އދ.ގެ ބައެއް ކަންކަން އިސްލާހުކޮށް އިތުރަށް ހަރުދަނާކުރުމަށް ރައީސް އެދިވަޑައިގެންފި
އދގެ ގުނަވަންތަކުން ރާއްޖެއަށް ދީފައިވާ ހިލޭއެހީއަށް ޝުކުރު އަދާކުރެއްވި
ރައީސުލްޖުމްހޫރިއްޔާގެ ދައުވަތަކަށް އދ.ގެ އާއްމު މަޖިލީހުގެ ރައީސް ރާއްޖެ ވަޑައިގެން، ރައީސްއާ ބައްދަލު ކުރެއްވުމަށްފަހު ގުޅިފައިވާ ބަޔާނެއް ދެއްވި
އދ. ގެ ބައެއް ކަންކަން އިސްލާހުކޮށް އިތުރަށް ހަރުދަނާކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، އދގެ އާއްމު މަޖިލީހުގެ 76ވަނަ ސެޝަންގެ ރައީސް އަބްދުﷲ ޝާހިދުގެ އަރިހުން އެދިވަޑައިގެންފިއެވެ.
އދގެ އާއްމު މަޖިލީހުގެ 76ވަނަ ސެޝަންގެ ރައީސް އަބްދުﷲ ޝާހިދު ރާއްޖެއަށް ކުރައްވަމުން ގެންދަވާ ދަތުރުފުޅުގައި ބުދަދުވަހު ރައީސުލްޖުމްހޫރިއްޔާއާ ވަނީ ބައްދަލުކުރައްވާފައެވެ. ބައްދަލުކުރެއްވުމަށްފަހު ދެއްވި ގުޅިފައިވާ ބަޔާނުގައި ރައީސްވަނީ ދެބޭފުޅުން މަޝްރާކުރެއްވި ކަންކަން ތަފްސީލް ކޮށްދެއްވާފައެވެ.
ރައީސް ވިދާޅުވީ، 76ވަނަ ސެޝަންގައި ދުނިޔޭގެ މަސްރަހުގައި ރާއްޖޭގެ ޚާރިޖީ ސިޔާސަތުގައި އެކުލެވޭ ބައިލްއަގުވާމީ މުޖުތަމައާ ގުޅުން ބަދަހިކުރުމާއި، މޫސުމީ ބަދަލުތަކާއި، ޑިމޮކްރެސީގެ ހަމަތަކަށް އިހުތިރާމްކޮށް އިންސާނީ ހައްގުތައް ނެގެހެއްޓުމަށް އިސްކަން ދޭނެ ކަމަށް އުއްމީދުކުރައްވާކަމަށެވެ. އަދި އދގެ ބައެއް ކަންކަން އިސްލާހުކުރުމުގެ މަސައްކަތް ހަރުދަނާ ކުރުމަށް އެދިވަޑައިގަންނަވާ ކަމަށާއި، އާއްމު މަޖިލިސް އަދި ސަލާމަތީ މަޖިލީހުގެވެސް ބައެއް ކަންކަން އިސްލާހުކުރުން މުހިއްމު ކަމަށް ރައީސް ވިދާޅުވިއެވެ.
ކޮވިޑްގެ ބަލިމަޑުކަމުން އަރައިގަތުމުށް އދގެ ދައުރު މުހިއްމު ކަމުގައި ދަންްނަވާފައިވާނެ ކަަމަށާއި، މޫސުމަށް އަންނަ ބަދަލުތަކާ ގުޅިގެން ރާއްޖެފަދަ ޖަޒީރާ ގައުމުތަކަށް ދިމާވާ ނުރައްކަތަކުން ސަލާމަތް ވުމަށް އދގެ ދައުރު މުހިއްމު ކަމުގައި ރައީސް ވިދާޅުވިއެވެ. އަދި ކޮވިޑްގެ ބަލިމަޑުކަމާއެކު ކުދި ޖަޒީރާ ގައުމުތަކުގެ ދަރަނިތައް ބޮޑުވެފައިވާއިރު، އެކަމަށް ލުއި ހޯދައިދިނުމާ ގުޅޭގޮތުންވެސް ދެބޭފުޅުން މަޝްވަރާ ކުރެއްވި ކަމަށް ރައީސްް ވިދާޅުވިއެވެ. މި ދައުރުގައި އުއްމީދީ މަސައްކަތްތަކެއް ކުރެވުމަށް އެދިވަޑައިގެންނެވި ކަމަށް ވިދާޅުވިއެވެ.
ކޮވިޑްގެ ބަލިމަޑުކަމުގެ ތެރޭގައި އދގެ ގުނަވަން ތަކުން ރާއްޖެއަށް ދީފައިވާ ހިލޭއެހީ އަށް ޝުކުރު އަދާކުރައްވާ ކަމަށާއި، އަންހެނުން ތަހައްމަލްކުރާ އަނިޔާއާއި ނާއިންސާފުން އަރައިގަތުމަށް އަންހެނުންނާއި އަންހެންކުދިންގެ ހައްގުތައް ރައްކާތެރިކުރުމަށް މަސައްކަތް ކުރެއްވުމަށް ރައީސްވަނީ އެދިވަޑައިގެންފައެވެ.
މި ދައުރުގައި ރާއްޖޭގެ ޒުވާނުންނަށް ފުރުސަތު ހުޅިގެންދާނެ ކަމަށް އުންމީދުކުރައްވާ ކަމަށާއި، ފޮރިން ސަރވިސްއަށް ޒުވާނުނަށް ފުރުސަތު ހުޅުވުމަކީ އުއްމީދެއް ކަމުގައި ރައީސް ވިދާޅުވިއެވެ. އދގެ މެމްބަރަށް ވީ ދުވަހުން ފެށިގެން ކުދި ގައުމުތަކުގެ ހައްގުގައި ރާއްޖެއިން އަންނަނީ ވަކާލާތު ކުރަމުން ކަމަށާއި، މިކަން ދެމެހެއްޓުމަށް އެއްބާރުލުން ދެއްވާނެ ކަމަށް އުންމީދު ކުރައްވާކަމަށް ވިދާޅުވިއެވެ.
