ރަސޫލާއަށް ހަޖޫޖަހަައި ކާޓޫން ކުރެހި މީހާ އެކްސިޑެންޓެއްވެ މަރުވެއްޖެ
4 އޮކްޓޯބަރު 2021 | ހޯމަ 09:55އޭނާ މަރުވީ އޭނާ ފުލުހުންގެ ވެހިކަލެއްގައި އިންދާ
ރަސޫލާއަށް ހަޖޫޖެހި ލާސް ވިލްކްސް
ކީރިތި ރަސޫލާ މުހައްމަދު صلى الله عليه وسلم އަށް ފުރައްސާރަކޮށް ކާޓުން ކުރެހި ސްވިޑަންގެ ލާޒް ވިލްކްސް، ކާރު އެކްސިޑެންޓެއްގައި މަރުވެއްޖެއެވެ.
ވިލްކްސް އަކީ 2007 ވަނަ އަހަރުގެ ތެރޭގައި، ކީރިތި ރަސޫލާގެ މޫނުފުޅު ކަމަށް ބުނެ، ކުއްތާއެއްގެ ހަށިގަނޑުގައި މޫނެއް ކުރަހައިގެން، އެކަލޭގެފާނަށް ފުރައްސާރަ ކުރި މީހެކެވެ. އަދި މިކަމުގެ ސަބަބުން އޭނާއަށް އެކި ފަރާތްތަކުން ވަނީ މަރުގެ އިންޒާރުތައް ވެސް ދީފައެވެ. މިސަބަބާ ހުރެ ސްވިޑެންގެ ފުލުހުން އައީ އޭނާ އަށް ނުރައްކާ އެބައޮތް ކަމަށް ބުނެ އޭނާއަށް ރައްކާތެރިކަން ވެސް ދެމުންނެވެ.
އޭނާ މަރުވީ އޭނާ ފުލުހުންގެ ވެހިކަލެއްގައި އިންދާ، އެ ވެހިކަލް ގޮސް ޓްރަކެއްގައި ޖެހިގެން ހިނގި އެކްސިޑެންޓެއްގައެވެ. މި އެކްސިޑެންޓްގައި އޭނާގެ އިތުރުން ދެ ފުލުހަކު ވެސް ވަނީ މަރުވެފައެވެ. ޓްރަކް ޑްރައިވަރަށް ވެސް އެކްސިޑެންޓްގައި އަނިޔާވެފައިވެއެވެ.
އެގައުމުގެ ފުލުހުން ނެރެފައިވާ ބަޔާނެއްގައި ބުނީ މި އެކްސިޑެންޓް ހިނގަން މެދުވެރިވި ސަބަބެއް އަދި ނޭނގޭ ކަމަށެވެ.
ކޯޕަންހޭގަންގައި 2015 ގައި ބޭއްވި ބައްދަލުވުމެއްގައި ވިލްކްސް ބައިވެރިވަމުން ދަނިކޮށް މީހަކު އެތަނަށް ވަދެ ބަޑިން އޭނާއަށް ހަމަލާ ދީފައި ވެއެވެ. ނަމަވެސް އެހަމަލާއިން ވިލްކްސް ގެއްލުމެއް ނުލިބި ސަލާމަތްވެފައިވީނަމަވެސް، ގިނަ ޖަމިއްޔާތަކުން ވެސް ދިޔައީ މަރުގެ އެތައް އިންޒާރުތަކެއް އޭނާއަށް ދެމުންނެވެ.
