ރައްޔިތުންގެ ހުވަފެން ހަގީގަތަކަށް، ވޭވަށު ބަނދަރުގެ މަސައްކަތް ނިމިއްޖެ

މ. މޭވަށު ބަނދަރު ތަރައްގީ ކުރުމުގެ މަޝްރޫއު ނިންމާލައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނީ ވޭވަށް ބަނދަރު ތަރައްގީކުރުމުގެ މަޝްރޫއުގެ މަސައްކަތް ބާރު ސްޕީޑްގައި ކުރިއަށް ގެންގޮސް އެމަޝްރޫއު ނިންމާލާފައިވާ ކަމަށެވެ. މިމަޝްރޫއު ނިންމާލާފައިވަނީ 10 ސެޕްޓެމްބަރ 2021ގައެވެ.

މި މަޝްރޫއުގެ ދަށުން 60,839 ކިއުބިކް މީޓަރުގެ ސަރަހައްދެއްގެ ބަނދަރު ފުންކޮށްފައިވާއިރު، 350 މީޓަރުގެ ސަރަހައްދެއްގައި ބޭރުތޮށި ޖަހާފައިވެއެވެ. 35 މީޓަރުގެ ސަރަހަައްދެއްގައި ރިވެޓްމަންޓް ޖަހައި, 380 މީޓަރުގެ ސަރަހަައްދެއްގައި އެއްގަމު ތޮށިލާފައިވެއެވެ. އަދި 1880 އަކަމީޓަރުގެ ސަރަހަައްދެއްގައި ޕޭވްމަންޓް ހަދައި 2 ނެރު ބައްތި ޖެހުމުގެ އިތުރުން 19 ބަނދަރު ބައްތި ޖަހާފައިވާ ކަމަށް އެމްޓީސީސީން ބުނެއެވެ.

މި މަޝްރޫއު ޕްލޭނިން މިނިސްޓްރީއިންް އަމަލީގޮތުން ހަވާލު ކޮށްފައިވަނީ 2019 ވަނަ އަހަރުގެ އޯގަސްޓް 27ގައެވެ. 500 ދުވަހުގެ ތެރޭގައި އަޕްގްރޭޑް ކުރުމަށް ހަވާލުކުރި މިމަޝްރޫއަށް 48,863,172.98 (ސާޅީސްއަށް މިލިއަން އަށްލައްކަ ފަސްދޮޅަސްތިންހާސް އެއްސަތޭކަ ހަތްދިހަ ދެރުފިޔާ ނުވަދިހަ އަށްލާރި) ޚަރަދުކޮށްފައިވެއެވެ.

ވޭވަށު ކައުންސިލުން ބުނީ ހަގީގަތަކަށް ވެގެންދިޔައީ އެރަށުގެ ރައްޔިތުން ގިނަ ދުވަސްތަކަށް އިންތިޒާރު ކުރި ކަމެއް ކަމަށާއި، މިހާރު ލަފާފުރުމުގެ ދަތިކަމަށް ހައްލު ލިބިފައިވާ ކަމަށެވެ. ރަށުގެ ރައްޔިތުން ތިބީ ވަރަށް ހިތްހަމަޖެހިގެން ކަމަށާއި، އަތޮޅުތެރޭގެ ތަރައްގީގެ މަޝްރޫއުތަކަށް ސަރުކާރުން ގެންގުޅޭ އަހައްމިއްޔަތުކަން ފާހަގަކުރާ ކަމަށެވެ.