ޔުވެންޓަސްއަށް ފުރަތަމަ މޮޅު، މިލާން ކުރިއަށް

އިޓާލިއަން ލީގުގައި ބުދަ ދުވަހުގެރޭ ސްޕެޒިއާ އަތުން މޮޅުވެ ޔުވެންޓަސްއިން މި ފަހަރު ލީގުގައި ފުރަތަމަ މޮޅު ހޯދައިރު، ވެނެޒިއާ ބަލިކޮށް ތާވަލުގެ ކުރިއަށް މިލާން ޖެހިލައިފިއެވެ.

ރަށުން ބޭރުގަައި ކުޅުނު މެޗުން ޔުވެންޓަސް މޮޅުވީ 3-2 ގެ ނަތީޖާއަކުންނެވެ.

މިއީ މެސިމިލިއާނޯ އަލްގެރީގެ ކޯޗުކަމުގައި މި ސީޒަނުގައި ވާދަކުރަމުން އަންނަ ޔުވެންޓަސްއިން ލީގުގައި ހޯދި ފުރަތަމަ މޮޅެވެ. މި މެޗުގެ ކުރިން ލީގުގައި ކުޅުނު ހަތަރު މެޗުންވެސް ޔުވެންޓަސްއަށް މޮޅެއް ހޯދިފައެއް ނުވެއެވެ. އެއާއެކު މިއީ މިދިޔަ 60 އަހަރު ތެރޭ އެ ޓީމު ލީގުގައި އެންމެ ދަށްކޮށް ފެށި ފަހަރެވެ.

ލީގުގައި ބުދަ ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ޔުވެންޓަސްއިންނެވެ. މެޗުގެ 28 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ މޮއިސޭ ކީނެވެ. އެކަމަކު އޭގެ ފަސް މިނިޓް ފަހުން އޭރިއާ ތެރެއިން ފޮނުވާލި ހަމަލާއަކުން އެމަަނުއަލް ޖިއާސީ ވަނީ ސްޕެޒިއާއަށް ނަތީޖާ އެއްވަރުކޮށްދީފައެވެ.

އޭގެ ފަހުން މެޗުގެ ދެވަނަ ހާފު ފަށައިގެން ހަތަރުވަނަ މިނެޓުގައި ސްޕެޒިއާއިން ވަނީ މި މެޗުގައި ލީޑު ނަގާފައެވެ. ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ ޔަނިސް އަންޓީސްޓެވެ. އެކަމަކު މެޗުގެ 66 ވަނަ މިނެޓުގައި ފެޑެރީކޯ ކިއޭސާ ވަނީ ޔުވެންޓަސްއަށް ނަތީޖާ އެއްވަރުކޮށްދީފައެވެ. އަދި މި މެޗުން ޔުވެންޓަސް މޮޅުކޮށްދިން ލަނޑު މެޗުގެ 72 ވަނަ މިނެޓުގައި ކާމިޔާބުކޮށްދިނީ މަތިއަސް ޑި ލީޓެވެ.

މީގެ އިތުރުން ލީގުގައި ބުދަ ދުވަހުގެރޭ ކުޅުނު މެޗުން މިލާން މޮޅުވީ ވެނެޒިއާ އަތުން 2-0 ގެ ނަތީޖާއަކުންނެވެ.

މިލާނުގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މެޗުގެ 68 ވަނަ މިނެޓުގައި މިލާނުން ވަނީ ލަނޑު ޖަހައި ލީޑު ނަގާފައެވެ. ތެއޯ ހެނާންޑޭޒް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ބްރަހިމް ޑިއާޒެވެ. އަދި މެޗު ނިމެން އަށް މިނެޓަށް ވެފައި ވަނިކޮށް އެލެކްސިސް ސައެލެމައެކާސް ތަނަވަސްކޮށްދިން ފުރުސަތަކުން ހެނާންޑޭޒް ވަނީ ލަނޑެއް ޖަހައި، މިލާނުގެ ލީޑު ފުޅާކޮށްދީފައެވެ.

މި ނަތީޖާތަކާއެކު މިލާން އޮތީ ތާވަލުގެ ދެވަނައިގައި ކުޅުނު ފަސް މެޗުން ލިބުނު 13 ޕޮއިންޓާއެކުއެވެ. އެއްވަނައިގައި އޮތް އެންމެ ފަހުގެ ޗެމްޕިއަން އިންޓަ މިލާނަށްވެސް ފަސް މެޗުން ލިބިފައިވަނީ 13 ޕޮއިންޓެވެ. އަދި ލީގުގައި ފުރަތަމަ މޮޅު ހޯދި ޔުވެންޓަސް އޮތީ ތާވަލުގެ 13 ވަނައިގައި ފަސް މެޗުން ފަސް ޕޮއިންޓާއެކުއެވެ.