ހުރިހާ އަތޮޅެއްގައި އޭލެވެލްއަށް ކިޔަވައިދޭން ފެށުން ފާހަގަކޮށްފި
30 ސެޕްޓެމްބަރު 2021 | ބުރާސްފަތި 15:31ރާއްޖޭގެ 34 ސްކޫލެއްގައި އޭލެވެލް ކިޔަވައިދޭ
ކެޔޮދޫ ސްކޫލްގައި އޭލެވެލްއަށް ކިޔަވައިދޭން ފެށުން
ރާއްޖޭގެ ހުރިހާ އަތޮޅެއްގައި މަތީ ސާނަވީއަށް ކިޔަވައިދޭން ފެށުން ފާހަގަކޮށްފިއެވެ.
މިކަން ފާހަގަކޮށްފައިވަނީ ވ. އަތޮޅުގައި އޭލެވެލްއަށް ކިޔަވައިދޭން ފެށުން ފާހަގަކުރުމަށްޓަކައި ބޭއްވި ޚާއްސަ ރަސްމިއްޔާތުގައެވެ. މި ރަސްމިއްޔާތު ޝަރަފުވެރިކޮށްދެއްވީ އެޑިއުކޭޝަން މިނިސްޓަރ ޑރ. ޢާއިޝަތު ޢަލީއެވެ.
މި ރަސްމިއްޔާތު ޝަރަފުވެރިކޮށްދެއްވައި މިނިސްޓަރ ވާހަކަފުޅުވެސް ދައްކަވާފައިވެއެވެ. ކެޔޮދޫ ސްކޫލުގައި އޭލެވެލްއަށް ކިޔެވުން ފެށުމުން މިވަގުތު ރާއްޖޭގައި 34 ސްކޫލެއްގައި އޭލެވެލް ކިޔަވައިދެމުން އެބަގެންދެއެވެ. އަދި ޖުމްލަ 1،173 ދަރިވަރުން ތައުލީމު ހާސިލްކުރަމުން އެބަގެންދެއެވެ.
އެޑިއުކޭޝަން މިނިސްޓަރ ކެޔޮދޫއަށް ކުރެއްވި މި ދަތުރުގައި މިނިސްޓަރގެ އަރިހުގައި ސްޓޭޓް މިނިސްޓަރ ފާޠިމަތު ނަޞީރު، ސްޓޭޓް މިނިސްޓަރ އާތިޔާ ނަޞީރު އަދި މިނިސްޓްރީގެ އިސްބޭފުޅުން ބައިވެރިވެ ވަޑައިގެންނެވިއެވެ. މީގެ އިތުރުން ކެޔޮދޫ ދާއިރާގެ މަޖިލިސް މެންބަރު ޙުސައިން ޤާސިމްއާއި، ވ. އަތޮޅު ކައުންސިލް އަދި ކެޔޮދޫ ރަށު ކައުންސިލުގެ އިސްބޭފުޅުން ވެސް ވަނީ ބައިވެރިވެވަޑައިގެންފައެވެ.
