ޓެރަރިޒަމްގެ ކަންކަމުގައި ރާއްޖެ އޮތީ ރަނގަޅު ހާލަތަށް ރުޖޫޢަ ނުވެވޭ ހިސާބަކު ނޫން: ޒަކަރިއްޔާ މަންސޫރު
ޓެރަރިޒަމް ހުއްޓުވުމަށް ވަރަށް ގިނަ މަސައްކަތްތައް ކުރެވިފައިވޭ
ރާއްޖެޓީވީގެ ފަލަސުރުހީ ޕްރޮގްރާމްގައި ބްރިގޭޑިއަރ ޖެނަރަލް ޒަކަރިއްޔާ މަންސޫރު ވާހަކަދައްކަވަނީ،
ޓެރަރިޒަމްގެ ކަންކަމުގައި ރާއްޖެ އޮތީ ރަނގަޅު ހާލަތަށް ރުޖޫއަނުވެވޭ ހިސާބަކު ނޫން ކަމަށް ނޭޝަނަލް ކައުންޓަރ ޓެރަރިޒަމް ސެންޓަރު (އެންސީޓީސީ)ގެ ޑީޖީ ބްރިގޭޑިއަރ ޖެނެރަލް ޒަކަރިއްޔާ މަންސޫރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ބްރިގޭޑިއަރ ޖެނަރަލް ޒަކަރިއްޔާ މަންސޫރު ވިދާޅުވީ ޓެރަރިޒަމް ހުއްޓުވުމަށް ވަރަށް ގިނަ މަސައްކަތްތައް ކުރެވިފައިވާ ކަމަށެވެ. އެގޮތުން ތަފާތު އެކިއެކި ނަންނަމުގައި މުޖުތަމައު ހޭލުންތެރިކުރުވުމުގެ ޕްރޮގްރާމްތަކާއި، ސްކޫލުތަކުގެ ދަރިވަރުންނަށް ޚާއްސަކޮށްގެން ވެސް ޕްރޮގްރާމްތައް ކުރިއަށް ގެންދާ ކަމަށް ޒަކަރިއްޔާ މަންސޫރު ވިދާޅުވިއެވެ.
"ދަ އިންޓަރނޭޝަނަލް ޕްރޮގްރާމް ފޮރ ކޮމްބެޓިންގ އެކްސްޓްރީމިޒަމް އެންޑް ޓެރަރިޒަމް"ގެ ނަމުގައި ކުރިއަށް ގެންދިޔަ މަސައްކަތު ބައްދަލުވުމަށް އިޝާރާތް ކުރައްވައި ޒަކަރިއްޔާ މަންސޫރު ވިދާޅުވީ ޓެރަރިޒަމްއާއި ހަރުކަށިފިކުރު ހުއްޓުވައި, ތަހައްމަލުކުރުމުގެ ސިފަތައް ލިބިފައިވާ އަމާން ބަދަހި މުޖުތަމައެއް ގާއިމުކުރުމުގައި ދީނީ އިލްމުވެރިންނާއި ތައުލީމީ ދާއިރާގައި މަސައްކަތްކުރާ ބޭފުޅުންގެ ދައުރާގުޅޭގޮތުން މައުލޫމާތު ހިއްސާކޮށްފައިވާ ކަމަށެވެ. އަދި މި މަސައްކަތުގައި ހަރަކާތްތެރިވި ސަރުކާރުގެ މުއައްސަސާތަކާއި މަދަނީ ޖަމުޢިއްޔާތަކުގެ އިންސާނީ ވަސީލަތް ތަރައްގީކުރުމާ ބެހޭ ގޮތުން ފުޅާ ދާއިރާއެއްގައި މަޝްވަރާކުރެވިފައިވާ ކަމަށް ޒަކަރިއްޔާ މަންސޫރު ވިދާޅުވިއެވެ.
ޓެރަރިޒަމްގެ ބިރު މުޅި ދުނިޔެއަށް ފޯރާފައިވާކަން ފާހަގަކުރައްވައި ޒަކަރިއްޔާ މަންސޫރު ވިދާޅުވީ ރާއްޖެއަށް އަމާޒުކޮށްގެން މަސައްކަތް ކުރުމުން ނަތީޖާ ފެންނަ ކަމަށެވެ. މީގެ ކުރިން ޓެރަރިޒަމާއި ހަރުކަށި ފިކުރުގެ ވާހަކަ ދައްކަން ގިނަ ރައްޔިތުންނަށް ނުކެރޭ ކަމަށާއި، ދީނާ ގުޅުވާފައި ކިޔާތީ ބައެއް މީހުން އެކަން ގަބޫލުކުރަން ބޭނުންނުވާ ކަމަށް އޭނާ ވިދާޅުވިއެވެ. ނަމަވެސް މިއަދު އެހާލަތު ބަދަލުވެ މިކަމާއި ދެކޮޅަށް ގިނަ ރައްޔިތުން ފާޅުގައި ތެދުވާ ކަމަށް ޒަކަރިއްޔާ މަންސޫރު ވިދާޅުވިއެވެ.
އަނިޔާވެރި އަމަލުތަކަށް އޮތް އެންމެ ބޮޑު ހައްލަކީ ތައުލީމު ކަމަށާއި، މައުލޫމާތުތައް ފޯރުކޮށް ދިނުމަކީ ވަރަށް މުހިންމު ކަމެއް ކަމަށެވެ. އަދި އަނިޔާވެރި އަމަލުތައް ހުއްޓުވައި، ހަރުކަށި ފިކުރު ނައްތާލުމަށް މުޅި މުޖުތަމައުގެ އެއްބާރުލުން ބޭނުންވާކަން އޭނާ ފާހަގަކުރެއްވިއެވެ.
