މާލެ ސިޓީ ކައުންސިލުން އެއްބަސްވުމުން މާނަކުރަނީ ނުބައިކޮށް: ވެމްކޯ
18 ސެޕްޓެމްބަރު 2021 | ހޮނިހިރު 10:44ސިޓީ ކައުންސިލުން ކުނި އުކުމަށް މިހާތަނަށް އެދިފައެއްނުވޭ
ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު
މާލެސިޓީ ކައުންސިލާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ދެމެދު ވެފައިވާ ކުނި ނަގައި، މަގުމަތި ސާފު ކުރުމުގެ އެއްބަސްވުން ސިޓީ ކައުންސިލުން މާނަކޮށްފައިވަނީ ނުބައިކޮށް ކަމަށް އެ ކުންފުނިން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު ވިދާޅުވީ ވެމްކޯއިން ސިޓީ ކައުންސިލާއެކު ކުނި މެނޭޖް ކުރުމުގެ އެއްބަސްވުމެއް ހަދާފައިނުވާނެ ކަމަށާއި ހަމައެކަނި އެއްބަސްވުން ހަދާފައިވަނީ ކުނި ނަގައި މަގުމަތި ސާފު ކުރުމުގެ އެއްބަސްވުމެއްގައި ކަމަށެވެ.
މާލޭގެ މަގުތައް ކުނިކަހައި ސާފުކޮށް މަގުމަތަކުގައި އާންމު ރައްޔިތުންނަށް އުނދަގޫވާ ގޮތަށް ހުންނަ ކުނިތައް އުކާލައި ނައްތާލުމުގެ އިންތިޒާމު ހަމަޖެއްސުމަކީ ވެމްކޯއާއެކު ހަދާފައިވާ އެއްބަސްވުމުގެ ދަށުން އެ ކުންފުނީގެ ޒިންމާއެއް ކަމަށް ސިޓީ ކައުންސިލުން ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ މޭޔަރ އަހުމަދު ނަރީޝް ވިދާޅުވި ވާހަކައަށް ރައްދު ދެއްވަމުން އާދަމް ވިދާޅުވީ އެ އެއްބަސްވުމުގެ ދަށުން މާނަ ކޮށްފައިވަނީ ދުވަހު ކުނި ނޫން ކަމަށެވެ. އެހެންކަމުން އެ ކުނިތައް އުކާލުމަކީ ވެމްކޯގެ ޒިންމާއެއް ނޫން ކަމަށާއި އެއްބަސްވުމުގައި ވާގޮތުން ކުނި މާނަ ކޮށްފައިވަނީ ކޮންސްޓްރަކްޝަން މަސައްކަތްތަކާއި ގެ ބަދަލުވާއިރު ބޭރު ކުރާ ފަރުނީޗަރުތަކާއި މަގުމަތީގައި ގިނަ ދުވަސްވެފައިވާ ކުނިތައް ކަމަށެވެ.
ވެމްކޯއިން އެ ކުނިތައް ވެސް އުކާލުމަށް ހަމަޖެހިފައިވަނީ ސިޓީ ކައުންސިލުން އެތަންތަން ހޯދުމަށްފަހު ފޮޓޯއާއި މަގުގެ ނަން ފޮނުވުމުން ކަމަށާއި އެއީ އިތުރަށް ޗާޖް ކުރާ ޚިދުމަތަކަށް ވުމުން ސިޓީ ކައުންސިލުން އެކަމަށް އެދެން ޖެހޭ ކަމަށެވެ. އަދި މިހާތަނަށް ސިޓީ ކައުންސިލުން އެފަދަ ކުނިތައް އުކުމަށް އެދިފައިނުވާ ކަމަށް އާދަމް ވިދާޅުވިއެވެ.
ވެމްކޯއިން އެފަދަ ކުނިތައް ނުއުކާ ކަމަށްވާނަމަ އެ މަސައްކަތް އެހެން ބަޔަކާ ހަވާލުކުރަން ޖެހިދާނެ ކަމަށް ސިޓީ ކައުންސިލުން ބުނި ވާހަކަތަކަށް އަލިއަޅުއްވާލައްވަމުން އާދަމް ވިދާޅުވީ ކުނި އުކާލުމުގެ ޚިދުމަތް ފޯރުކޮށްދިނުމަށް އެކްސްކްލޫސިވް ރައިޓްސް ދީފައިވަނީ ވެމްކޯއަށް އެކަނި ކަމަށެވެ.
ވެމްކޯ އާއި ސިޓީ ކައުންސިލާ ދެމެދު މައްސަލަތައް މިދަނޑިވަޅުގައި ބޮޑުވެފައިވާއިރު ސިޓީ ކައުންސިލުން ވަނީ މާލޭގެ މަގުތަކުގައި ހުރި ކުނިތައް ނަގައި ވެމްކޯގެ ގޭޓް ކުރިމައްޗަށް އަޅާފައެވެ. އަދި އެކަން ކުރީ ދެބަސްވުމެއްގެ ތެރެއިން ކަމަށް ބުނެ ކައުންސިލުން ވަނީ ފަހުން މާފަށްވެސް އެދިފައެވެ.
އާދަމް މުޙައްމަދު ވިދާޅުވީ ކޮވިޑް-19ގެ ހާލަތުގައި މި ޚިދުމަތަށް ރަޖިސްޓްރީ ނުކުރާ ގޭގެއިންވެސް ކުނި ނަގައިދީފައިވާއިރު، ދެން އެގޮތަށް އެ ޚިދުމަތް ނުދޭން ނިންމާފައިވާ ކަމަށެވެ. މާލެ ސަރަހައްދުގެ 50 އިންސައްތަ ގޭބީސީން ވެސް މި ޚިދުމަތަށް ރަޖިސްޓްރީކޮށްފައި ނުވާކަމަށް ވިދާޅުވިއެވެ. އެހެންކަމުން ވެމްކޯގެ ޚިދުމަތަށް ރަޖިސްޓްރީ ނުކުރާ ފަރާތްތަކުން ވީހާވެސް އަވަހަކަށް އެ ޚިދުމަތަށް ރަޖިސްޓްރީ ކުރުމަށް އާދަމް ވަނީ އެދިވަޑައިގެންފައެވެ.
މި ޚިދުމަތަށް ރަޖިސްޓްރީކުރުމަށް މިހާރު ހުޅުވާލާފައިވާއިރު މާލެ، ހުޅުމާލެ އަދި ވިލިމާލޭގައި ގާއިމްކޮށްފައިވާ ރެޖިސްޓްރޭޝަން ޑެސްކުތަކުންނާއި، ވެމްކޯގެ ވެބްސައިޓް މެދުވެރިކޮށްވެސް ޚިދުމަތަށް ރަޖިސްޓްރީކުރެވޭނެ ކަމަށް ވެމްކޯއިން ވަނީ ބުނެފައެވެ. މިމަހުގެ 30 ގެ ނިޔަލަށް ރަޖިސްޓްރޭޝަން ކުރިއަށްގެންދަން ނިންމާފައިވާއިރު، ރެޖިސްޓްރޭޝަން ކުރިއަށްދާ މުއްދަތުގައި މަގުމަތިން ކުނި ނަގަމުންދާނެ ކަމަށް ވެމްކޯއިން ވަނީ ބުނެފައެވެ. އެހެންނަމަވެސް ވީހާވެސް އަވަހަކަށް މި ޚިދުމަތަށް ރަޖިސްޓްރީކުރުމަށް ވެމްކޯއިން ވަނީ އިލްތިމާސްކޮށްފައެވެ.
ވެމްކޯއިން ޚިދުމަތް ދިނުމުގައި އަމަލުކުރާ އުސޫލަށް ބަދަލުގެނެސްފައިވާއިރު، މިކަން ނޭނގިގެން ނުވަތަ އެނގިގެން ވިޔަސް ގިނަ ބަޔަކު މަގުމައްޗަށް ކުނި ނެރެފައިވާކަމަށް ވެމްކޯގެ އެމްޑީ ފާހަގަކުރެއްވިއެވެ. އަދިވެސް ބައެއް ސަރަހައްދުތަކަށް ކުނި ޖަމާކޮށްފައިވާކަމަށާއި، މި ސަރަހައްދުތަކުން ކުނި ނެގުމުގެ މަސައްކަތް ކުރަމުންދާނެ ކަމަށް އާދަމް ވިދާޅުވިއެވެ.
