ހަނގުރާމައަށް ދިވެހިން ރެކްރޫޓްކޮށް ބޭރަށް ފޮނުވާކަމުގެ ތުހުމަތުގައި ދައުވާ އުފުލާފައިވާ ޓެރަރިސްޓް މުހައްމަދު އަމީންގެ މައްޗަށް މޮނިކޮން އަމުރެއް ނެރެފިއެވެ.
ރާއްޖެ އެމްވީއަށް ކަށަވަރުވެފައިވާ ގޮތުގައި، އަމީންގެ މައްޗަށް މޮނިކޮން އަމުރެއް އާދިއްތަ ދުވަހުގެ ހަވީރު ނެރެފައިވަނީ ހައިކޯޓުންނެވެ. މި އަމުރު ނެރެފައިވަނީ 1 މަސް ދުވަހަށެވެ. އަމީންގެ މައްޗަށް ނެރެފައިވާ މޮނިކޮން އަމުރުގައި ވަނީ އޭނާއަށް، އިރުއޮއްސި 6:00 އިން ހެނދުނު 6:00 އަށް ބޭރަށް ނުކުމެ އުޅުން މަނާކޮށްފައެވެ. މީގެ އިތުރުން މާލެއިން ބޭރަށް ދެވޭނީ ފުލުހުންގެ ހުއްދަ ހޯދައިގެން ކަމަށް މި އަމުރުގައިވެއެވެ.
އަމީންގެ މައްޗަށް ހައިކޯޓުން މޮނިކޮން އަމުރެއް ނެރެފައިވާއިރު، ދައުލަތާ ދެކޮޅަށް އަމީން އިސްތިއުނާފަށް ހައިކޯޓަށް ހުށަހެޅި މައްސަލައިގައި މި މަހު 16 ވަނަ ދުވަހު ހައިކޯޓުން ވަނީ އޭނާގެ މައްޗަށް ކޮށްފައިވާ ދައުވާތައް ބާތިލުކޮށް، އޭނާ މިނިވަންކޮށްފައެވެ. ހައިކޯޓުން އަމީން ދޫކޮށްލުމަށް ނިންމީ ދަށު ކޯޓު މަރުހަލާގައި ޝަރީއަތް ފެށުމުގެ ކުރިން އަމީންގެ ފަރާތުން ހުށަހެޅި ހުށަހެޅުންތަކެއް ބަލައިނުގަތުމުން އެ ނިންމުން ހައިކޯޓަށް ހުށަހެޅުމުން އެ ކޯޓުން ވެސް އެންމެ ފުރަތަމަ އެކަން ބަލައިނުގަނެ ބޭރުކޮށްލުމުން ސުޕްރީމް ކޯޓަށް ހުށަހަޅައި ސުޕްރީމް ކޯޓުން ކުރި އަމުރަކަށްފަހު ހައިކޯޓުން އަލުން އެ މައްސަލަ ބެލުމަށް ފަހުގައެވެ.
ހައިކޯޓުގެ ހުކުމުގައި ބުނެފައިވަނީ ޖިނާއީ އާންމު އިޖުރާއަތުގެ ދަށުން އަމީން ބަންދު ކޮށްފައިވާތީ އޭނާގެ މައްޗަށް ދައުވާ ކުރަން ޖެހޭނީ 30 ދުވަހުގެ ތެރޭގައި ކަމަށެވެ. އޭނާއަށް ދައުވާ ކުރެވޭނެ އެންމެ ފަހުގެ ތާރީހަކީ 2019 ނޮވެމްބަރު 24 ގައި ކަމަށްވާއިރު ދައުވާ ކުރީ 2019 ޑިސެމްބަރު 5 ގައި ކަމަށް ހުކުމުގައިވެއެވެ.
ހައިކޯޓުން އަމީން ދޫކޮށްލާފައިވަނީ ދައުވާކުރުމުގެ މުއްދަތުގެ ތެރޭގައި ދައުވާކޮށްފައި ނުވާތީ ދައުލަތުން އޭނާގެ މައްޗަށް އުފުލި ދައުވާތައް ބާތިލް ވެސް ކުރުމަށްފަހުއެވެ. ހައިކޯޓުގެ މި ނިންމުން ސުޕްރީމް ކޯޓުގައި އިސްތިއުނާފް ކުރުމަށް ނިންމާފައިވާ ކަމަށް ޕްރޮސެކިއުޓާ ޖެނަރަލްގެ އޮފީހުން ވަނީ ބުނެފައެވެ. ދައުލަތުން ދެކޭ ގޮތުގައި އަމީނަށް ދައުވާ ކުރަން ޖެހޭ މުއްދަތު ބަލަން ޖެހޭނީ ޓެރަރިޒަމް މަނާ ކުރުމުގެ ގާނޫނުގެ ދަށުންނެވެ. އެ ގާނޫނުގެ ދަށުން ހައްޔަރު ކުރާ ނަަމަ ތަހުގީގަށް 45 ދުވަސް ލިބޭނެއެވެ. އަދި ދައުވާ ކުރަން 15 ދުވަސް ލިބޭ އިރު އެއަށް ވުރެ މުއްދަތު އިތުރު ވެސް ކުރެވިދާނެއެވެ.
މިކަމާ ގުޅިގެން ރާއްޖެޓީވީއަށް މީގެ ކުރިން ދެއްވި ފޯން އިންޓަވިއުއެއްގައި ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވީ ހައިކޯޓުން ނިންމެވި މައްސަލާގައި ޖިނާއީ އިޖުރާޢަތުގެ ޤާނޫނުގައި ބުނާ އުސޫލުތަކަށް އަމަލު ކުރަން ޖެހޭ ކަމަށް ބުނެފައިވާ ކަމަށެވެ. އެހެންނަމަވެސް ޓެރަރިޒަމްގެ ޤާނޫނު އުފެއްދީ ޖިނާއީ އިޖުރާޢަތުގައި ހުރި ޤާނޫނުގެ އުސޫލުތައް ޓެރަރިޒަމްގެ މައްސަލަތަކަށް ހިންގަން ބަލާއިރު އުނދަގޫވާތީވެ ޚާއްސަ ޤާނޫނެއް އުފައްދާފައިވާ ކަމަށާއި ޚާއްސަ ޤާނޫނުގައި އާންމުކޮށް ޤާނޫނުގައި ނުހުންނަ ކަހަލަ ޚާއްސަ ބާރުތަކެއް ފުލުހުންނަށް ވެސް އަދި ޕީޖީ އޮފީހަށް ވެސް، ދައުލަތުގެ އިދާރާތަކަށް ވެސް ދީފައި އެބަހުރި ކަމަށެވެ.
ކޯޓު އަމުރަކާ ނުލާ މީހުން ހައްޔަރު ކުރުމަކީ އޮންނަ ކަމެއް ނޫން ކަމަށާއި އެއީ ޚާއްސަ ޤާނޫނުން ބާރު ލިބިގެން ކުރަންވާނެ ކަމެއް ކަމަށް ޝަމީމް ވިދާޅުވިއެވެ. އަދި އެއަށްފަހު ބަންދުގައި ބަހައްޓާނެ ގޮތް އޮންނަނީ އާންމު އިޖުރާއަތަށް ރުޖޫއަވާން ކަމަށާއި އެހެންނަމަވެސް ހައިކޯޓުން ޓެރަރިޒަމްގެ ޤާނޫނުގައި ބުނާ ކަންތައްތައް ކުރަން ޖެހޭނީ އިޖުރާއަތުގެ ދަށުން ކަމަށް ބުނެފައިވާ ކަމަށެވެ. އެއީ ހިތްހަމަނުޖެހޭ ކަމެއްކަން ފާހަގަކުރައްވައި ޝަމީމު ވިދާޅުވީ އިޖުރާޢަތުގެ ޤާނޫނު އޮއްވާ ޓެރަރިޒަމްގެ ޤާނޫނު ހެދީ އެބާވަތުގެ ވަކި މައްސަލަތަކުގައި ވަކި ޚާއްސަ މުއްދަތުތަކެއް ދިނުމަށްޓަކައި ކަމަށެވެ.
އެގޮތުން ޖިނާއީ އިޖުރާއަތުގެ ޤާނޫނުގައި ދައުވާ ކުރުމުގެ މުއްދަތު އޮންނަނީ 45 ދުވަސް ކަމަށާއި ޓެރަރިޒަމްގެ ޤާނޫނުގައި 75 ދުވަސް ތަހުޤީޤު ކުރަން އަދި 15 ދުވަސް ދީފައި އޮންނަ ކަމަށެވެ. އެހެންނަމަވެސް ހައިކޯޓުން ބަންދާއި ދައުވާ ކުރުމުގެ މުއްދަތު އެއްކޮށްލައިގެން ޤާނޫނު ކިޔާފައިވާ ކަމަށް ހީފުޅުވާ ކަމަށް ޝަމީމް ވިދާޅުވިއެވެ.
ޤާނޫނު ކިޔަން ޖެހޭނީ އެހެން ނޫންކަން ފާހަގަކުރައްވައި ޕީޖީ ވިދާޅުވީ ބަންދަކީ ވަކި ކަމެއް ކަމަށާއި ދައުވާ ކުރުމަކީ ވެސް ވަކި ކަމެއް ކަމަށެވެ. އަދި މި މައްސަލާގައި ދައުވާ ކޮށްފައިވަނީ ދައުވާ ކުރަން ޖެހޭ މުއްދަތުގައި ކަމަށާއި ސުޕްރީމް ކޯޓަށް އިލްތިމާސް ކުރުމުގެ މަސައްކަތް ފަށާފައިވާ ކަމަށް ވެސް ވިދާޅުވިއެވެ.
މައްސަލައިގައި ހިމެނޭ މީހާ އަކީ އިންތިހާއަށް ނުރައްކާތެރި މީހެއް ކަމަށް ފުލުހުން ބުނެފައިވާ ކަމަށާއި މައްސަލަ އަވަސް ކޮށްދިނުމަށް ސުޕްރީމް ކޯޓުގައި އެދޭނެ ކަމަށް ޝަމީމް ވިދާޅުވިއެވެ.
އަމީންގެ މައްސަލައިގެ ޚުލާސާ ބަޔާން އަންނަ މަހު 29 ގައި އިއްވައި، އޮކްޓޯބަރު މަހުގެ ފަހު ކޮޅު ނުވަތަ ނޮވެމްބަރު މަހުގެ ކުރީކޮޅު ހުކުމް އިއްވޭނެ ކަމަށް މި މައްސަލަ ބައްލަވާ އިސް ގާޒީ ޝަކީލުވަނީ ވިދާޅުވިއެވެ.
އަމީނަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ހިމެނުނު ފުރަތަމަ ދިވެއްސެވެ. އަމީނަކީ ޓެރަރިސްޓެއް ކަމަށް ކަނޑައަޅައި، އެމެރިކާގެ ޑިޕާޓްމަންޓް އޮފް ދަ ޓްރެޒަރީޒް އޮފީސް އޮފް ފޮރިން އެފެއާޒް ކޮންޓްރޯލް (އޯއެފްއޭސީ)އިން އޭނާއަށް މާލީ ދަތިކުރުމުގެ ފިޔަވަޅު ވެސް އަޅާފައިވެއެވެ.
އަމީނަކީ ރާއްޖޭގެ އައިއެސްގެ ލީޑަރު ކަމަށާއި، ހަނގުރާމަތަކަށް އޭނާ މީހުން ރެކްރޫޓް ކުރާ ކަމަށް ދައުލަތުން ހޯމަ ދުވަހުގެ އަޑު އެހުމުގައި ބުނެފައިވެއެވެ. އަމީންގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ އަމަލެއް ކުރަން ރޭވުމުގެ ކުށުގެ ދައުވާ އާއި ޓެރަރިސްޓު ޖަމާއަތެއްގައި ބައިވެރިވުމުގެ ކުށުގެ ދައުވާއެވެ.
