މަޖިލީހަށް ހުށަހަޅާ އިތުބާރު ނެތްކަމުގެ މައްސަލަ ތަކުގައި ފަހުބަސް ބުނާނީ ސުޕްރީމް ކޯޓުން ކަމަށް ހުކުމްކޮށްފި
ސުޕްރީމް ކޯޓުން މިގޮތައް ހުކުމް ކުރީ ދައުލަތުން ސުޕްރީމް ކޯޓަށް ހުށަހަޅާފައިވާ މައްސަލަ ނިންމަމުން
ސުޕްރީމް ކޯޓު: އިތުބާރު ނެތްކަމުގައި ފަހުބަސް ބުނާނީ ސުޕްރީމް ކޯޓުން
ރައްޔިތުންގެ މަޖިލިހަށް ހުށަހަޅާ އިތުބާރު ނެތްކަމުގެ މައްސަލަތަކުގައި އެންމެ ފަހު ނިންމުން ނިންމާނީ ސުޕްރީމް ކޯޓުން ކަމަށް އެ ކޯޓުން ހުކުމް ކޮށްފި އެވެ.
ސުޕްރީމް ކޯޓުން މިގޮތަށް ނިންމީ، ރައްޔިތުންގެ މަޖިލީހަށް ވަޒީރުން ވަކި ކުރެވޭނީ އެކަށީގެންވާ ސަބަބުތަކެއް އޮވެގެން ނަގާ އިތުބާރުނެތްކަމުގެ ވޯޓަކުން އެކަނި ކަމަށާއި ސިޔާސީ ބޭނުމެއްގައި ނަގާ އިތުބާރު ނެތްކަމުގެ ވޯޓަކުން ވަޒީރުން ވަކި ނުކުރެވޭނެ ކަމަށް ކަނޑައަޅައިދޭން އެދި ދައުލަތުން ސުޕްރީމް ކޯޓުގައި އެދިފައިވާ މައްސަލާގައި ކުރި ހުކުމްގަ އެވެ.
ދައުލަތުން އެ މައްސަލަ ހުށަހެޅީ ވަޒީރުންގެ އިތުބާރު ނެތްކަމުގެ ވޯޓު ނެގުމާ ގުޅޭގޮތުން އޮންނަ ގާނޫނު އަސާސީގެ 101 ވަނަ މާއްދާ މާނަކޮށް، އެގޮތަށް ނިންމައި ދިނުން އެދި އެވެ.
ސުޕްރީމް ކޯޓުގެ ފުލް ބެންޗުގެ އިއްތިފާގުން ކުރި ހުކުމުގައި ނިންމާފައިވަނީ އެކަށީގެންވާ ސަބަބެއް ނެތި، ސިޔާސީ ގޮތުން އިތުބާރު ނެތްކަމުގެ ވޯޓު ނުނެގޭނެ ކަމަށާއި އިތުބާރު ނެތްކަމުގެ ވޯޓުތަކަކީ އެކަށީގެންވާ ސަބަބުތަކަކަށް ބިނާވެފައިވާ އިމްޕީޗްމެންޓަކަށް ވާންޖެހޭނެ ކަމަށެވެ. އަދި އެގޮތަށް މަޖިލީހުން ފާސް ކުރިޔަސް އެކަމުގައި ފަހުގެ ނިންމުން ނިންމާނީ ސުޕްރީމް ކޯޓުން ކަމަށް ހުކުމުގައި ކަނޑައަޅާފައިވެ އެވެ. އެ ހުކުމުގައި ކަނޑައެޅި އެ އުސޫލުތަކަށް މަޖިލީހުން ތަަބާވާން ޖެހޭނެ ކަމަށް ހުކުމުގައި ވެ އެވެ.
ހުކުމް އިއްވަވަމުން، އުއްތަމަ ފަނޑިޔާރު އަބްދުﷲ ސައީދު ވިދާޅުވީ ރާއްޖޭގައި އޮންނާނީ ތިން ބާރު ވަކިވެފައިވާ ރިޔާސީ ނިޒާމެއް ކަމަށް ރައްޔިތުންގެ ސީދާ ވޯޓަކުން ނިންމުމުން އެގޮތަށް ގާނޫނުއަސާސީގައި ލިޔެފައިވާތީ، ގާނޫނުއަސާސީ މާނަ ކުރަން ޖެހޭނީ ރިޔާސީ ނިޒާމުގެ އުސޫލުތަކާ ޚިލާފް ނުވާނެ ގޮތަށް ކަމަށެވެ. ރިޔާސީ ނިޒާމުގައި އޮންނަނީ އެއް ބާރުން އަނެއް ބާރުގެ މައްޗަށް ފާރަވެރިވުމުގެ އުސޫލު ކަމަށާއި ދައުލަތުގެ ތިން ބާރުގެ އިހްތިސާސްތަކަކީ ކޮބައިކަން ކަނޑެޅި، ގާނޫނުއަސާސީގައި އިންފާރު އޮތީ ރޭނިފައި ކަމަށް އެމަނިކުފާނު ވިދާޅުވި އެވެ.
އެހެންވެ، ވަޒީރުންގެ އިތުބާރު ނެތްކަމުގެ ވޯޓު ނެގުމާ ގުޅޭގޮތުން އޮންނަ ގާނޫނުއަސާސީގެ 101 ވަނަ މާއްދާ ވެސް މާނަ ކުރަން ޖެހޭނީ ރިޔާސީ ނިޒާމުގެ އުސޫލުތަކާ އެއްގޮތަށް ކަމަށް އުއްތަމަ ފަނޑިޔާރު ވިދާޅުވި އެވެ. އެގޮތުން ވަޒީރުން ވެސް ވަކި ކުރެވޭނީ އެކަށީގެންވާ ސަބަބެއް އޮވެގެން ނަގާ ވޯޓް އޮފް އިމްޕީމެންޓަކުން ކަމަށް ހުކުމްގައިވެ އެވެ. އަދި އެ ވޯޓު ވެސް ނަގަންޖެހޭނީ އެ ވަޒީރަކާ ހަވާލުވެފައި އޮންނަ ޒިންމާގެ ކަންކަމާ ގުޅޭގޮތުން ކަމަށް ހުކުމުގައިވެ އެވެ. ހުކުމް ބުނާ ގޮތުން އޭގެ ބަދަލުގައި ސިޔާސީ ގޮތުން ވަޒީރުން ވަކި ނުކުރެވޭނެ އެވެ.
އެއާ ޚިލާފަށް، އެކަށީގެންވާ ސަބަބެއް ނެތި މަޖިލީހަށް ވަޒީރުން ވަކި ކުރެވޭނެ ނަމަ އެއީ ދައުލަތުގެ އެއްބާރުން އަނެއް ބާރުގެ މައްޗަށް އަރައިގަތުން ކަމަށް ވާނެ ކަމަށާއި ވަޒީރުންނަކީ ސިޔާސީ ގޮތުން މަޖިލީހަށް ޖަވާބުދާރީ ވާންޖެހޭ ބައެއް ނޫން ކަމަށް އުއްތަމަ ފަނޑިޔާރު ވިދާޅުވި އެވެ. ވަޒީރުންނަކީ ހަމައެކަނި ރައީސުލް ޖުމްހޫރިއްޔާ އައްޔަންކޮށް، ވަކިކުރާ ބައެއް ކަން އެމަނިކުފާނު ފާހަގަ ކުރެއްވި އެވެ.
އުއްތަމަ ފަނޑިޔާރު ވިދާޅުވި ގޮތުގައި އެކަށީގެންވާ ސަބަބެއް ނެތި ވަޒީރުން އިތުބާރު ނެތްކަމުގެ ވޯޓު ނެގޭ ނަމަ އެއީ ދައުލަތުގެ އެެއް ބާރުން އަނެއް ބާރުގެ މައްޗަށް އަރައިގަތުން ކަމަށް ވާނެ އެވެ. އެއީ ބަރުލަމާނީ ނިޒާމުގެ ސިފައެއް ކަން ފާހަގަ ކުރައްވައި، އޭގެ މިސާލެއްގެ ގޮތުން ބަރުލަމާނީ ނިޒާމުގައި މަޖިލިސް އުވާލުމުގެ ބާރު ސަރުކާރަށް އޮންނައިރު ރިޔާސީ ނިޒާމުގައި މަޖިލިސް އުވާލުމުގެ ބާރު ސަރުކާރަށް ނޯންނަ ކަން އެމަނިކުފާނު ފާހަގަ ކުރެއްވި އެވެ.
އެއްވެސް ސަބަބެއް ނެތި، ސިޔާސީ ގޮތުން ވަޒީރުން ވަކި ކުރެވޭ ނަމަ އެއީ ދައުލަތް ހިންގުމަށް ހުރަސް އެޅި، ރައްޔިތުންގެ ހައްގުތައް ކަށަވަރުކޮށް ދޭން އެޅޭނެ ބޮޑު ހުރަހެއް ކަމަށް އުއްތަމަ ފަނޑިޔާރު ވިދާޅުވި އެވެ. ދައުލަތުގެ އެއްވެސް އިދާރާއަކުން ނިންމާ ނިންމުންތަކަކީ އާބިޓްރަރީ ނިންމުންތަކަށް ވެގެން ނުވާނެ ކަމަށާއި ކޮންމެ ނިންމުމަކީ ވެސް އިޖްރައާތުތައް ފުރިހަމަވާ ނިންމުމަކަށް ވާންޖެހޭނެ ކަމަށް ވިދާޅުވި އެވެ. އަދި އެ އިޖްރައާތުތަކަކީ އެކަށީގެންވާ، މަގްބޫލު އިޖްރައާތަކަށް ވާންޖެހޭނެ ކަމަށް އެމަނިކުފާނު ވިިދާޅުވި އެވެ.
އުއްތަމަ ފަނޑިޔާރު ވިދާޅުވި ގޮތުގައި ގާނޫނު އަސާސީ މާނަ ކުރުމުގައި އޮޅުމެއް އަރައިފި ނަމަ އެކަމެއް ސާފުކޮށް ދިނުމަކީ އެހެން ގައުމުތަކުގައި ވެސް ކޯޓުތަކަށް ލިބިގެންވާ ބާރެއް ކަމަށެވެ. ރާއްޖޭގެ ގާނޫނު އަސާސީ އޮތްގޮތުން ވިރާސީ ގޮތުން އެ ބާރު އޮތީ ހަމައެކަނި ސުޕްރީމް ކޯޓަށް ކަމަށް ވިދާޅުވި އެވެ.
