަށް ހަރުދަނާ ސާބިތު ޖީލެއް ބިނާކުރަންޖެހޭ ކަމަށް މިނިސްޓަރ އޮފް ހޯމް އެފެއާޒް ޢިމްރާން ޢަބްދުالله ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޤައުމީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ. މިނިސްޓަރ ޢިމްރާން ވިދާޅުވީ ބަވަނަވެފައިވާ ދުނިޔޭގައި މާސްމީޑިޔާގެ ކަޅުވިލާތަކުގެ ކޮޅިގަނޑުން ސަލާމަތްވެ, އަމާން އައްސޭރިއަކަށް ޤައުމު ގެންދިއުމަށް ހަރުދަނާ ސާބިތު ޖީލެއް ބިނާކުރަން ޖެހޭ ކަމަށެވެ.
މިނިސްޓަރ ވިދާޅުވީ އިންސާނުން ދިރިއުޅޭ ކޮންމެ ވަޠަނެއްގައި އެބައެއްގެ ޤައުމު ހިމާޔަތްކޮށް, އިސްތިއުމާރާއި އަޅުވެތިކަމުން ސަލާމަތްވެ މިނިވަންކަމާ އިސްތިޤުލާލް ރައްކާތެރިކުރުމީ އިންސާނީ ކަރާމާތާއި ޢިއްޒަތުން ނަފުސުގެ އެންމެ މަތިވެރި އެއްސިފަކަމަށެވެ. އަޅުގަނޑުމެންގެ މިލޮބުވެތި ވަތަންގެ ފަޚުރުވެރި ކާބަފައިން މިސިފަ އެންމެ ފުރިހަމަގޮތުގައި ފޯރުކޮށްދެއްވާފައިވާކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ ކާބަފައިން އަޅުގަނޑުމެންނާ ޤައުމު ހަވާލުކޮށްފައި މިވަނީ އެތައް ބޮޑެތި ޤުރުބާނީއަކުން ކަމަށެވެ. މިއަމާނާތް މާދަމާގެ ޖީލުތަކަށް ފޯރުކޮށްދިނުމަކީ އަޅުގަނޑުމެން އެންމެންގެ ދީނީ އަދި ޤައުމީ ވާޖިބެއްކަމަށް އެމަނިކުފާނު ވިދާޅުވިއެވެ.
އިނާމްތައް ލިބިވަޑައިގެންނެވި ބޭފުޅުންގެ އަގުވަޒަންކުރައްވައި މިނިސްޓަރ ވިދާޅުވީ, ޤައުމީ ފެންވަރުގައި ދެވޭ ތަފާތު ޝަރަފާއި އިނާމް ޙާޞިލްކުރައްވާ ބޭފުޅުން އެހިސާބަށް އެވަޑައިގެންނެވީ ޤައުމަށްޓަކާ ކުރައްވާފައިވާ ވަރަށްގިނަ ޚިދުމަތްތަކެއްގެ ނަތީޖާއެއްގެ ގޮތުންކަމަށެވެ. އެހެންކަމުން އެހުރިހާ ބޭފުޅުންނަށް މިނިސްޓަރ ޢިމްރާން ޢަބްދުالله މަރުހަބާ ދެންނެވިއެވެ.
ދުނިޔޭގެ އެންމެ ގިނަ ޤައުމުތައް ތަމްޘީލްކުރައްވާ އދ.ގެ ޢާއްމު މަޖިލީހުގެ ރައީސްކަމަށް ފުރަތަމަ ފަހަރަށް ދިވެއްސަކުން އިންތިޚާބުކުރެވުނު މިތާރީޚީ ދަނޑިވަޅުގައި, އެމަޤާމަށް އިންތިޚާބުކުރެއްވި ރާއްޖޭގެ ފޮރިން މިނިސްޓަރ ޢަބްދުالله ޝާހިދު ދިވެހިރާއްޖޭގެ ޤައުމީ ދުވަހުގެ ޝަރަފްވެރި ހަފްލާގައި ބައިވެރިވެވަޑައިގެންނެވުމަކީ ދިވެހިންނަށް ލިބުނު ވަރަށް ބޮޑު ފަޚުރަކާއި ޝަރަފެއްކަމަށް ވިދާޅުވެ, އެމަނިކުފާނަށް މަރުހަބާ ވިދާޅުވިއެވެ.
