ޓިއުނީޝިއާގެ ބޮޑުވަޒީރުކަމަށް ފުރަތަމަ ފަހަރަށް އަންހެން ބޭފުޅެއް

ޓިއުނީޝިޔާގެ ބޮޑުވަޒީރުކަމަށް އެގައުމުގެ ރައީސް ކައިސް ސަޢީދު, ފުރަތަމަ ފަހަރަށް އަންހެން ބޭފުޅަކު އައްޔަނުކުރައްވައިފިއެވެ.

ހުރިހާ ބާރުތައް މުށުތެރެއަށް ލައްވައިގެން އުޅުއްވާތާ ދެމަސްދުވަސް ފަހުން ރައީސް ކައިސް އެގައުމުގެ ބޮޑުވަޒީރުކަމަށް އައްޔަނުކުރައްވާފައިވަނީ, އިންޖިނިއަރިންގގެ ދާއިރާއިން މަތީ ތައުލީމު ހާސިލުކުރައްވާފައިވާ ނަޖްލާ ބޫޑެން ރަމްޚޭން އެވެ. ނަޖްލާ ވަނީ މީގެކުރިން ވޯރލްޑް ބޭންކުގައިވެސް މަސައްކަތްކުރައްވާފައެވެ.

ނަޖްލާ އޮފީހާ މި ހަވާލުވެވަޑައިގަންނަވަނީ ޓިއުނީޝިޔާގެ ހާލަތު ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. ވަކިން ޚާއްސަކޮށް ގައުމުގެ އިޤްތިޞާދީ ހާލަތު ގޯސްވެފައިވާ ދަނޑިވަޅެއްގައެވެ.

ޓިއުނީޝިޔާގެ ރައީސް ޖުލައި މަހު ވަނީ އެގައުމުގެ ގާނޫނު ހަދާ މަޖިލީސް އުވާލައްވައި, ބޮޑުވަޒީރުކަމުގައި ހުންނެވި ބޭފުޅާ އެމަގާމުން ދުރުކުރައްވައި ބާރުތައް ނަންގަވާފައެވެ. އެއާއެކު އައު ސަރުކާރެއް އެކުލަވާލުމަށް ރައީސް ސަޢީދުއަށް ޓިއުނީޝިޔާގެ އެތެރެއިންނާއި ބައިނަލްއަޤްވާމީ މުޖުތަމައުން ދިޔައީ ބާރު އަޅަމުންނެވެ. ނަމަވެސް މިދިޔަ ހަފުތާގައި ވަނީ ބައެއް ބާރުތައް ދޫކޮށްލައްވާފައެވެ. އަދި ގާނޫނު އަސާސީގެ ދަށުން ގިނަ ބާރުތަކެއް ލިބިވަޑައިގެންފައިވާކަމަށް ވިދާޅުވެފައެވެ.

އެގޮތުގެ މަތިން އައު ބޮޑުވަޒީރެއް އައްޔަނު ކުރައްވާފައިވާއިރު ރައީސް ވަނީ އައު ސަރުކާރެއް ވީ އެންމެ އަވަހަކަށް އެކުލަވާލުމަށް ބޮޑުވަޒީރަށް އަންގަވާފައެވެ.

ސަޢީދުގެ ސޯޝަލް މީޑިޔާ އެކައުންޓްގައި ވަނީ އޭނާ ބޮޑުވަޒީރު ނަޖްލާ އާ ބައްދަލުކުރައްވާ ވީޑިއޯ އާންމުކުރައްވާފައެވެ. އަދި ވީއެންމެ އަވަހަކަށް އައު ސަރުކާރެއް އެކުލަވާލުމަށް ބާރު އަޅުއްވާފައެވެ.

ބޮޑުވަޒީރުކަމަށް އަންހެން ބޭފުޅަކު އައްޔަނުކުރެއްވުމަކީ ޓިއުނީޝިޔާއަށް ވަރަށް ތާރީޚީ ކަމެއްކަމަށް ވިދާޅުވެ ތަކުރާރުކޮށް ރައީސް ސަޢީދު ވިދާޅުވީ އެއީ އެގައުމުގެ އަންހެނުންނަށްވެސް ފަޚުރެއްކަމަށެވެ.

ސަޢީދު ވިދާޅުވީ އައު ސަރުކާރު ވެގެންދާނީ އެގައުމުގައި އެތައް ދުވަހަކުއްސުރެ ކުރިޔަށްދާ ކޮރަޕްޝަނާއި އެހެނިހެން ކަންކަމަށް ނިމުން ގެނުވާނެ ސަރުކާރަކަށްކަމަށެވެ. އަދި އައު ސަރުކާރުން އެގައުމުގެ ސިއްހަތާއި، ދަތުރުފަތުރާއި ތަޢުލީމުގެ އިތުރުން, ބޭނުންވާ ހުރިހާ ދާއިރާތަކަށް ހައްލު ގެނެސްދޭނެކަމަށެވެ.

ނަޖްލާއަކީ 2011 ވަނަ އަހަރު އެގައުމުގައި އޮތް ސަރުކާރު ވައްޓާލިފަހުން އައްޔަނުކުރި 10 ވަނަ ބޮޑުވަޒީރެވެ. ގައުމުގެ އެތެރޭގައި ހިނގަމުންދާ ސިޔާސީ ހަމަނުޖެހުންތަކާއި ކޮވިޑް-19އާ ގުޅިގެން އެގައުމު ވަނީ އިޤްތިޞާދީ ގޮތުން ބޮޑު އަނދަވަޅަކަށް ވެއްޓިފައެވެ. އެހެންކަމުން އަލަށް އެކުލަވާލާ ސަރުކާރަކުން މިމައްސަލަތަކަށް ހައްލު ގެނައުމަށް ވީ އެންމެ އަވަހަކަށް މަސައްކަތްކުރަން ޖެހޭނެއެވެ.