މި ސެޕްޓެމްބަރ މަހުގެ 25 ވާ ހޮނިހިރު ދުވަހު ބާއްވަން ހަމަޖެހިފައިވާ އެމްޑީޕީގެ ދާއިރާތަކުގެ އިންތިޚާބަކީ މިހާތަނަށް ބާއްވާ އެންމެ ގިނަ މެމްބަރުން ވާދަކުރާ އަދި އެންމެ ވާދަވެރި އިންތިޚާބުކަމަށް އެޕާޓީގެ ޗެއަރ ޕާސަން ހަސަން ލަތީފް ވިދާޅުވެއްޖެއެވެ.
އެޕާޓީން މި އިންތިޚާބަށް ކުރި މަސައްކަތުން ވަރަށް ގިނަ އަދަދެއްގެ މެމްބަރުން ޚާއްސަކޮށް ރަށްރަށުން ނިކުންނާނެ ކަމަށާއި، ހީވާގޮތުން މާލެއިން ލޯކަލް ކައުންސިލް އިންތިޚާބުގައި ނިކުންތް އަދަދަށް ވުރެން ގިނަ މެމްބަރުން މިފަހަރު ނިކުންނާނެ ކަމަށް ހަސަން ލަތީފު ވިދާޅުވިއެވެ. ސަބަބަކީ އެޕާޓީއަށް މިހާރު ވަމުންދާ ގޮތުން މެމްބަރުން ބަލަން ނުތިބޭނެކަމަށާއި މިކަމަށް ގޮތެއް ނިންމަން ގިނަ އަދަދެއްގެ މެމްބަރުން ނިކުންނާނެ ކަމަށްވެސް ވިދާޅުވިއެވެ.
އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހަސަން ލަތީފް އިތުރަށް ވިދާޅުވީ، އެދުވަހު ވޯޓުލުން ކުރިޔަށްދާނީ ހެނދުނު 09:00 އިން ފެށިގެން ހަވީރު 17:00 އާއި ހަމައަށްކަމަށެވެ. ނަމަވެސް އެގަޑީގައިވެސް ސަފުގައި މީހުން ވޯޓުނުލެވި ތިބިނަމަ، ސަފުގައި ތިބި މެމްބަރުންނަށް ވޯޓުލުމުގެ ފުރުސަތު ލިބިގެންދާނެކަމަށެވެ.
ވޯޓުލުން ކުރިޔަށް ގެންދިއުމަށް ހަމަޖެހިފައިވަނީ މާލޭގެ 15 ސްކޫލާއި، ސޯޝަލް ސެންޓާރުގެ އިތުރުން، މޮނިޓަރިންގެ ހާލަތުގައި ނެތް ރަށްރަށުގެ ތެރެއިން 3 ރަށް ފިޔަވާ އެހެން ހުރިހާ ރަށެއްގައިވެސް އެރަށެއްގެ ސްކޫލުގައެވެ. ވޯޓުލުމަށްޓަކައި މެމްބަރުން ދާއިރުގައި ފޮޓޯ ޖެހި އައިޑީއެއް ހިފައިގެން ދިއުމަށާއި، ވޯޓުލާ ނިމުމުން އެ މެމްބަރެއްގެ އިނގިލީގައި ފާހަގައެއް ޖަހާނެކަން ވަނީ ފާހަގަކޮށްފައެވެ.
އިންތިޚާބުގެ ތެރޭގައި ދިމާވާ އެކިއެކި ކަންކަމުގައި ޝަކުވާ ހުށަހެޅުމަށް 3 ނަމްބަރެއްގެ ބޭނުން ކުރެވޭނެ ހޮޓްލައިނެއް ގާއިމްކުރުމުގެ މަސައްކަތް ވެސް ކުރެވެމުންދާ ކަމަށާއި މިއަދުގެ ވަގުތެއްގައި އިއުލާން ކުރާނެ ކަމަށާއި އަދި ހަމަ އެއާއިއެކު މިހާރުވެސް ވޯޓިން ލިސްޓުގައި މައްސަލައެއް އުޅޭނަމަ އެ މައްސަލައެއް ގޫގުލް ލިންކެއް މެދުވެރިކޮށް ހުށައެޅޭނެ ކަމަށް ހަސަން ލަތީފު ވިދާޅުވިއެވެ. އެހެން ފަހަރުތަކާއި ޚިލާފަށް މިފަހަރު ވޯޓު ފޮށިތަކާއިއެކު އެކަމަށް ބޭނުންވާ ވޯޓުކަރުދާސްތަކާއި، ބޭނުންވާ އޮފިޝަލުންގެ ފާސްތައްވެސް ފޮނުވާފައިވާނޭކަމަށާއި، މިއަދާއި ހިސާބަށް 60 ފޮށި ރަށްރަށަށް ފޮނުވިފައިވާނޭ ކަމަށާއި، މިއަދާއި މާދަމާއާއި އެއްކޮށް ބާކީ ރަށްރަށަށް ފޮށިތަށް ފޮނުވޭނޭކަމަށް ވެސް ހަސަން ލަތީފު ވިދާޅުވިއެވެ.
