ވެމްކޯގެ ޚިދުމަތަށް އަލަށް ރަޖިސްޓްރީކުރީ އެންމެ 2،000 ގޭބިސީން
މާޅެ ސަރަހައްދުގައި 45،000އަށްވުރެ ގިނަ ގޭބީސީ އެބަހުރި
ވެމްކޯގެ މުވައްޒަފުން ކުނި އުކާލުމުގެ މަސައްކަތުގައި
ވެމްކޯގެ ޚިދުމަތް ހޯދުމަށް ރަޖިސްޓްރީކުރުމަށް އެންމެ ފަހުން ހުޅުވާލި ފުރުސަތުގައި މިހާތަނަށް ރަޖިސްޓްރީކޮށްފައިވަނީ އެންމެ 2،000 މީހުން ކަމަށް އެ ކުންފުނިން ބުނެފިއެވެ.
ރާއްޖެޓީވީގެ ޚަބަރުފީތާ ޕްރޮގްރާމުގައި ވާހަކަދައްކަވަމުން ވެމްކޯގެ މާކެޓިން އެންޑް ޕަބްލިކް ރިލޭޝަންސް އޮފިސަރ އަޙުމަދު ޢާޒިމް ވިދާޅުވީ މާލެ އަދި ވިލިމާލޭގައި އެކަނިވެސް 45،000 އަށްވުރެ ގިނަ ގޭބީސީ އެބަހުރި ކަމަށް ރެކޯޑުތަކުން ދައްކާ ކަމަށެވެ. އެއީ ހުޅުމާލޭގެ ގޭބީސީތައް ނުލައި ކަމަށް އޭނާ ވިދާޅުވިއެވެ.
ޢާޒިމް ވިދާޅުވީ ވެމްކޯއިން, މާލެ ސަރަހައްދުން ކުނި ނެގުމުގެ ޚިދުމަތް ދޭ ގޮތަށް މިހާރު ބަދަލުތަކެއް ގެނެސްފައިވާކަމަށެވެ. ސެޕްޓެމްބަރު 7 ވަނަ ދުވަހުން ފެށިގެން ގޭގެއަށް ގޮސްގެން ކުނި ނެގުމަށް ވެމްކޯއިން ނިންމި ނިންމުމާ ގުޅިގެން ވެމްކޯގެ ޚިދުމަތަށް ރަޖިސްޓްރީ ނުކުރާ ގޭބީސީތަކަށް ރަޖިސްޓްރީކުރުމަށް 2 ހަފުތާގެ މުއްދަތެއް ދީފައިވާކަން އޭނާ ފާހަގަކުރެއްވިއެވެ. އެއީ އޮކްޓޯބަރު 1އާ ހަމައަށް ކަމަށާއި، އެ މުއްދަތުގައި މަގުމަތީގައި ހުރި ކުނިވެސް ނަގާފައިވާކަމަށް ވިދާޅުވިއެވެ.
ޢާޒިމް ވިދާޅުވީ އޭރު ވެމްކޯގެ ޚިދުމަތަށް ރަޖިސްޓްރީކޮށްފައިވަނީ އެންމެ 9،000 ގޭބީސީން ކަމަށެވެ. 20 އިންސައްތަވެސް ޚިދުމަތާ ގުޅިފައިނުވާތީ ޚިދުމަތާ ގުޅުމަށް އިތުރުކޮށްދިން މުއްދަތުގައި ވެމްކޯގެ ޚިދުމަތް ހޯދުމަށް އެދި އަލަށް ރަޖިސްޓްރީކޮށްފައިވަނީ އެންމެ 2،000 ގޭބީސީން ކަމަށް ޢާޒިމް ވިދާޅުވިއެވެ. އަދި މިހާތަނަށް ވެމްކޯގެ ޚިދުމަތާ ގުޅިފައިވަނީ އެންމެ 12،000 ގޭބީސީން ކަމަށް އޭނާ ބުނެފައިވެއެވެ.
ހުކުރު ދުވަހުން ފެށިގެން ވެމްކޯއިން ކުނި ނަގަމުންދަނީ ހަމައެކަނި ރަޖިސްޓްރީކޮށްފައިވާ ގޭގެއިންނެވެ. މަގުމަތީގައި ބަހައްޓާފައި ހުންނަ ކުނި ނެގުމުގެ މަސައްކަތް މިހާރު ވެމްކޯއިންނެއް ނުކުރެއެވެ.
ވެމްކޯއިން މަގުމަތިން ކުނި ނެގުމުގެ ޚިދުމަތް ދިނީ ކޮވިޑް-19ގެ ހާލަތާ ގުޅިގެންނެވެ. އެއީ އެ ދުވަސްވަރު ގޭގެއަށް ގޮސް ކުނި ނެގުމަކީ ރައްކާތެރި ކަމެއް ކަމުގައި ނުވާތީއެވެ.
